Gikan sa Among mga Magbabasa

Dili Makadaot ang mga Nobela sa Romania?

Tinuod nga nakapahimuot ang pagbasa sa artikulong “Mga Batan-on Nangutana . . . Ang mga Nobela sa Romansa Dili ba Makadaot Basahon?” (Marso 8, 1984) Akong nasinati sa personal ang kadaot nga ipahinabo sa pagbasa niana. Ako kaniadto tigdamgo bahin sa dato, lig-on, guwapong mga lalaki nga gibatbat niana. Kana ang paagi nga ako misangko sa pagminyo sa hakog, maduhaduhaon, mahigugmaon-sa-kalingawan nga lalaki, nga misangpot sa kaminyoong nahimong usa ka kapakyasan. Walay usa ang makahimo sa pagdamgo sa kinabuhi. Duha ka tuig tapos mamatay ang akong bana ako naminyo pag-usab, apan sa maong panahon sa hilomon, kugihan nga lalaki, nga lahi kaayo sa mga lalaking gihulagway diha sa mga nobela sa romansa. Ang among gamay nga pamilya karon nahibalo kon unsay kahulogan sa tinuod nga kalipay.

J. O., Pransiya

Gandhi

Bisan tuod ako nahimuot sa inyong artikulo mahitungod kang Mahatma Gandhi (Oktubre 8, 1984), igaingon ko nga ako nahiubos bahin sa inyong seksiyon sa sistema sa klase. Bisan tuod ang Hindu nga mga diyos maoy itom ug puti, nga mao, si Krishna maoy itom ug si Radha, iyang asawa, puti, ako dili makaingon nga ang Hinduismo nagapraktis sa sama sa apartheid nga mga Kristohanon sa South Africa, ni nagatugot kini sa sistema sa klase. Ang katawhang nagtuo sa sistema sa klase nagakawad-an sa ilang pagtahod sa katilingban, ug adunay daghang doktor ug propesyonal nga katawhan gikan sa ubos nga klase sa India. Kami duna gani’y ubos-klase nga primer ministro—si Jagjivan Ram—kinsa niadto usa ka Sudra. Ang pagpihigpihig batok sa klase maoy ilegal sa India sama ra sa rasismo sa Britanya.

N. P., Inglaterra

Sama sa giingon sa Indian nga magsusulat nga misulat sa among artikulo, ang pagkadili-mahikap gidili sa India sukad 1950. Apan ang usa ka bag-ong surbi sa duolag usa ka libong balangay sa tibuok India mipadayag nga kon ikaw Dili-Mahikap, 61 porsiento sa ubang tawo dili magpagamit kanimo sa ilang atabay; 82 porsiento dili motugot nga ikaw mosulod sa templo; dili ka papuy-on sa 56 porsiento; 52 porsiento sa mga labandero magdumili kanimo sa ilang serbisyo; ug 45 porsiento sa mga barbero dili magbalbas kanimo. Dugang pa, ang “The Hindu” sa Mayo 4, 1982, mitaho nga ang The Mandal Commission nagpasidaan batok sa pagtuo nga ang sistema sa klase nagkawala na. Bisan pa niana, dili tuyo sa among artikulo ang pagsaway sa India o sa kamatuorang ang sistema sa klase nagalungtad pa sa mga hunahuna sa daghan bisan pag kini gidili. Hinunoa, buot namong ipakita ang mga sulirang giatubang ni Gandhi, ug ginaatubang sa ubang sama kaniya karong adlawa. Buot usab namong ipakita nga ang mga tawo dili gayod makasulbad niining mga sulirana bisan pag pinaagi sa kinamaayohang mga balaod. Pinaagi lamang sa administrasyon sa Gingharian sa Diyos pinaagi kang Kristo Jesus nga ang tanang tawhanong pagpihigpihig, kahakog ug kapintasan mahanaw. Ikalipay, ang panahon haduol na dihang ang maong Gingharian molihok sa pagwagtang gikan sa yuta sa tanang pagkadaotan.—ED.