Gikan sa Among mga Magbabasa

Bahin sa Pakigdeyt

Salamat kaayo sa inyong artikulong “Mga Batan-on Nangutana . . . Alang ba Kanako ang Pakigdeyt?” (Hunyo 22, 1982 Ingles) Uban sa tabang nianang artikuloha ug sa pag-ampo kang Jehova, nakatul-id ako sa situwasyon diha sa tunghaan.

S. H., Illinois

Tambal sa Ulser

Sa inyong artikulong “Busa Nagtuo Kang May Ulser Ka?” (Septiyembre 8, 1982 Ingles) gipasiugda ninyo kanunay ang markang Tagamet, ug tingali mokiling ang magbabasa niining espisipikong komersiyal nga ngalan sa substansiya nga mabatonan sa ubang mga ngalan nga sama ra usab ka epektibo. Mahal kaayo ang Tagamet ug may daotang mga epekto usab. Sa hunahuna ko dakong sayop ang pagrekomendar niini.

J. M., M.D., Portugal

Wala gayod sa espisipiko girekomendar ang Tagamet apan naghisgot lamang nga usa kini sa bag-ong mga porma sa pagtambal nga adunay dakong kalamposan sa ubang situwasyon kay sa mga antacid. Sa tanang artikulo nga among ipatik nga maghisgot sa mga butang bahin sa panglawas o medisina, mainampingon gayod kami sa dili pagrekomendar ug partikular nga tambal apan sa pagpahibalo sa among mga magbabasa kon unsang tambala ang mabatonan ug kon sa unsang paagi moobra ang tambal o medisina. Ang dugang impormasyon bahin sa paggamit sa mga produkto sa cimetidine gipatik sa among isyu sa Hunyo 22, 1983, panid 28.—ED.

Marmots

Nalingaw ako sa inyong artikulo bahin sa marmots (Septiyembre 8, 1984), apan miingon kamo nga ang beaver mao ang labing dakong ilaga, ug ikaduha ang marmot. Sumala sa akong nahibaloan ang capybara, sa Sentral ug Habagatang Amerika, mao ang pinakadakong buhi nga ilaga.

E. G., Habatagang Aprika

Nasayop ang “Awake!.” Moabot ug 2.5 piye (76 cm) ang beaver gikan tumoy sa ikog ngadto sa simod ug may gibug-atong 60 ka libra (27 kg). Ang capybara moabot sa gitas-ong kuwatro piye (1.2 cm) ug may gibug-atong 110 ka libra (50 kg).​—ED.

Seksuwal nga Pag-abuso sa Bata

Akong nabasa ang inyong isyu bahin sa seksuwal nga pag-abuso sa bata. (Hunyo 22, 1985) Wala ako masayod sa mga kapeligrohan. Usa ako ka batan-ong inahan, ug ang hulga sa seksuwal nga pag-abuso sa bata wala gayod motungha sa akong hunahuha. Karon nasayod na ako sa tanang kapeligrohan ug adunay pipila ka butang nga akong mahimo sa pagsumpo niana nga dili mahitabo. Buot akong mopasalamat kaninyo gikan sa kahiladman sa akong kasingkasing.

J. M., New York

Sud-ang Pankeyk

Nalingaw gayod kami sa inyong artikulo bahin sa “repolyong pankeyk.” (Nobyembre 8, 1984 sa Ingles) Nagluto kami nga gisagolag bacon, sibuyas, uhong, ug lamian kini nga ipanihapon. Nagluto usab kami niini sa among wala planohang salosalo, ug nahimong popular usab kini didto. Dayon misulay kami ug lamiang pankeyk sa pamahaw, gigamit ang naandang binatil, ug gisagolag hiniwang mansanas ug soriso, nga lamian bisag kini ra o nga may maple syrup. Usa lamang ka butang​—alang kanamong “mga langyaw.” Unsa kining white cabbage? Ang labing duol nga akong mapalit, human sa pagpangutana sa trabahante sa supermarket mao ang napa, o Chinese, cabbage. Bisan unsa pa, salamat sa lamiang resipe!

J. W., Colorado

Chinese cabbage ang tukma.—ED.