Pagsusi sa Pagkadaotan Gikan ni Augustine Ngadto Kang Calvin
SA IYANG librong The City of God, ang ikalimang siglong teologo si Augustine miergo nga ang tawo, dili ang Diyos, maoy nakaingon sa paglungtad sa pagkadaotan. Misulat si Augustine: “Ang Diyos, ang awtor sa mga kinaiyahan, dili sa mga bisyo, naglalang sa tawo nga matul-id; apan ang tawo, kay sa iyang kaugalingong pagbuot nadaot ug sa pagkamatarong gihukman sa kalaglagan, nanganak sa daotan ug gihukman-sa-kalaglagang mga anak . . . Ug busa, gikan sa daotang paggamit sa kagawasan sa pagpili, dinha naggikan ang bug-os nga han-ay sa pagkadaotan.”
Ang daotang paggamit sa kagawasan sa pagpili makapatin-aw sa daghan, o kalabanan, sa kadaotang naagoman sa katawhan. Bisan pa niana, ang usa ka katalagman, sama sa didto sa San Ramón, ikapasangil ba sa kagawasan sa pagpili sa tawo? Dili ba daghang daotang mga hitabo ang gipahinabo sa mga kahimtang dili magamhan sa tawo? Ug bisan pag tinuyong gipili sa tawo ang pagkadaotan, nganong tugotan man sa Diyos sa gugma nga magpadayon ang pagkadaotan?
Sa ika-16 nga siglo, ang Pranses Protestanteng teologo si John Calvin, sama kang Augustine, nagtuo nga dunay mga tawong “gihukman daan [sa Diyos] nga mahimong mga anak ug mga manununod sa langitnong gingharian.” Ugaling, gipasobrahan kana ni Calvin, nga miergo nga ang Diyos naghukom usab daan sa mga indibiduwal nga mahimong “mga dumadawat sa iyang kapungot”—nga gihukman sa walay-kataposang pagkatinunglo!
Ang doktrina ni Calvin may makahadlok nga mga kahulogan. Kon ang usa ka tawo makaagom sa bisan unsang matang sa kadaotan, dili ba kana magpasabot nga siya nahiapil sa mga tinunglo? Dugang pa, dili ba ang Diyos maoy responsable alang sa mga lihok niadtong iyang gihukman daan?
Si Calvin sa ingon wala tuyoang naghimo sa Diyos nga Maglalalang sa sala! Si Calvin miingon nga “ang tawo makasala tungod sa pagtugot sa tukma gayod sa panahon ug nakiling nga kabubut-on.”—Instruction in Faith, ni John Calvin.
Bisan pa niana, ang mga ideya sa kagawasan sa pagpili ug sa pagkahinukman daan o predestinasyon napamatud-ang dili gayod magkabagay. Si Calvin nakatabon lamang sa makauulawng panagsumpaki pinaagi sa pag-angkong “ang pagkadili batid sa atong kaisipan dili gayod makadala sa maong dakong katin-aw, ni ang atong kagamay makasabot sa maong dakong kaalam” sama sa pagkahinukman daan o predestinasyon.
[Mga Letrato sa panid 6]
Augustine
John Calvin