Umaabot sa Relihiyon Tungod sa Iyang Kagahapon

Bahin 24: Karon ug sa Walay Kataposan—Ang Walay Kataposang mga Katahom sa Matuod nga Relihiyon

“Ang relihiyon, kon gidayandayanan sa langitnong mga kamatuoran, angay tan-awon lang aron pagadayegon.”—William Cowper, Ingles nga magbabalak sa ika-18ng siglo

WALAY butang ikadayeg mahitungod sa bakak nga relihiyon. Kini naghatod sa katawhan ug 60 ka siglo sa pagkaalaot ug pag-antos. Ang iyang pagpamakak, panglimbong, pagkamabudhion, ug dulumtanang mga dalan nakapahimo niining mangil-ad sa panan-aw sa Diyos ug sa tawo. Halayo sa pagkanabistihan sa langitnong mga kamatuoran, ang bakak nga relihiyon maoy sukwahi sa kamatuoran ug katahom.

Sa dili madugay itambog sa tiglaglag nga mga panon sa Diyos ang bakak nga relihiyon ngadto sa bung-aw sa walay-kataposang kalaglagan. Human gilayon niana, mosunod ang nahibiling sistema ni Satanas. Apan ang matuod nga relihiyon, ingon man usab kadtong nagapraktis niana, mabuhi. Pagkamakalilipay unya nga makita ang iyang walay kataposang mga katahom nga ipasundayag sa usa ka sukod nga dili nato mahanduraw karong adlawa!

Unsang mga Katahom?

Daghan ang mga katahom sa matuod nga relihiyon. Ania ang pipila. Nganong dili mogahin ug panahon nga tan-awon ang gisitar nga mga teksto sa Bibliya nga nagpamatuod nga kining maong walay kataposang mga katahom nagasukad sa Bibliya?

Taliwala sa daghan walay kataposang mga katahom sa matuod nga relihiyon mao:

▪ Kini pinasukad sa kamatuoran sa dili-masayop nga Diyos, kansang ngalan mao si Jehova, kang kinsa kita sa bug-os makasalig.—Salmo 83:18; Isaias 55:10, 11.

▪ Kini mabatonan sa tanang mapainubsanon ug kasingkasing, dili lamang gireserba alang niadtong adunay superyor nga salabotan.—Mateo 11:25; 1 Corinto 1:26-28.

▪ Kini maoy buta sa rasa, sa sosyal nga kabutang, ug sa ekonomikanhong kahimtang.—Buhat 10:34, 35; 17:24-27.

▪ Kini nagatanyag ug kasaligang paglaom sa kinabuhi diha sa usa ka kalibotan sa kalinaw ug kasegurohan nga walay kasub-anan, sakit, kaguol, ug kamatayon.—Isaias 32:18; Pinadayag 21:3, 4.

▪ Kini nagatanag usa ka gambalay nga diha niana ang iyang mga membro nagapuyo ingong tibuok-kalibotan maunongong panag-igsoonay, nga nahiusa sa doktrina, paggawi, ug espiritu.—Salmo 133:1; Juan 13:35.

▪ Kini nagtanyag sa matag-usa—lalaki, babaye, ug bata—ug higayon nga makigbahing aktibo sa buluhaton sa Diyos, nga matugob ang kinabuhi nga may katuyoan.—1 Corinto 15:58; Hebreohanon 13:15, 16.

▪ Kini nagpasidaan kanato sa natagong mga kapeligrohan, nagtudlo kanato kon unsaon sa paggawi aron makabatog kaayohan sa atong kaugalingon.—Proverbio 4:10-13; Isaias 48:17, 18.

Ug nganong ikaingon nga kining maong mga katahom walay kataposan? Tungod kay sa yano kini molungtad sama sa paglungtad sa matuod nga relihiyon—sa walay kataposan.

Ang Pagpuno sa mga Kal-ang

Mahimong ikaingon nga ang kamatayon maoy usa sa labing dakong mga kaaway sa kamatuoran, sanglit ginadala sa mga tawo ngadto sa ilang mga lubnganan ang impormasyon nga wala mahibaloi sa ubang mga tawo. Ang tukmang mga detalye sa bag-o pang mga hitabo—pananglitan, ang pagpatay sa presidente sa T.B. nga si J. F. Kennedy niadtong 1963—sa gihapon butang pa nga ginalantugian. Unsa ang mga kamatuoran? Kinsa gayod ang nasayod? Daghan tingali niadtong nasayod patay na. Ug kon matuod kini sa usa ka hitabo nga 26 ka tuig lamang ang miagi, unsa pa kaha mahitungod sa mga hitabo nga nahitabo sa gatosan o kaliboan ka tuig ang milabay?

Dugang pa, mga tawo lamang ang mga mananalaysay, nga limitado sa kahibalo ug nagbuhat ubos sa kakulian sa personal nga pagkadili-hingpit ug tingali mapihigon pa. Mao nga ang tawo nga matumonganon maayong maglikay sa pagkahimong dogmatiko mahitungod sa mga butang nga siya walay awtoratibo, balaang pagkadasig nga rekord.

Ang pagsulat ug relihiyosong kasaysayan mohatag ug samang mga suliran, sanglit ang mga awtoridad nagsumpakiay man sa mga kamatuoran. Diha sa seryal nga “Umaabot sa Relihiyon Tungod sa Iyang Kagahapon,” ang Pagmata! naningkamot sa pagpresentar sa maayong pagkadokumentong mga kamatuoran, apan kinahanglang admitihon nga sa pagkakaron dunay pipila ka mga butang nga sa yano wala kami mahibalo. Pananglitan, ngadto sa unsang sukod nga ang nagaangkong Kristohanong mga grupo nga naglungtad sa panahon ug human sa Maingob nga mga Katuigan tinuod nga nagsunod sa matuod nga Kristiyanidad?

Taliwala niining mga grupoha, ang propesor sa kasaysayan sa simbahan nga si A. M. Renwick misulat: “Dakong historikal nga panukiduki ang gihimo gihapon aron mausisa ang matuod nga sugilanon ug ang teolohikanhong baroganan sa daghan niadtong mga grupo.” Sumala ni Renwick, “sa nangagi ang mga mananalaysay sobra rang nagsalig sa mga pahayag sa mga kaaway sa nagkasumpakiay nga mga grupo sa ilang pagtimbangtimbang sa ilang mga doktrina ug sa mga moral.” Siyempre, ang sobrang pagsalig sa mga pahayag sa ilang mga higala moresulta usab sa makilingong hunahuna. Busa bisan human sa dakong historikal nga panukiduki, daghang pangutana nagpabilin nga wala gihapon matubag.

Komosta ang mahitungod sa Bibliya? Ingong balaang pagkadasig nga basahon nga nasudlan ug pipila ka relihiyosong kasaysayan, kini kasaligan sa tanang gipamulong niini. Apan diyutay ra kaayo ang gihisgotan niini bahin sa tanang nagkalainlaing porma sa bakak nga relihiyon nga naglungtad sukad. Kini masabtan, sanglit kini gitagana aron magsilbing tun-anang-libro alang sa matuod nga relihiyon, dili sa bakak.

Bisan mahitungod sa matuod nga relihiyon, ang Bibliya wala magtug-an kanato sa tanan. Kini naghatag kanato ug igong impormasyon sa pag-ila sa matuod nga relihiyon nga malamposon, apan usahay may mga detalye nga wala hisgoti niini. Samtang kining maong mga detalye hayan makapadani ug makaiikag nga mahibaloan, sa pagkakaron kini dili importante.

Lain pa, ang Bibliya adunay mga kal-ang sa panahon. Pananglitan, kini nagpakahilom kon unsay nahitabo sa kapin sa 400 ka tuig nga kal-ang tali sa panahon human nga natapos ang Hebreohanong Kasulatan, nga kumong gitawag nga Daang Testamento, ug sa pagtungha ni Jesus. Ug sanglit kay ang Bibliya nakompleto, halos mga 1,900 ka tuig na ang milabay.

Busa sa kinadak-ang bahin sa ika-18ng siglo, kita walay dinasig nga kasulatan mahitungod sa Kristiyanidad. Kini ang hinungdan sa pagkawalay-katinoan bahin sa pipila ka nag-angkong mga Kristohanon, sumala sa gihisgotan ni awtor Renwick. Bisan pa niana, dayag nga sa labing menos adunay pipila ka mga indibiduwal sa kasiglohang milabay ang nagsunod sa unang Kristiyanidad. Hinuon, adunay mga pangutanang wala pa masulbad mahitungod sa mga motibo ug hayan sa katim-os sa pipila ka mga indibiduwal sa mga katuigang nangagi. Unsay ikasulti mahitungod sa pipila ka lider sa Repormasyon? Nianang bahina, unsay ikasulti mahitungod sa mga tawong sama ni Confucius ug Muhammad? Bisan tuod ang relihiyosong mga sistema karon sa tukma mahukman pinaagi sa ilang mga bunga, ang mga indibiduwal—ilabina kon sila dugay nang namatay—sagad dili mahukman sa ingon.

Kon, pananglit, diha sa bag-ong kalibotan sa Diyos, kon kabubut-on man sa Maglalalang nga ipasulat pag-usab ang mga basahon sa kasaysayan—apil niadtong relihiyosong kasaysayan—kini mahimong posible. Tungod kini sa laing katahom sa matuod nga relihiyon—ang pasalig nga ang mga patay pagabanhawon.—Juan 5:28, 29; Buhat 24:15.

Handurawa ang kalipay nga makakuha sa tukmang mga tubag sa atong mga pangutana pinaagi sa pakig-estoryahay sa mga tawong nabanhaw nga aktuwal nga naghimo sa mga butang nga gibasa nato diha sa mga basahon sa kasaysayan. Hunahunaa nga mahibaloan nato ang wala hisgoting mga detalye, sama sa ngalan sa Paraon nga namatay sa Pulang Dagat ug nakasinati sa mga hampak sa Ehipto.

Kon pagasulaton man gani ang maong rekord sa umaabot, kini pagasulaton sa pagpasidungog ug sa walay-kataposang kabayawan sa magtutukod sa matuod nga relihiyon, si Jehova nga Diyos. Bahin niini wala na unyay pangutana pa. Ang pangutanang nagapabilin, hinunoa, mao kini: Atua ka ba unya didto sa pagbasa niini?

Ang Pagdayeg Kulang Pa

Ang walay-kataposang mga katahom sa matuod nga relihiyon dili dali nga makita sama sa mga pulong ni Cowper, nga gikutlo sa sinugdan niining artikuloha, nga daw maoy gipaila. Busa, ang unang isyu sa Zion’s Watch Tower and Herald of Christ’s Presence mihimo sa mosunod nga pahayag mga 110 na ka tuig ang milabay: “Ang kamatuoran, sama sa usa ka ordinaryo gamayng bulak sa kapatagan sa kinabuhi, gilibotan ug halos natuok sa labong nga kasagbotan sa kasaypanan. Kon buot kang makakaplag niana kinahanglang magbantay ka sa kanunay. Kon buot mong makita ang iyang katahom kinahanglang isalikway mo ang kasagbotan sa kasaypanan ug ang mga sampinit sa pagkapanatiko. Kon buot mong mahuptan kini kinahanglang maningkamot ka sa pagkuha niini.”

Ginalaoman nga ang “Umaabot sa Relihiyon Tungod sa Iyang Kagahapon” nakatabang sa among mga magbabasa nga “isalikway ang kasagbotan sa kasaypanan ug ang mga sampinit sa pagkapanatiko” aron bug-os mapabilhan ang walay-kataposang mga katahom sa matuod nga relihiyon.

Apan ang pagpabili kulang pa. Ang Intsek nga sanglitanan maoy tukma: “Ang pagtulon-an nga mosulod sa mga dalunggan apan dili sa kasingkasing nahisamag paniudto nga gikaon diha sa damgo.” Aron atong mabatonan ang kaayohan sa walay-kataposang mga katahom sa matuod nga relihiyon—dili lamang magdamgo niana—hinungdanon nga ang atong mahibaloan makaabot sa atong kasingkasing, dili lamang sa atong mga dalunggan.

Basaha pag-ayo ang kahon nga nag-ulohang “Pag-ila sa Imong Relihiyon Ingong Matuod o Sayop.” Dayon pangutan-a ang imong kaugalingon: ‘Ako ba karon nagauyon kon bahin sa tibuok-kalibotang imperyo sa bakak nga relihiyon, nga husto si Voltaire sa dihang iyang gitawag ang relihiyon nga “ang kaaway sa katawhan”? Kini bang daklit nga pagtan-aw sa kasaysayan sa relihiyon nakatabang kanako sa pag-ila sa matuod nga relihiyon, ug nahibalo ba ako niining kataposang yugto sa tawhanong mga kalihokan kon asa kini makaplagan? Kon mao, buot ba ako nga mahisama sa tawo nga gihubit sa ika-18ng siglong manunulat nga si Joseph Joubert, kinsa “nakakaplag niini nga iyang kalipay ug iyang katungdanan”?’

Hinaot nga kadtong tanang mitubag nga oo sa mga pangutana sa itaas padayong makapahimulos sa pagbasa sa Pagmata! ug sa kauban niini nga mga publikasyon. Gidapit ka namo sa pagsunod sa maalamong tambag nga gitanyag sa gihisgotan sa ibabaw nga Zion’s Watch Tower: “Ayaw pagkatagbaw sa usa lamang ka bulak sa kamatuoran. Kon igo na ang usa wala na untay panginahanglan ug lain pa. Padayon sa pagtigom, pangita pa ug dugang.”

Oo, padayon sa pagtigom, padayon sa pagpangita—pangita pag dugang sa walay-kataposang mga katahom sa matuod nga relihiyon!

[Kahon sa panid 18]

Pag-ila sa Imong Relihiyon Ingong Matuod o Sayop

▪ Ang matuod nga relihiyon nagadasig sa mga magsisimba niini ug dili-mabugto nga bugkos sa gugma ug panaghiusa nga dili maapektohan sa nasodnong mga utlanan. (Juan 13:35) Ang bakak nga relihiyon wala magdasig nianang matanga sa gugma. Hinunoa, sa pagsundog kang Cain, ang iyang mga membro nangadto ug nagapamatay sa usag-usa diha sa internasyonal nga mga gubat.—1 Juan 3:10-12.

▪ Ang matuod nga relihiyon dili mag-apil-apil sa tawhanong mga politika ug naglantaw sa Maglalalang nga maoy mosulbad sa mga suliran sa kalibotan pinaagi sa iyang kagamhanan sa Gingharian. Ang bakak nga relihiyon nagsunod sa panig-ingnan ni Nimrod sa Torre sa Babel. Kini nakiglangkit sa mga politika, nagasalig sa mga diyos sa politika kang kansang mga kalihokan kini nagapanghilabot, ug busa nagpahimutang sa pasukaranan alang sa iyang kaugalingong kalaglagan.—Daniel 2:44; Juan 18:36; Santiago 1:27.

▪ Ang matuod nga relihiyon nagaila kang Jehova ingong matuod nga Diyos, ang bugtong usa nga makaluwas gikan sa pagdaogdaog. Ang bakak nga relihiyon, sama sa gipraktis sa karaang Ehipto ug Gresya, nagpailaila ug daghan sugilambong nga mga diyos diin ang tanan walay bili.—Isaias 42:5; 1 Corinto 8:5, 6.

▪ Ang matuod nga relihiyon nagasaad ug walay kataposang kinabuhi sa kalipay sa yuta. Ang bakak nga relihiyon—pananglitan, ang Buddhismo—naglantaw sa kinabuhi sa yuta nga dili-tilinguhaon ug ingong usa ka butang nga kinahanglang ipahigawas diha sa walay katinoan laing kinabuhi.—Salmo 37:29; Pinadayag 21:3, 4.

▪ Ang matuod nga relihiyon, pinaagi sa iyang balaang basahon, ang Bibliya, nagpatisok sa katawhan ug dili-matarog nga pagtuo; kini naghatag kanilag usa ka seguradong paglaom ug nagpukaw kanila sa mga buhat sa matuod nga gugma sa Diyos ug sa silingan. (2 Timoteo 3:16, 17) Ang bakak nga relihiyon, bisan pa sa iyang balaang mga basahon, sa dakong bahin walay gahom sa paghimo niining mga butanga.—1 Juan 5:3, 4.

▪ Ang matuod nga relihiyon maila pinaagi sa mapainubsanong mga magtatan-aw. Ang bakak nga relihiyon nabantog sa iyang ambisyoso, independente-ug-hunahuna nga mga lider, nga andam motuis sa kamatuoran ug nagapangita sa politikanhon o kalibotanong kaayohan.—Buhat 20:28, 29; 1 Pedro 5:2, 3.

▪ Ang matuod nga relihiyon, ang paagi sa hustong pagpasakop sa Diyos, nagagamit ug espirituwal, dili sa literal, nga espada. Ang bakak nga relihiyon, sa laing bahin, mokompromiso sa matuod nga doktrina, mobungkag sa Kristohanong neyutralidad, ug matinguhaon sa tawhanong mga kalihokan nga labaw kay sa balaang mga intereses.—2 Corinto 10:3-5.

▪ Ang matuod nga relihiyon nakakabig sa mga kasingkasing sa dili-magtutuo sa pagsimba sa matuod nga Diyos. Ang bakak nga relihiyon nakaamot sa klima sa pagkamaduhaduhaon, tigkaugalingog-hunahuna, rasyonalismo, ug sekularismo.—Lucas 1:17; 1 Corinto 14:24, 25.

▪ Ang matuod nga relihiyon, ingon sa gipraktis sa mga Saksi ni Jehova, dugang nagauswag sa espirituwal sukad masukad. Ang bakak nga relihiyon, ang iyang sapot namansahan sa dugo, nag-antos sa espirituwal nga kagutom ug nagkaus-os ang pagpaluyo.—Isaias 65:13, 14.

Unsa ang umaabot sa relihiyon tungod sa iyang kagahapon? Ang bakak nga relihiyon walay umaabot. Biyai siya! (Pinadayag 18:4, 5) Bali sa matuod nga relihiyon. Kini molungtad sa walay-kataposan.