Pagsunod sa Agi sa Albatross

Ang salaag nga albatross, nga bantog sa iyang nagasunod-sa-barko nga paglupad, dugay nang nakalingaw sa mga manlalayag. Ang tres-metros nga bukhad sa pako sa langgam nakaamot sa iyang ambongan, daw-walay hagong katakos sa pagpaanod sa paglupad. Ang dagko itikong mga tudlo sa tiil nagasuportar sa langgam sa dihang kini nagatindog; sa dihang kini nagalupad, sila nagataganag kontrol sa paglupad, nga nagasilbing olisi, samtang molapaw kini sa mubong ikog sa langgam.

Kining langgama, nga kasagarang motimbang ug halos 9 kilos, dunay makapahinganghang paagi sa pagsukad aron molupad. “Ang pagsukad aron molupad sa Albatross maoy susama sa iya sa usa ka ayroplanong makalupad sa dagat. Kini, nga moinat sa iyang liog ug magbukhad sa iyang mga pako, magbugsay sa labing tulin paingon sa hangin pinaagi sa itikong mga tiil niini. Sa dili madugay ang dughan sa langgam mahigawas na sa tubig nga ang mga tiil lamang ang magdagpas sa ibabaw sa tubig. Sa gutlo nga kini anaa sa kahanginan ang Albatross magbaton na usab sa iyang aerodynamic nga porma, nga ang liog giuk-ok ug ang nagsuportar nga mga tiil gialsa.”​—The New Larousse Encyclopedia of Animal Life.

Kining batid sa gubot nga atmospera tali sa mga gihabogon nga 40 ug 60 degrees sa habagatan manalag sa nahilaing mga isla. Gikan didto kini mangitag pagkaon sa lagyong mga distansiya. Apan unsa ka layo ang suroyan niini?

Gitaoran sa mga siyentipiko ug gagmitoyng mga transmitter ang unom ka laking laag nga albatross nga nanalag sa habagatan-kasadpang Indian nga Dagat. Pinaagi sa paggamit ug mga satelayt sa pagsunod sa ilang agi, ang mga tigdukiduki nahingangha sa pagkaplag nga ang albatross mibiyaheg tali sa 3,620 ug 15,090 kilometros sa mga katulinon nga halos 80 kilometros matag oras. Sa 33 ka adlaw lamang, kining maong mga langgam sa dagat nakaabot ug 16,000 kilometros, nga mga pito ka beses ang kalayo kay sa gituohan sa nangagi nga posible.

Ang talagsaong katakos sa paglupad sa albatross tinong mopukaw sa pagdayeg alang sa Tigdesinyo niini.​—Salmo 148:10, 13.