Gikan sa Among mga Magbabasa

TV Salamat kaninyo tungod sa seryeng “Telebisyon​—Ang Kahon nga Nag-usab sa Kalibotan.” (Mayo 22, 1991) Sa kanunay ako may problema sa TV; wala akoy pagkadisidido sa pagpalong niini. Nakatabang ang inyong mga sugyot. Bantayan nako kon pila ka oras ang pagtan-aw nakog telebisyon. Gibutang nako usab ang akong TV sa sudlanan ug sinina aron nga kon buot nakong motan-aw, matimbang ko una ang mga bentaha ug mga kadaotan sa pagbuhat niana. Salamat pag-usab.

W. H., Tinipong Bansa

Mga Tem sa Tunghaan Bag-o ko pang nahuman ang pagbasa sa artikulong “Mga Batan-on Nangutana . . . Angay ba nga Moanib Ako sa Tem sa Tunghaan?” (Hunyo 22, 1991) Ginadani ako sa akong mga isigkaingon sa pag-apil sa tem sa tunghaan kay nahibalo man sila nga gusto kog mga dula. Salamat kaninyo, makapatin-aw na ako karon kon nganong dili ko kana mahimo.

D. K., Tinipong Bansa

Pag-usab Kon Unsa Ka Buot ko nga pasalamatan kamo gikan sa kahiladman sa akong kasingkasing tungod sa ekselenteng mga sugyot nga gihatag sa seryeng “Angay ba Nimong Usbon Kon Unsa Ka?” (Hulyo 8, 1991) Nakaamgo ako nga kinahanglan nga himoon ko ang pila ka kausaban sa akong personalidad, apan wala akoy panukmod sa pagbuhat niana. Gipaningkamotan ko karon ang pagpadapat sa tambag nga inyong gihatag, ug nakaplagan ko na nga mapuslanon kaayo kini.

S. C., Italya

Sa pagkagawas sa sikyatrikong lawak sa usa ka ospital, gibasa nako ang mga artikulo bahin sa ‘pag-usob.’ Paghisgot sa pagpasabot! Mikabat ug mga 30 anyos aron ako makasabot nga ako dunay seryosong depekto sa panggawi. Nasabtan ko karon kon unsa gayod ako, ug karon nga nahibalo na ako sa akong problema, makahimo na akog positibong mga lakang sa pagpugong sa akong kaugalingon.

J. D., Tinipong Bansa

Ang mga Baga Ako 13-anyos. Ako mahinumdom nga natun-an ang bahin sa mga baga sa kinto grado, apan nalimtan nako ang kadaghanan sa impormasyon. Ang inyong artikulong “Ang mga Baga​—Usa ka Kahibulongang Desinyo” (Hunyo 8, 1991) nagpalab-as sa akong memorya. Maayo kaayo kadto nga pagkasulat, ug ang diagrama tukma kaayo. Salamat kaayo tungod sa mga artikulong sama niana nga nakatabang sa pagpalalom sa atong pagpabili sa kahibulongang kalalangan ni Jehova.

A. M., Tinipong Bansa

TMJ Syndrome Ang artikulong “Gikan sa Apapangig​—Ang Dakong Impostor” (Hunyo 22, 1991) nakapaikag sa linain kanako, sanglit ako usa ka oral-maxillofacial nga siruhano ug nagtambal sa mga sulirang TMJ sulod na sa kapin ug 14 anyos. Inyong giingon nga ang labing kasagarang hinungdan sa TMJ nga mga sakit mao ang malocclusion, nga mao, ang pagsuhi sa ibabaw ug ubos nga mga ngipon. Ang bag-ong medikal nga basahon ug akong kasinatian mismo nagpadayag nga bisan tuod ang panagtak-op sa ngipon dunay usa ka bahin diha sa pila ka pasyente, dili kini ang dakong hinungdan. Ang kadaghanang pasyente dunay aktuwal sulod nga pagkadaot sulod sa sumpay sa apapangig mismo. Ang ubang hinungdan daw nalangkit, sama sa mga suliran sa taludtod. Ang dili-operasyon nga mga pamaagi sama sa physical therapy ug mga kiropratik nga pagtambal sa ingon mahimong epektibo sa paghupay sa mga reklamo sa pasyente. Ang mga pasyenteng may TMJ syndrome angay magpalandong usab sa paglimite sa ilang pagkaon sa humok nga mga pagkaon. Ang dili pagpabug-at sa ilang kaunoran ug mga sumpay sa apapangig mahimong mosangpot sa pag-arang-arang sa ilang mga simtoma. Apan alang sa kinabag-an sa mga pasyente, walay matuod nga tambal​—ang bugtong matuod nga tambal moabot ubos sa Gingharian sa Diyos.

C. A., D.M.D., Tinipong Bansa

Salamat niining dugang impormasyon, nga sinuportahan sa imong laktud nga kasinatian. Gipabilhan namo kining dugang mga obserbasyon.​—ED.

Pagtapos sa Imong Gisugdan Sa gibasa ko ang artikulong “Mga Batan-on Nangutana . . . ‘Nganong Dili Ako Makahuman Kon Unsay Akong Sugdan?’” (Septiyembre 8, 1991), abi nakog kamo nagsulat mahitungod kanako. Sa tabang sa inyong artikulo ug sa tabang ni Jehova, ako nang matapos ang akong pagasugdan. Salamat kaayo sa inyong tukma-panahon nga impormasyon.

A. P., Tinipong Bansa