Karnabal sa Niyebe ug Yelo sa Sapporo

Pinaagi sa koresponsal sa Pagmata! sa Hapon

SA HATAAS nga mga bulan sa tingtugnaw, ang Sapporo, usa ka dakbayan sa amihanan sa Hapon, matabonan sa niyebe. Sulod sa lima hangtod unom ka bulan sa tuig, wala kaayoy mahimo ang mga molupyo sa paglulinghayaw hangtod ang mga opisyales sa dakbayan mihisgot sa kahimtang aron mangitag sulbad ug nakaideya: usa ka karnabal sa niyebe nga magpasundayag sa dagkong mga estatwa nga gama sa niyebe.

Niadtong 1950, ang mga estudyante sa hayskul gitabangan sa paghimog unom ka estatwa, nga gikan sa 3 hangtod 4 metros ang gihabogon. Mga 50,000 ka tawo ang nangadto sa pagtan-aw sa gamag yelo nga “Venus de Milo” ug ubang mga estatwa. Ang Yuki Matsuri, o Karnabal sa Niyebe, maayong pagkasugod.

Latas sa katuigan ang karnabal nagkadako ug nagkapopular. Karon kada tuig, mga duha ka milyong turista, lakip ang daghan gikan sa langyawng mga nasod, manganha aron motan-aw uban sa dakong kahibulong sa gatosang linilok nga yelo ug niyebe. Kining pito ka adlaw dili-relihiyosong talagsaong okasyon sa tingtugnaw nahimong kinadak-an sa maong karnabal sa tibuok Hapon.

Pagsuroy sa Karnabal

Sa tulo ka dapit sa kalingawan, ang Ōdori Park mao ang kinadak-an. Kining kanhi labayanan ug niyebe may gidak-ong 11 ka dakbayanong bloke latas sa sentro sa Sapporo. Dinhi ug sa Makomanai, sa unahan, makit-an ang nindot dagkong mga linilok. Ang mga bata mahingangha sa dako-pa-sa-tawo nga estatwa sa paborito nilang mga karakter sa telebisyon ug mga komiks. Dihay kahibulongan sa kapanahonan-sa-wanang nga si Ultraman nga gustong sundogon sa gagmayng mga batang lalaki. Ug sa duol mao si Chibi Maruko-chan kauban sa iyang mga higala, mga bata nga gidula diha sa popular nga kartuning sa telebisyon.

Ang mga hamtong usab nahingangha. Usa ka talagsaon maayong-pagkahimo nga Paris Opera House, nga kompleto sa maampingong pagkalilok nga mga bungbong ug bisan mga estatwa sa mga musikero sa atop, makadanig pagtagad. Dihay karaang German Diet House, usa ka estilo-baroco nga tinukod nga gamag yelo. Ang dako kaayong Arabianhong Kastilyo nga nagpasundayag kang Aladdin ug sa iyang ‘madyik nga lamparahan’ daling mailhan.

Nga daw giawngan sa mas dagkong mga eskultura mao ang mga linilok sa Citizens Square, nga daghan niini nagdalag espesyal nga mensahe. Usa ka linilok sa Brandenburg Gate mibarog ingong pahinumdom sa bag-ohay pa lamang nga panaghiusa sa Alemanya. Ang pila ka linilok mipasibaw sa kabalaka alang sa yuta, sa ekolohiya niini, ug sa mga hayop.

Sa tumoy sa Ōdori Park atong makit-an ang International Square diin ang mga bahan gikan sa daghang nasod nag-indigay sa usag usa. Ang pila sa mga eskultor maoy mga propesyonal nga kasagarang naggamit sa marmol, bato, ug ubang materyales. Ang kada usa gihatagag gipagahing niyebe nga tulo-ka-metro kubiko ug tulo ka adlaw sa paggama sa ilang mga igsasalmot.

Apan sa unsang paagi gihimo ang dagkong mga eskultura, ug sa unsang paagi ang mga eskultor makahimo sa katingad-anang katukma sa mga detalye?

Kon Giunsa Paghimo ang mga Eskultura nga Niyebe

Ang paghimo sa maong mga higante dili sayon. Sa usa ka proyekto, ang aktuwal nga pagtukod mahimong abtag usa ka bulan, nga maglakip sa kapin sa 1,500 ka kasagarang adlaw sa trabaho. Usa ka dakong gisalmot maoy hulad sa Flinders Street Station, Melbourne, Australia. Ang sukod niini maoy 35 metros ang gitas-on por 35 metros ang gilapdon por 15 metros ang gihabogon. Nagkinahanglan kinig 1,400 ka taglima ka tonelada nga kargada aron mahakot ang 7,000 ka toneladang niyebe nga gigamit niana. Dili ikahibulong nga sukad niadtong 1955 ang kinadak-an sa trabaho sa paghimog dagkong mga eskultura gihimo sa kasundalohang Hapones, nga dinuyogan sa ulahi sa mga rekluta sa bombero. Atong tan-awon kon giunsa nila pagtukod ang maong dagkong arte sa niyebe.

Una, kinahanglang mopili ug tema. Ang impormasyon ug mga hulagway tigomon. Pinasikad niini, himoon ang mga hularan nga gamag yutang kolonon, papier-mâché, o ubang mga materyales. Unya, mga usa ka bulan una pa sa karnabal, hiposon na ug hakoton ang hinlong niyebe ngadto sa dapit nga tukoranan. Didto idiskarga kini, bagtokon ngadto sa usa ka dakong bayanang kahoy ug pagahion pinaagig tubig. Unya kuhaon ang bayanan, magtukod ug dalamba, ug sugdan ang kuging paglilok.

Sagad magtrabaho sa tibuok gabii sa dihang ang temperatura ubos pa kay sa katugnaw sa yelo, ang mga trabahante mogamit ug mga atsa ug mga pala alang sa pasiunang trabaho ug sa mas gagmayng mga hiraminta alang sa pinong mga korte.

Ang mga indibiduwal ug gagmayng mga grupo mahimong moapil sa kalingawan. Mga un-tersiya sa gatos-gatos ka aplikante sa tibuok nasod nga mapili pinaagig ripa ang hatagan sa mga lagda gikan sa usa ka espesyal nga bahan sa mga eksperto. Ang matag aplikante hatagan ug pinagahing niyebe nga duha-ka-metro kubiko ug lima ka adlaw aron humanon ang iyang mugna.

Makabibihag nga mga Talan-awon

Ang lunlon-yelo nga mga linilok nagdugang pa ug laing nindot nga bahin sa karnabal. Kadaghanan niini gigama sa mga membro sa Ice Carvers Union. Kadaghanan maoy mga maestro-kusinero gikan sa ilado-kaayong mga hotel nga kasagarang magpasundayag sa ilang mga kalaki diha sa mga lawak kombirahan. Ikag silang moadto sa Sapporo, ug makalilipay ang mga resulta.

Ang mga pasundayag sa musika ug mga talan-awon nagdugang sa kasadya. May mga bangga, nagamartsang mga banda, sayaw, acrobatic ski jumping, ug daghan pa. Ang mga bata nalipay usab tungod sa daghang mga dailosanang yelo, nga gitagana alang sa ilang kalingawan ug gitukod mismo diha sa mga linilok.

Ang kagabhion maoy ilabinang maayong panahon aron tan-awon ang karnabal. Tinagpulo ka libong gagming nga bombilyang puti nga gibitay sa upaw nga mga sanga sa kahoy diha sa parke, uban sa daghang buloknong mga suga nga nagbanaag sa nagasidlaksidlak nga mga estatwa, nakapahinabog madanihong talan-awon sa kahayag ug kolor diha sa malamatong yuta sa tingniyebe. Human makakita sa karnabal, makadayeg ka sa mahimong malampos sa hinatag-sa-Diyos sa tawo nga mamugnaong hunahuna ug hanas nga mga kamot.

[Mga hulagway sa panid 23]

Ang dagko kaayong mga eskultura sama sa usa sa ubos tingali may gilapdong 35 metros ug gihabogong 15 metros, nga nagkinahanglag 7,000 ka toneladang niyebe aron matukod