Ang Hunahuna sa Bibliya

Tinuod ba ang mga Demonyo?

PANAHON sa ika-17 ug ika-18ng mga siglo, usa ka nagkaguliyang nga kampanya sa paglutos batok sa mga abat ang kusog nga mikuyanap sa kadaghanang dapit sa Uropa. Ang daghang gituohang mga abat grabeng gisakit. Ang ubang sayop nga gisumbong miangkon nga nangabat aron makalingkawas sa pagsakit. Daghan ang gipamatay pinasikad lamang sa mga hulungihong o katahap.

Bisag daw gipasukad sa Kasulatan, kining mga aksiyona batok sa pangabat, usa ka matang sa demonismo, maoy tinong pagkapanatiko. Ang mga Kristohanon wala hatagig obligasyon sa pagsakit o pagpamatay sa mga abat o kang bisan kinsang nagabuhat sa espiritismo. (Roma 12:19) Unsay nagalungtad nga tinamdan karong adlawa?

Usa ka Relaks nga Tinamdan

Kadaghanan sa mga tawo sa Kakristiyanohan karong adlawa wala maghunahuna nga usa ka seryosong butang ang pag-apil sa espiritistikanhong mga buhat. Tungod sa pagkamausisaon, ang uban magduladula sa astrolohiya, salamangka, panagna, ug pangabat, apan wala nila lantawa kini nga mga buhat sa okulto ingong demonismo. Usahay, ang mga maglilingaw, mga sikat nga mga tawo sa esport, ug mga politiko dayag nga moangkon sa ilang kalangkitan sa okulto. Ang ubang mga libro ug mga salida sa sine nagpasundayag sa mga abat ug mga barangan ingong “madanihon, daw talagsaong mga tawo kansang labaw sa kinaiyanhong mga kalihokan dili makahatag ug kadaot kang bisan kinsa,” nag-ingon ang usa ka ensiklopedia. Ang materyal nga gidisenyo sa paglingaw ug pag-edukar sa mga bata lagmit nagpasiugda sa mga tema sa okulto.

Ang maong relaks ug kaswal nga tinamdan ngadto sa demonismo mahimong motultol sa dili pagtuo nga naglungtad ang mga demonyo. Nagtuo ka ba nga naglungtad ang mga demonyo ug aktibong naningkamot sa pagdaot kanato? Kon buot sabton, kadaghanan sa mga tawo karong adlawa moingon nga wala pa gayod sila makasinati sa pagpakigkontak sa mga demonyo o nakasaksi sa ilang kalihokan. Tinuod ba ang mga demonyo?

Ang Kawalay-Pagtuo Naghatag ug Suliran

Kadtong nag-angkon nga modawat sa Bibliya apan nagduhaduha sa katinuoran sa mga demonyo adunay suliran. Kon dili sila motuo nga ang mga demonyo naglungtad, sila nagpakitag usa ka sukod sa kawalay-pagtuo sa Bibliya. Ngano? Tungod kay ang ideya mahitungod sa daotang espiritung mga nilalang nga may labaw-tawhanong mga gahom gitudlo sa Pulong sa Diyos, ang Bibliya.

Ang unang basahon niini, ang Genesis, nag-asoy kon sa unsang paagi ang usa ka intelihenteng linalang migamit sa usa ka serpente sa paglimbong kang Eva ug paghaylo kaniya nga morebelde batok sa Diyos. (Genesis 3:​1-5) Ang kataposang basahon sa Bibliya, ang Pinadayag, nagpaila niining daotang tiglingla, “ang orihinal nga serpente,” ingong “ang usa nga gitawag Yawa ug Satanas, kinsa nagapahisalaag sa tibuok gipuy-ang yuta.” (Pinadayag 12:9) Milampos si Satanas sa paghaylo sa ubang mga manulonda sa pagrebelde. (Judas 6) Sa Bibliya kining gitambog nga mga manulonda gitawag nga mga demonyo. Sila nagalihok palibot sa yuta ug suko pag-ayo sa Diyos ug niadtong kinsa nag-alagad kaniya.​—Pinadayag 12:12.

Si Satanas ug ang mga demonyo may gahom sa pag-impluwensiya, pagdaot, ug pagpakigsulti sa mga tawo. (Lucas 8:​27-33) Ilang gitun-an ang tawhanong kinaiyahan sulod sa linibo ka tuig. Nahibalo sila kon unsaon pagpahimulos sa mga kahuyangan sa tawo. Ang Bibliya nagtaho sa mga kaso diin ilang gisudlan, o bug-os nga gikontrolar, ang mga lalaki, babaye, ug mga bata. (Mateo 15:​22; Marcos 5:2) Sila makapahinabog sakit o pisikal nga mga kadaot sama sa pagkabuta. (Job 2:​6, 7; Mateo 9:​32, 33; 12:​22; 17:​14-18) Mahimo usab nilang butaan ang mga hunahuna sa mga tawo. (2 Corinto 4:4) Ang mga demonyo padayong aktibo, sama sa ilang pangulo, si Satanas, nga sama sa “usa ka leyong nagangulob, nga nagapangita sa iyang matukob.” (1 Pedro 5:8) Ang Bibliya nasudlan sa daghang mga asoy sa paglungtad sa mga demonyo. Kon nagtuo ka sa Bibliya, nan dawaton nimo ang katinuoran sa dili makitang daotang mga nilalang.

Daotang mga Maglilimbong

Apan sa unsang paagi ang gamhanang mga demonyo naglungtad karong adlawa nga dili makamugnag padayong kahimtang sa kalisang sa kalibotan? Nganong ang ilang presensiya ug mga buhat dili man kaayo dayag? Ang Bibliya nagtubag: “Si Satanas mismo kanunayng nagahimo sa iyang kaugalingon nga usa ka anghel sa kahayag.” (2 Corinto 11:14) Ang Yawa usa ka maglilimbong. Ang kalihokan sa demonyo sagad nagtakoban ingong butang nga dili makadaot o makaayo pa gani. Busa, kini lisod ilhon.

Si Satanas ug iyang mga demonyo padayong nagsakit sa mga tawo sa lainlaing mga paagi, sama sa ilang gibuhat sa kapanahonan sa Bibliya. Ang pipila nga karon tinuod na nga mga Kristohanon kaniadto nalangkit sa okulto; sila makapamatuod sa mga kalisang sa mga pag-atake sa demonyo. Karong adlawa, lagmit sa usa ka mas dakong sukod sukad masukad, ang mga demonyo nagagamit sa ilang labaw-tawhanong mga gahom sa paghaylo sa mga tawo ngadto sa dayag nga mga buhat sa okulto. Ang ilang gahom kinahanglang dili pakamenoson. Apan, mas labaw sila nga molampos pinaagi sa pagdani sa mga tawo nga mahilayo sa Diyos kay sa paghadlok kanila. Si Satanas ug ang mga demonyo “nagapahisalaag sa tibuok gipuy-ang yuta,” nag-ingon ang Bibliya. (Pinadayag 12:9) Nagtinguha sila sa pagpaluya sa espirituwalidad sa malipatlipaton, malimbongong mga paagi.

Tinuod ang mga demonyo. Sa unsa pang paagi ikapatin-aw ang dili-matagbaw nga kauhaw sa dugo ug kalaglagan nga dayag kaayo taliwala sa mga tawo karong adlawa? Kinaiyanhon sa mga tawo nga gustong magkinabuhi sa kalinaw ug kalipay. Apan ang mga demonyo nagapasiugdag pagkadaotan ug adunay gahom sa pag-impluwensiya ug paghugaw sa hunahuna sa tawo.

Bisan pa, si Jehova mao ang labing gamhanan nga Diyos​—mas gamhanan kay sa mga demonyo. Nagtanyag siya sa iyang kusog ug proteksiyon batok “sa mga malipatlipatong kaugdahan sa Yawa.” (Efeso 6:​11-18) Dili kita angayng mahadlok sa mga demonyo, kay ang Diyos nagsaad: “Busa, magpasakop kamo sa Diyos; apan sukli ang Yawa, ug siya mokalagiw gikan kaninyo.”​—Santiago 4:7.

[Picture Credit Line sa panid 18]

Sipa Icono