Ang Hunahuna sa Bibliya

Unsa ka Hinungdanon ang Tuig 2000?

WALA gayod hatagig relihiyosong kahulogan sa kadaghanang tawo sa mga nasod sa Kasadpan ingon man usab sa daghan pang ubang nasod kon unsa unya ang tuig 2000. Pananglitan, ang mga Hudiyo, Muslim, ug Hindu ngatanan may ilang kaugalingong relihiyosong kalendaryo nga dili motakdo sa kalendaryo sa Kasadpan. Alang sa relihiyoso ug tradisyonal nga mga petsa, ang mga Intsik nagsunod sa lunar nga kalendaryo. Busa, binilyong katawhan karong adlawa, tingali ang kinabag-an sa populasyon sa kalibotan, wala maghatag ug espesyal nga kahulogan sa tuig 2000.a

Sa gihapon, ilabina sa mga nasod sa Kasadpan, daghan ang mausisaong nagpaabot sa nagkaduol nga pagsugod sa sunod nga milenyo ingon sa gitiman-an sa Gregorianhong kalendaryo. Alang sa pipila kini dili lamang pagkamausisaon. Gilantaw nila ang tuig 2000 ingong pagsugod sa usa ka bag-ong panahon, usa ka hinungdanong bahin sa kasaysayan. Daghan nga nangangkong nagtuo sa Bibliya naglangkit sa katumanan sa mga tagna sa tuig 2000. Gidahom sa uban ang espirituwal nga kapadayagan nga may dakong gilapdon. Ang uban nahadlok sa dakong katalagman​—ang kataposan sa kalibotan. Nagtagana ba ang Bibliya ug bisan unsang pasukaranan alang niini nga mga pagdahom?

Si Jehova, ang Magtatakna

Ang Diyos sa Bibliya gibatbat ingong “ang Karaan sa mga Adlaw.” (Daniel 7:9) Siya nagkontrolar sa panahon nga may hingpit nga pagkatukma, ingon sa dayag nga pag-obra sa daghan sa iyang mga linalang, gikan sa pagtuyok sa mga planeta ngadto sa paglihok sa sub-atomikong mga partikulo. Aduna siyay kaugalingong orasan nga niana nagsunod siya nga may pagkatukma. “Iyang gimando ang tinudlong mga panahon ug ang tinino na nga mga kinutbanan sa mga puy-anan sa mga tawo,” nag-ingon ang Bibliya. (Buhat 17:26) Si Jehova maoy usa ka tukmang Magtatakna.

Busa, ang Bibliya naghatag ug espesipikong pagtagad sa kronolohiya. Nagtagana kinig padayong rekord nga nagtugot sa mapaagihong pag-ihap ug balik sa sinugdan sa tawhanong kasaysayan. Ang maong pagkalkulo nagpunting ngadto sa 4026 W.K.P. ingong tuig nga gilalang sa Diyos si Adan. Mga 2,000 ka tuig sa ulahi, natawo si Abraham. Laing 2,000 ka tuig ang milabay sa panahon sa pagkahimugso ni Jesus.

Ang ubang nagtuon sa kronolohiya sa Bibliya nakahimog binuotbuot nga sistema sa pagkuwenta nga nagpunting sa espesipikong mga petsa sa umaabot. Pananglitan, ginamit ingong pasukaranan ang sunodsunod nga mga yugto sa mga 2,000 ka tuig nga nagbulag kang Adan, Abraham, ug Jesus, ang pipila nakapangagpas sa matilimad-onong hitabo sa kataposan sa 2,000-tuig nga yugto sukad sa pagkatawo ni Jesus. Usa lang kini sa ubay-ubayng sistema sa pagkalkulo sa panahon nga gibase kono diha sa kronolohiya sa Bibliya.

Tugotan ta, ang Bibliya naghisgot bahin sa panahon sa dihang si Jehova nga Diyos mosanta sa tawhanong mga kalihokan pinaagi sa pagwagtang sa pagkadaotan ug sa pagsugod sa usa ka bag-ong kalibotan. Ang tagna sa Bibliya naghisgot bahin “sa panahon sa kataposan,” “sa katiklopan sa sistema sa mga butang,” “sa kataposang mga adlaw,” ug “sa adlaw ni Jehova.” (Daniel 8:​17; Mateo 24:​3; 2 Timoteo 3:​1; 2 Pedro 3:12) Bisan pa niana, ang “kataposan” nga gitagna sa Bibliya walay kalabotan sa bisan unsang paagi sa tuig 2000. Walay gipaila sa Kasulatan nga naghisgot ug espesyal nga kahulogan sa kataposan sa ikaduhang milenyo sumala sa gikalkulo sa Gregorianhong kalendaryo.

“Kanus-a man Kining mga Butanga Mahitabo?”

Ang mga apostol ni Jesus nagpakitag maidlot nga interes sa orasan sa Diyos sa dihang gipangutana nila si Jesus: “Sultihi kami, kanus-a man kining mga butanga mahitabo, ug unsa man unya ang ilhanan sa imong pagkaanaa ug sa katiklopan sa sistema sa mga butang?” (Mateo 24:3) Daghan karon ang adunay susamang kamausisaon bahin sa umaabot. Natural lamang nga magmaikagon pag-ayo nianang hinungdanong mga tagna sa Bibliya ug sa panahon sa katumanan niana. Ugaling, maalamong dawaton ug tahoron ang baroganan sa Diyos bahin niini.

Pinaagi sa iyang Anak, gibutyag ni Jehova ang iyang intensiyon ug naghatag ug direktang tubag niining isyuha. Wala magdugay sa wala pa mosaka si Jesus sa langit, ang iyang mga tinun-an nangutana kaniya pag-usab bahin sa panahon sa katumanan sa mga saad sa Diyos. Si Jesus mitubag: “Dili inyoha ang pagbatog kahibalo sa mga panahon o mga yugto sa panahon nga gikabutang sa Amahan sa iyang kaugalingong kamandoan.” (Buhat 1:7) Sa mas una pa nga okasyon, gisultihan ni Jesus ang iyang mga tinun-an: “Mahitungod niana nga adlaw ug takna walay nahibalo, ni ang mga anghel sa kalangitan ni ang Anak, gawas sa Amahan lamang.”​—Mateo 24:36.

Tin-aw, ang “kahibalo sa mga panahon o mga yugto sa panahon,” ilabina kon bahin sa umaabot nga katumanan sa mga tagna sa Bibliya, dili ubos sa kamandoan sa tawo. Gipili sa Diyos nga dili ibutyag ang maong impormasyon kanato. (Mateo 24:​22-44) Kita ba makaapektar sa bisan unsang paagi sa katuyoan sa Diyos pinaagi sa pagpanaghap “niana nga adlaw ug takna” sa atong kaugalingon, batok sa iyang mga kagustohan? Dayag, kini gayod imposible. (Numeros 23:​19; Roma 11:​33, 34) Ang Bibliya nag-ingon: “Hangtod sa panahong walay kataposan magapadayon ang mismong tambag ni Jehova.” (Salmo 33:11) Tungod kay labing gamhanang Diyos, siya kanunay nga magmalamposon.​—Isaias 55:​8-11.

Bisan pa sa gahom sa Diyos aron huptan ang “kahibalo sa mga panahon o mga yugto sa panahon . . . sa iyang kaugalingong kamandoan,” daghan ang gusto gihapong mangagpas. Ang pipila nahimong tinudlo sa kaugalingong mga manalagna sa kalaglagan. Tungod niini nga katarongan si apostol Pablo mihatag ug espesipikong instruksiyon ngadto sa mga taga-Tesalonica bahin sa kapeligrohan sa pagpamati niadtong kinsa nangagpas sa mga petsa. Siya misulat: “Kami nagahangyo kaninyo nga dili daling matay-og sa inyong pangatarongan ni maukyab man pinaagi sa usa ka inspiradong pahayag o pinaagi sa usa ka binaba nga mensahe o pinaagi sa usa ka sulat nga daw gikan kanamo, nga sa diwang ang adlaw ni Jehova ania na. Ayaw tugoting may modaldal kaninyo sa bisan unsa mang paagi.”​—2 Tesalonica 2:​1-3.

Hugot nga gituohan sa mga Saksi ni Jehova nga ang mga katuyoan sa Diyos alang sa umaabot tinong matuman sa iyang natudlo nang daan nga panahon, sa mismong adlaw ug oras nga gitudlo niya. (Habacuc 2:​3; 2 Pedro 3:​9, 10) Ug nagtuo kita nga kining mga hitaboa mahitabo sa duol nang umaabot. (2 Timoteo 3:​1-5) Hinunoa, dili kita mangagpas o mopaluyo sa mga teoriya nga nagakaylap karong adlawa.b Sa pagkatinuod, dili ang tuig 2000, ni 2001, ni ang bisan unsang ubang umaabot nga panahon nga gilatid sa mga tawo ang nalangkit sa orasan ni Jehova.

[Mga footnote]