Mga Magtutudlo—Nganong Gikinahanglan Nato Sila?

“Mas maayo pa sa usa ka libo ka adlawng pagsigeg tuon ang usa ka adlaw uban sa usa ka maayong magtutudlo.”​—Hapones nga panultihon.

MAY nahinumdoman ka bang magtutudlo nga nakaimpluwensiya pag-ayo kanimo sa tunghaan? O kon estudyante ka pa, duna ka bay paboritong magtutudlo? Kon mao, ngano man?

Ang usa ka maayong magtutudlo magpasilsil ug pagsalig ug maghimo sa pagtuon nga usa ka makalingawng buluhaton. Usa ka 70-anyos nga taga-Inglaterra naghandom sa iyang maestro sa Ingles sa iyang eskuylahan sa Birmingham. “Si G. Clewly nagpaamgo kanako sa mga abilidad nga wala ko mahibaloing ako diayng nabatonan. Ako maulawon ug hilomon, apan gidasig niya ako sa pag-apil sa indigay sa drama sa tunghaan. Sa akong kataposang tuig sa tunghaan, nakadaog ko ug premyo sa drama. Dili gayod unta nako mabuhat kadto kon wala pa ang iyang pagdasig. Ikasubo, wala na nako siya makita sa ulahing mga tuig aron sa pagpasalamat kaniya sa iyang pagkakomitido sa iyang mga estudyante.”

Si Margit, usa ka buotang babaye nga nagpanuigon ug mga 50 anyos, nga taga-Munich, Alemanya, nag-ingon: “Dihay usa ka maestra nga akong paborito. Maayo siyang mopatin-aw sa mas komplikadong mga butang diha sa yanong paagi. Giawhag niya kami sa pagsuknag mga pangutana kon duna kamiy dili masabtan. Siya dili hilomon apan, hinunoa, siya mahigalaon. Mao nga mas makalingaw ang mga klase.”

Si Peter, usa ka Australiano, nahinumdom sa usa ka maestro sa matematika nga, sumala sa iyang giingon, “nakatabang kanamo sa pagsabot sa kapuslanan sa among ginatun-an pinaagi sa paghatag ug praktikal nga mga pananglitan. Sa dihang nagtuon kami ug trigonometry, gipakita niya kanamo kon unsaon pagsukod ang gihabogon sa usa ka bilding bisag dili kana hikapon, pinaagi lamang sa paggamit sa mga prinsipyo sa trigonometry. Nahinumdom ko nga miingon sa akong kaugalingon, ‘Makapahingangha kana! ’”

Si Pauline, nga taga-amihanang Inglaterra, misugid ngadto sa iyang maestro: “Maglisod ako sa matematika.” Nangutana ang maestro: “Gusto ba nimong mouswag? Makatabang ko nimo.” Mipadayon si Pauline: “Sulod sa misunod nga pipila ka bulan, gihatagan niya ako ug ekstrang atensiyon, nga gitabangan pa gani ako human sa klase. Nahibalo ko nga gusto niyang molampos ko​—nga siya may pagtagad. Ang pagkahibalo niini nagtukmod kanakong maningkamot pag-ayo, ug ako miuswag.”

Si Angie, nga taga-Scotland, karon nag-edad ug mga 30 anyos nahinumdom kang G. Graham, ang iyang maestro sa history. “Gihimo niya ang history nga makaiikag! Iyang giasoy ang mga hitabo ingong mga sugilanon ug madasigon gayod bahin sa matag ulohan. Gihimo niya kining tanan nga buhi.” Gihandom usab niya si Gng. Hewitt, ang iyang tigulang nga maestra sa primero grado. “Siya maluloton ug may kahangawa. Usa ka adlaw diha sa klase, duna koy gipangutana niya. Iya kong gikugos. Gipabati niya nako nga may kahangawa gayod siya kanako.”

Si Timothy, nga taga-habagatang Gresya, nagpahayag sa iyang apresasyon. “Mahinumdoman pa nako ang akong maestro sa science. Giusab gayod niya ang akong panglantaw sa kalibotan sa palibot nako ug sa akong kinabuhi. Gihimo niya ang atmospera diha sa klasehanan nga makapahingangha ug makapahibulong. Gisilsil niya kanamo ang tinguha sa pagbaton ug kahibalo ug ang gugma sa pagsabot.”

Si Ramona, nga taga-California, T.B.A., maoy laing pananglitan. Siya misulat: “Ang akong maestra sa hayskul ganahan gayod sa Ingles. Ang iyang kadasig makatakod kaayo! Gihimo niya bisan ang lisod kaayong mga ulohan nga morag sayon ra.”

Si Jane, nga taga-Canada, madasigong naghisgot bahin sa maestro sa physical education nga “tugob sa mga ideya alang sa kalingawan ug pagkat-on. Isuroy mi niya sa gawas ug gitudloan mi sa pag-eski latas sa kabanikanhan ug pagpangisda diha sa nabagtik nga katubigan. Nagluto gani mi ug bannock, usa ka matang sa pan sa mga Indian, ibabaw sa daob nga kami mismo ang naghaling. Kining tanan maoy maanindot kaayong kasinatian alang sa usa ka babaye nga pirmeng naa sa balay nga magsige lag tuon! ”

Si Helen maoy usa ka maulawong babaye nga natawo sa Shanghai ug mieskuyla sa Hong Kong. Siya nahinumdom: “Sa kinto grado duna koy maestro, si G. Chan, kinsa nagtudlog physical education ug painting. Yagpison akog lawas ug dili makamao sa bolibol ug basketbol. Wala ko niya pakaulawi. Padulaon ko niyag badminton ug ubang dula nga mas haom nako. Siya mahunahunaon ug maluloton.

“Mao usab sa painting​—dili sab ko makamaong modibuho ug mga butang o mga tawo. Busa padibuhoon niya akog mga disenyo, diin mas hanas ako. Tungod kay mas bata ako kay sa ubang mga estudyante, gikombinsir ko niya sa pagpabilin sa maong grado ug lain pang tuig. Kadto maoy hinungdanong yugto sa akong pagtungha. Ako nakabaton ug kompiyansa ug miuswag. Mapasalamaton gayod ako kaniya.”

Haing mga magtutudlo ang morag dunay kinadak-ang impluwensiya? Si William Ayers mitubag diha sa iyang librong To Teach​—The Journey of a Teacher: “Ang epektibong pagtudlo labaw sa tanan nagkinahanglag mahunahunaon, may kahangawa nga magtutudlo nga komitido sa kinabuhi sa mga estudyante. . . . Ang maayong pagtudlo dili lang may kalabotan sa espesipikong mga teknik o mga estilo, mga plano o mga lihok. . . . Ang pagtudlo sa panguna may kalabotan sa gugma.” Busa kinsa ang malamposong magtutudlo? Siya miingon: “Ang magtutudlo nga nakatandog sa imong kasingkasing, ang magtutudlo nga nakasabot kanimo o may kahangawa sa imong pagkatawo, ang magtutudlo kansang gugma sa usa ka butang​—musika, matematika, Latin, mga tabanog​—makatakod ug makapalagsik.”

Sa walay duhaduha, daghang magtutudlo ang nakadawat ug mga pahayag sa apresasyon gikan sa mga estudyante ug bisan sa mga ginikanan ug sa ingon nadasig sa pagpadayon sa pagtudlo bisan pa sa mga babag. Ang komon nga tema sa daghan kaayong mga komento mao ang tiunayng interes ug kalulot nga gipakita sa magtutudlo ngadto sa estudyante.

Siyempre, dili tanang magtutudlo ang nagpasundayag ug personal nga interes ngadto sa mga estudyante. Apan, angay usab natong hinumdoman nga ang mga magtutudlo kasagarang nailalom sa daghang pagpit-os nga naglimite sa ilang mahimo alang sa ilang mga estudyante. Motultol kini kanato sa pangutana, Nganong ang mga tawo mopili man nianang lisod nga propesyon?

[Hulagway sa panid 4]

“Ang pagtudlo sa panguna may kalabotan sa gugma”