Ang Hunahuna sa Bibliya

Unsay Pagbati sa Diyos sa Kapintasan?

ANG kapintasan kaylap ug makita sa lainlaing paagi. Gawas pa sa gubat, adunay kapintasan nga nalangkit sa esport, droga, gang, eskuylahan, ug sa trabahoan maingon man diha sa kalingawan. Bisan ang kapintasan sulod sa panimalay morag naandan na lang diha sa daghang pamilya. Pananglitan, ang usa ka di pa dugayng pagtuon nagpaila nga sa Canada 1.2 ka milyong lalaki ug babaye ang mapintasong giatake sa ilang mga kapikas labing menos kas-a sulod sa di pa dugayng lima-ka-tuig nga yugto. Ang laing pagtuon mihinapos nga duolag 50 porsiyento sa mga tigdagmal ug asawa mapintasong nag-abuso usab sa ilang mga anak.

Dayag nga ang maong mga buhat sa kapintasan makapalisang kanimo maingon man sa kadaghanang ubang mga tawo. Apan, ang kapintasan nahimong dakong bahin sa kalingawan karong adlawa. Ang mga tumatan-aw malingaw dili lang sa minaomao nga kapintasan diha sa mga pelikula kondili usab sa gisibya-sa-telebisyon nga mga buhat sa tinuod-kinabuhing pisikal nga pag-atake. Ang boksing ug ubang mapintas nga mga esport maoy paborito diha sa daghang kanasoran. Apan unsay pagbati sa Diyos bahin sa kapintasan?

Usa ka Taas nga Kasaysayan sa Kapintasan

Ang kapintasan adunay taas nga kasaysayan. Ang unang buhat sa pisikal nga kapintasan nga gihimo sa tawo nga narekord sa Bibliya gihubit sa Genesis 4:2-15. Si Cain, ang panganayng anak nga lalaki ni Adan ug Eva, nasina sa iyang igsoon nga si Abel ug tinuyong nagpatay kaniya. Unsay reaksiyon sa Diyos? Ang Bibliya nag-ingon nga gisilotan pag-ayo ni Jehova nga Diyos si Cain tungod kay iyang gipatay ang iyang igsoon.

Sa Genesis 6:​11, atong mabasa nga kapin sa 1,500 ka tuig human sa maong hitabo, ang yuta “napuno sa kapintasan.” Sa makausa pa, unsay reaksiyon sa Diyos? Iyang gisugo ang matarong nga si Noe sa pagtukod ug arka nga maoy magtipig kaniya ug sa iyang pamilya nga luwas samtang ipadangat ni Jehova ang lunop sa yuta, sa ingon ‘maglaglag’ nianang mapintas nga katilingban. (Genesis 6:12-14, 17) Apan unsa may hinungdan nga ang katawhan nakiling pag-ayo sa kapintasan?

Ang Impluwensiya sa mga Demonyo

Ang asoy sa Genesis nagbutyag nga ang mga anak sa Diyos, ang di-masinugtanong mga manulonda, nagmateryalisar ingong mga tawo, nakigminyo sa mga babaye, ug nagpatunghag mga anak. (Genesis 6:1-4) Ang ilang mga anak, nga nailhang Nepilim, maoy mga lalaki nga talagsaon ang gidak-on ug mga bantogan. Ubos sa impluwensiya sa ilang demonyong mga amahan, sila nahimong mapintas nga mga tigdaogdaog. Sa dihang miabot ang lunop ug mitabon sa yuta, kining daotang mga tigdaogdaog nangahanaw. Apan ang mga demonyo dayag nga naghukas sa ilang materyal nga lawas ug mibalik ngadto sa espiritung dominyo.

Gitin-aw sa Bibliya nga sukad niadto, kining rebeldeng mga manulonda nakaimpluwensiya pag-ayo sa mga tawo. (Efeso 6:12) Ang ilang lider, si Satanas, gitawag nga orihinal nga “mamumuno.” (Juan 8:44) Busa, ang kapintasan nga nagakahitabo sa yuta haom nga pagatawgong demonyohanon, o sataniko.

Ang Bibliya nagpasidaan bahin sa madaldalong gahom sa kapintasan. Sa Proverbio 16:​29, kini nag-ingon: “Ang tawong mapintas magadaldal sa iyang isigkaingon, ug magpalakaw gayod kaniya diha sa dalan nga dili maayo.” Karong adlawa daghan ang nadaldal sa pag-uyon, pagpalambo, o paghimo sa mga buhat sa kapintasan. Lain pa, milyonmilyong tawo ang nadani sa pagkalipay sa kalingawan nga nagdayeg sa kapintasan. Ang giingon sa Salmo 73:6 haom nga gamiton sa paghubit sa kaliwatan karon. Ang salmista nag-ingon: “Ang pagkamapahitas-on nagsilbing ilang kulentas; ang kapintasan nagbukot kanila ingon sa usa ka besti.”

Gidumtan sa Diyos ang Kapintasan

Sa unsang paagi angayng mogawi ang mga Kristohanon diha sa mapintas nga kalibotan? Ang asoy sa Bibliya bahin sa mga anak nga lalaki ni Jacob nga si Simeon ug Levi naghatag kanatog maayong giya. Ang ilang igsoong babaye nga si Dina nakighugoyhugoy sa imoral nga mga tawo sa Sekem. Kini miresulta sa paglugos kaniya sa usa ka taga-Sekem. Aron makabalos, way-kokaluoy nga gipamatay ni Simeon ug Levi ang tanang lalaki sa Sekem. Sa ulahi, ubos sa inspirasyon sa Diyos, gitunglo ni Jacob ang way-kontrol nga kasuko sa iyang mga anak nga lalaki pinaagi sa mga pulong: “Si Simeon ug si Levi managsoon. Mga galamiton sa kapintasan ang ilang mga hinagiban sa pagpatay. Sa ilang suod nga pundok ayaw pag-adto, Oh kalag ko. Sa ilang kongregasyon ayaw pagpakighiusa.”​—Genesis 49:​5, 6.

Uyon niining mga pulonga, ang mga Kristohanon maglikay sa pagpakig-uban niadtong nagapalambo o nagabuhat sa kapintasan. Dayag nga gidumtan sa Diyos kadtong nagapalambo sa kapintasan. Ang Bibliya nag-ingon: “Si Jehova magausisa sa matarong ug sa daotan, ug si bisan kinsa nga nahigugma sa kapintasan ginadumtan gayod sa Iyang kalag.” (Salmo 11:5) Gitambagan ang mga Kristohanon sa paglikay sa tanang matang sa way-kontrol nga kasuko, bisan sa binaba nga kapintasan.​—Galacia 5:19-21; Efeso 4:31.

Matapos ba Gayod ang Kapintasan?

Ang karaang manalagna nga si Habacuc nangutana kang Jehova nga Diyos: “Hangtod kanus-a nga ako magpakitabang kanimo tungod sa kapintasan?” (Habacuc 1:2) Tingali nakasukna ka sa susamang pangutana. Gitubag sa Diyos si Habacuc, nga nagsaad nga kuhaon ang “daotan.” (Habacuc 3:13) Ang matagnaong basahon ni Isaias naghatag usab ug paglaom. Didto ang Diyos nagsaad: “Dili na madungog ang kapintasan diha sa imong yuta, pagpangagaw o pagkahugno sulod sa imong mga utlanan.”​—Isaias 60:18.

Masaligon ang mga Saksi ni Jehova nga sa di madugay kuhaon na sa Diyos gikan sa yuta ang tanang matang sa kapintasan ug kadtong nagpalambo niana. Nianang panahona, inay mapuno sa kapintasan, “ang yuta mapuno sa kahibalo sa himaya ni Jehova ingon nga ang katubigan nagatabon sa dagat.”​—Habacuc 2:14.

[Hulagway sa panid 16]

Ang kapintasan nagsugod sa dihang gipatay ni Cain si Abel