Kon Nganong Nagtuo Ako ug Bibliya—Usa ka Nukleyar nga Siyentipiko Nag-asoy sa Iyang Sugilanon

SUMALA SA GIASOY NI ALTON WILLIAMS

SA 1978 duha ka hinungdanong mga okasyon ang nahitabo sa akong kinabuhi. Sa Septiyembre nadawat nako ang akong diploma ingong nuclear physicist, ug sa Disyembre, ako giordinahan ingong ministro sa mga Saksi ni Jehova.

Sa dihang ang mga tawo mahibalo nga siyentipiko ako ug Saksi usab, sila mahibulong gayod kon sa unsang paagi mapatakdo nako ang akong kahibalo sa siyensiya ug ang pagtulon-an sa Bibliya. Tinuod, daghang tuig nga ako nahibulong usab kon ang kahibalo bahin sa siyensiya ug ang pagtuo sa Bibliya magkatakdo. Apan, sa ngadtongadto, ako nakombinsir nga ang Bibliya nahiuyon sa kamatuoran sa siyensiya. Sa unsang paagi nakadangat ako niana nga konklusyon? Palihog paasoya una ako kon sa unsang paagi ako nahimong siyentipiko.

Napulog-Siyam ka Tuig nga Pangagpas

Natawo ako sa 1953 sa Jackson, Mississippi, T.B.A., ang ikatulo sa 11 ka anak. Pobre ang among pamilya. Kami magbalhinbalhin ug balay tungod kay ang akong mga ginikanan dili makabayad sa abang. Ang kadaghanan sa among pagkaon maoy gikan sa programa sa hinabang nga gihatag sa gobyerno, ug ang segunda manong mga besti nga among gisul-ob maoy hinatag sa mga tawo kansang mga balay ug mga opisina ginalimpiyohan ni Mama.

Kami pahinumdoman gayod sa among mga ginikanan nga ang bugtong paagi aron mahaw-as gikan sa kalisod mao ang hataas nga edukasyon. Tungod niini, sa bata pa, naningkamot ako nga makagraduwar sa kolehiyo. Nagsugod ako sa pag-eskuyla sa nag-edad ako ug sayis, ug nagpadayon sa akong pag-eskuyla nga walay undang sulod sa 19 ka tuig. Ako interesado kaayo sa siyensiya ug matematika, busa sa dihang mieskuyla ako sa kolehiyo, gisugdan nako ang karera sa pagkahimong siyentipiko.

Samtang nag-eskuyla sa kolehiyo, nakaila nako ang usa ka batan-ong dalaga nga ginganlag Del. Giingnan siya sa propesor sa siyensiya sa pagduol nako aron si Del matabangan sa kurso sa siyensiya nga iyang gikuha. Apan, sa ngadtongadto, ang among panagkabildohay misaylo pa kay sa siyensiya, ug kami nagkahigugmaay. Kami nagpakasal sa Enero 10, 1974​—sulod sa lak-ang nga duha ka oras nga walay klase! Paglabay sa upat ka tuig, sa 1978, nadawat nako sa kataposan ang akong diploma sa pagkahimong siyentipiko.

Nakab-ot nako kanang akong gituohan nga yawi sa kalamposan. Ako usa na ka siyentipiko​—ug nuclear physicist pa gayod! Uban sa akong bag-ong nakab-ot nga titulo sa theoretical nuclear physics, ako makasugod na sa pag-ani sa bunga sa akong dugayng-natapos nga mga pagtuon. Naghinamhinam ako nga mahimong inila sa natad sa siyensiya. Dugang pa, makapili na ako karon ug trabaho gikan sa daghang dagkog-suweldo nga mga tanyag sa pribadong mga kompaniya ug mga institusyon sa gobyerno.

Apan, paglabay sa pipila ka bulan, sa Disyembre 30, 1978, dihay gihimo nako nga mas nakaimpluwensiya sa akong kinabuhi ug sa umaabot kay sa akong bag-ong nakab-ot nga titulo. Nianang maong petsa, gipasimbolohan nako ang akong pagpahinungod kang Jehova nga Diyos pinaagi sa bawtismo sa tubig ug busa nahimong usa sa mga Saksi ni Jehova. Sa unsang paagi nahitabo kana?

Usa ka Libro nga Nakapukaw sa Akong Interes

Sa ulahing bahin sa 1977, samtang nagtuon ako sa University of Massachusetts sa Amherst, duha ka Saksi nanuktok sa pultahan sa akong apartment. Wala ako diha niadtong higayona, apan didto niadtong tungora ang akong asawa uban sa among mga anak nga tres-anyos ug usa ka bag-ong masuso. Gipasulod ni Del ang mga Saksi. Human sa bibo nga panagkabildohay, siya misugot nga dumalahan siya sa mga Saksi ug pagtuon sa Bibliya kas-a sa usa ka semana.

Sa dihang gisultihan ako sa akong asawa bahin niini, misupak dayon ko. Walay kaso para nako kon gusto siyang moanib ug relihiyon​—apan dili ako gusto nga sa mga Saksi ni Jehova pa siya moanib! Sa pagkatinuod, wala kaayo akoy nahibaloan bahin sa mga Saksi, apan duna akoy daang opinyon nga sila maoy katingad-anang grupo nga naggamit sa Bibliya aron sa paglimbong sa mga tawo. Busa, agig paningkamot aron makagawas ang akong asawa nianang akong gituohan nga impluwensiya sa mga Saksi, nahunahunaan ko nga gamiton nako ang akong kahibalo sa siyensiya aron mapamatud-ang sayop ang ilang mga pagtulon-an.

Sa usa ka semana niana, wala ako motrabaho sa unibersidad ug mipauli aron makaapil sa pagtuon sa Bibliya sa akong asawa. Apan, ulahi ako nga miabot kay sa akong giplano, ug ang babaye nga nagdumala sa pagtuon sa Bibliya talilakaw na. Gihatagan niya ako ug libro nga nag-ulohang Did Man Get Here by Evolution or by Creation?a Dugang pa, iyang giingnan ang akong asawa nga sa eskedyul sa pagtuon sa Bibliya sa sunod semana, ilang hisgotan ang tagna sa Bibliya nga nagpakita nga ang 1914 maoy usa ka hinungdanon kaayong tuig. Mao kanang higayona ang akong gihulat! Akong gisultihan ang Saksi nga moapil unya ako alang sa sunod nga panaghisgot sa Bibliya. Gusto nakong tinoon ang pagkatukma sa matematika nianang iyang pagahisgotan bahin sa tuig 1914.

Nianang gabhiona gisugdan nako pagbasa ang libro nga gibilin sa Saksi. Sa pagkatinuod, nakadayeg kaayo ako sa mga unod niini. Kini gisulat nga subay gayod sa maayong pangatarongan, ug kini nasudlan ug daghang reperensiya gikan sa mga libro sa siyensiya mahitungod sa ulohang ebolusyon. Sa akong katingala, akong nahibaloan nga ang Bibliya naundan ug mas tukmang impormasyon mahitungod sa kalalangan kay sa akong nahibaloan kaniadto. Natapos nako pagbasa ang libro paglabay sa pipila ka adlaw ug nakita nako nga ang gisulti sa Bibliya bahin sa kalalangan wala magkasumpaki sa nahibaloang siyentipikanhong mga kamatuoran bahin sa kinabuhi sa yuta.

Determinado sa Pagpangitag mga Panagsumpaki

Bisan pa niana, nagduhaduha gihapon ako sa mga pagtulon-an sa mga Saksi, ug nagpaabot sa pagtuki sa matematika sa tagna sa Bibliya bahin sa tuig 1914. Sa akong hunahuna motalaw niini ang Saksi ug, nanghinaot nga matabangan ang akong asawa nga makakita sa sayop nga mga pagtulon-an nga gitudlo sa mga Saksi.

Pagkasunod semana ang Saksi mibalik nga giubanan sa usa ka tawo nga usa sa mga ansiyano sa lokal nga kongregasyon sa mga Saksi ni Jehova. Ang ansiyano maoy nagdumala sa pagtuon sa Bibliya. Iyang gipatin-aw ang mga tagna nga makita diha sa mga kapitulo 4 ug 9 sa basahon sa Bibliya nga Daniel, mahitungod sa pagtungha ni Jesus ingong Mesiyas ug Hari. Ang akong hunahuna porsigido sa pagpangitag sayop sa mga pagkuwenta diha sa presentasyon, apan ako walay nakita. Sa kasukwahi, nakadayeg na usab ako sa makataronganong impormasyon nga makita diha sa Bibliya.

Hangtod nianang puntoha, nagtuo ako nga ang pagtuo sa Diyos gibase sa emosyon imbes sa katarongan. Nasayop gayod ako! Gipasalamatan nako ang mga Saksi alang sa impormatibong panaghisgot ug miingon nga gusto kong magpadayon sa pag-apil sa senemana nga pagtuon. Busa sukad niadto, ako nagpadayon sa akong pagtuon sa unibersidad ug, duyog sa akong asawa, sa akong mga pagtuon sa Bibliya uban sa mga Saksi. Dugang pa, ako ug ang akong asawa nagsugod sa pagtambong sa mga miting sa mga Saksi nga ginahimo diha sa Kingdom Hall.

Sulod sa pipila ka bulan, daghan ako ug nakat-onang mga kamatuoran sa Bibliya ug sa ngadtongadto nahimong kuwalipikado sa pagpamalaybalay nga ministeryo uban sa mga Saksi. Gihimo ko kini bisan pag anaa na ako sa kataposang ang-ang sa pagdawat gikan sa unibersidad sa akong diploma sa pagkahimong siyentipiko, nga nakahurot ug dako kaayong bahin sa akong panahon. Natapos nako ang akong thesis sa ting-init sa 1978 ug mibalhin ngadto sa estado sa Alabama, diin nagsugod ako sa pagtudlo ug physics sa Alabama A. & M. University sa Huntsville. Gikontak dayon namo ang mga Saksi diha sa among bag-ong lugar, ug usa ka ansiyano ug iyang asawa ang mipadayon sa pagtuon sa Bibliya uban namo. Paglabay sa pipila ka bulan, ako ug ang akong asawa dungan nga gibawtismohan sa samang adlaw.

Aktibo Ingong Siyentipiko ug Ministro

Para nako, ang pagkasiyentipiko magkasibo sa pagkahimong Saksi ni Jehova. Sa 1983, nagsugod ako sa pagtrabaho ingong astrophysicist sa George C. Marshall Space Flight Center sa NASA (National Aeronautics and Space Administration), nga nahimutang usab sa Huntsville.b Nagtrabaho ako sa pag-eksperimento ug pagtuki sa mga kamatuoran labot sa X-ray nga teleskopyo. (Sa 1999 kanang maong teleskopyo​—ang Chandra X-ray Observatory​—malamposon nga gipalupad ngadto sa orbito sa salakwanang nga Columbia.) Nalingaw kaayo ko sa pagtrabaho niana nga proyekto, nga naglangkit sa pag-analisar sa mga X-ray nga ginabuga sa nagkalainlaing mga bituon ug mga galaksiya sa paningkamot nga mas masabtan pa ang pisikal nga uniberso.

Makalingaw kaayo alang nako ang akong trabaho tungod kay dili lamang nakapanukiduki ako ug malisod kaayong problema sa siyensiya kondili mas nagkalalom ang akong pagpabili sa gahom ug kaalam sa Maglalalang. Sa pagkatinuod, ang mga pulong ni Jehova pinaagi sa karaang manalagnang Isaias mas nahimong makahuloganon kaayo kanako. Ang Maglalalang nag-ingon: “Iyahat ang inyong mga mata sa itaas ug tan-awa. Kinsay naglalang niining mga butanga? Mao ang Usa nga nagpatungha sa ilang panon nga hilabihan ka daghan, siya nagtawag kanilang tanan pinaagi sa ngalan. Gumikan sa kadagaya sa dinamikong kusog, kay siya usab mabaskog sa gahom, walay usa kanila ang nawala.” (Isaias 40:26) Sa sige nakog ‘yahat sa akong mga mata’ aron sa pagtan-aw sa hilabihan kadako, kakomplikado, ug katahom nga uniberso, mas nasabtan nako ang obra sa maalamong Tigdisenyo nga maoy naglalang niining tanan ug nagtukod sa mga balaod nga naghawid niining tanan.

Nianang panahona, okupado ako sa pagpatik ug bag-ong impormasyon diha sa mga basahon sa siyensiya nga gibase sa akong pagpanukiduki sa X-ray astrophysics. Apan, aktibo usab ako sa Kristohanong kongregasyon. Nag-alagad ako ingong ansiyano ug naggugol ug mga 20 ka oras kada bulan sa buluhatong pagsangyaw sa publiko. Kasamtangan, ang akong asawa nakigbahin sa edukasyonal nga buluhaton sa Bibliya sa bug-os panahon.

Human sa pagtrabaho ug upat ka tuig sa NASA, nagkadako ang akong tinguha sa paggugol ug mas dakong panahon sa pagboluntaryo sa pagtabang sa uban nga makakat-on sa maanindot nga mga kamatuoran nga makaplagan diha sa Bibliya. Apan sa unsang paagi mahimo nako kana? Human sa pagpakigsulti sa akong tinguha uban sa akong asawa ug sa pag-ampo kang Jehova bahin niini, akong naamgohan nga kinahanglang maghimo ako ug pipila ka hinungdanong mga desisyon.

Mabug-at nga mga Desisyon

GiduoI nako ang akong superbisor sa NASA ug gisultihan siya nga gusto nakong pakubsan ang akong pagtrabaho kada semana nga lima ka adlaw ngadto sa upat ka adlaw. Siyempre, modawat ako ug menos nga suweldo. Akong gisaysay sa akong superbisor nga gusto nakong igugol ang ubang tulo ka adlaw sa semana sa pag-atiman sa akong ministeryo. Misugot ang akong superbisor, bisan pag kining kahikayana wala pa gayod sukad mahimo sa mga siyentipiko sa NASA. Apan, gisultihan niya ako nga kinahanglang makigsulti ko sa iyang superbisor. Gihimo ko kini ug nalipay kaayo nga sa wala damha misugot usab ang maong taas-ug-ranggo nga superbisor sa akong hangyo. Busa sa Septiyembre 1987, gisugdan nako ang akong karera ingong bug-os-panahong ministro, nga nagagugol ug mga 90 ka oras sa usa ka bulan sa pagpamalaybalay nga pagsangyaw ug sa ubang bahin sa ministeryo.

Dayon, giteleponohan ako sa superbisor sa Alabama A.  & M. University sa Huntsville. Iya akong gitanyagan ug puwesto sa pagtudlo diha sa departamento sa physics. Mitubag ako nga dawaton nako ang trabaho sa kondisyon nga dili ako magapos niini aron mas daghan ako ug panahong magugol alang sa akong ministeryo. Apan, akong gipasaligan siya nga ang akong mga kalihokan sa ministeryo dili makatibhang sa kalidad sa akong trabaho sa pagtudlo sa mga klase. Ang superbisor misugot. Karon, nagtudlo gihapon ako sa maong unibersidad ug nag-alagad usab ingong bug-os-panahong ministro. Nakahigayon pa gani ako sa pagtuon ug Kinatsila. Sa pagkakaron, ako ug ang akong asawa nag-alagad sa Kinatsilag-sinultihan nga kongregasyon sa mga Saksi ni Jehova sa Huntsville.

Siyensiya ug Pagtuo

Sa akong mga tuig sa pagpanukiduki sa siyensiya, wala pa gayod ako makasugat ug panagsumpaki tali sa napamatud-ang kamatuoran sa siyensiya ug sa pagtulon-an sa Bibliya. Kasagaran, ang daw mga panagsumpaki maoy tungod sa kakulang ug kahibalo sa pagtulon-an sa siyensiya o sa kon unsa gayoy gipamulong sa Bibliya. Pananglitan, ang pipila ka mga siyentipiko ug ang uban sayop nga nagtuo nga ang Bibliya nagtudlo nga ang mga tanom, mga hayop, ug mga tawo tanan mitungha sulod sa unom ka literal nga 24-oras nga mga adlaw. Magkasumpaki kini sa nahibaloang mga kamatuoran sa siyensiya. Apan ang Bibliya wala magtudlo niana. Hinunoa, kini nagpadayag nga ang “mga adlaw” sa paglalang gilangkoban ug libolibong tuig.c

May kalibog usab gikan sa sayop nga ideya nga ang pagtuo sa Diyos maoy yanong emosyonal nga pagbati. Sa kasukwahi, ang pagtuo sa Diyos ug sa Bibliya maoy gipasukad sa mga kamatuoran nga mapamatud-an. Sama sa paghubit sa Bibliya, “ang pagtuo mao ang masaligan nga pagpaabot sa mga butang nga gilaoman, ang dayag nga pagpasundayag [o, “makapakombinsir nga pamatuod,”] sa mga katinuoran bisan tuod wala makita.” (Hebreohanon 11:1) Oo, pagtuo nga dunay ebidensiya. Daghan kaayong mga tagna ang nangatuman sa miagi ug sa atong panahon. Busa, bisan ang pagpadapat sa pamaagi nga gigamit sa tanang siyentipiko sa paglig-on sa usa ka teoriya sa siyensiya, kita bug-os nga makasalig sa katumanan sa mga tagna sa Bibliya maylabot sa umaabot nga mga hitabo.

Ang usa niana nga tagna naglakip sa saad nga atong matagamtam ang Paraiso nga mga kahimtang dinhi sa yuta sa haduol nga umaabot. Ang makadaot nga mga epekto sa pagkatigulang, sakit, kamatayon, mga gubat, ug pagkawalay-hustisya mawala na. (Pinadayag 21:​3, 4) Niana unyang panahona kita makabaton ug higayon sa pagsuhid ug pagtuon nga detalyado sa maanindot nga mga kalalangan ni Jehova nga Diyos ug sa daghang balaod nga iyang gilatid sa paggahom niining makapukaw-ug-kataha nga pisikal nga uniberso.

Ako mapasalamaton kang Jehova nga Diyos sa pagtabang kanako sa pagkaplag sa yawi sa tinuod nga kalipay​—ang maanindot kaayong mga kamatuoran nga makita diha sa iyang Pulong, ang Bibliya. Nanghinaot ako nga unta daghan pang uban, lakip sa mga siyentipiko, ang makakita nianang hamili nga yawi.

[Mga footnote]

[Blurb sa panid 20]

Nagtuo ako nga ang pagtuo sa Diyos gibase sa emosyon imbes sa katarongan

[Blurb sa panid 22]

Wala pa gayod ako makasugat ug panagsumpaki tali sa napamatud-ang kamatuoran sa siyensiya ug sa pagtulon-an sa Bibliya

[Hulagway sa panid 21]

Gisuportahan nako ang akong pamilya pinaagi sa partaym nga pagmaestro

[Mga hulagway sa panid 23]

Ang NASA Chandra X-ray Observatory sa orbito ug larawan sa X-ray sa usa ka binary star system black hole

[Credit Lines]

NASA Photo

NASA/CfA/J. McClintock et al.

[Hulagway sa panid 23]

Ako ug ang akong asawa malipayon sa bug-os-panahong ministeryo