Gikan sa Among mga Magbabasa

Bagang Kalasangan Maikagon kaayo kong nagbasa sa inyong serye nga “Kinsay Moluwas sa Bagang Kalasangan?” (Hunyo 22, 2003) Wala ko matingala nga inyong gipasiugda ang bagang kalasangan sa Amerika del Sur. Tungod kay mas grabe man ang kahimtang sa bagang kalasangan sa Aprika ug Asia, labing menos mahimong usbon sa tawo ang iyang tinamdan maylabot nianang sa Amerika del Sur. Naghinamhinam kong nagpaabot sa panahon sa dihang ang Diyos mangilabot na unya ug taposon ang pagpuril sa kalasangan sa atong yuta aron ang iyang kalalangan mapasig-uli ngadto sa orihinal nga katahom niini.

G. R., Switzerland

Daghan kaayong salamat niining maong serye. Taudtaod na kong nanukiduki sa mga ulohan maylabot sa kalikopan, ug ingong resulta, nausab ang akong batasan sa pagpamalit ug pagresiklo. Sakitan kong maghunahuna sa katanoman nga nangahanaw na ug sa mga mananap nga nawad-ag pinuy-anan o gipamatay tungod sa kahakog sa tawo. Ang pagkahibalo nga ang Maglalalang nasayod kon unsay nagakahitabo ug sa dili madugay mohimog mga kausaban nakahatag kanakog kahupayan ug paglaom. Salamat sa pagpatik sa maong maanindot kaayong mga artikulo.

V. T., Canada

Mahiligon ako sa kinaiyahan, ug nabalaka ko bahin sa gidangatan sa bagang kalasangan sulod sa daghang tuig. Nalipay ko sa pagkahibalo nga ang mga Saksi ni Jehova nagtagad diay sa kalalangan sa Diyos. Nahupayan ko sa pagkasayod nga may adlaw ra nga ang bagang kalasangan dili na daoton.

T. H., Tinipong Bansa

Trahedya Salamat sa artikulong “Mga Batan-on Nangutana . . . Sa Unsang Paagi Ako Makasagubang sa Usa ka Trahedya?” (Hunyo 22, 2003) Sa dihang nahuman nakog basa kining artikuloha, gibati nako nga gigiyahan ko ni Jehova mahitungod sa akong problema sulod na sa daghang tuig. Ingong usa ka Kristohanon, nakasabot ko nga kining “kataposang mga adlaw” maoy “lisod sagubangon.” (2 Timoteo 3:1) Bisan pa niana, inigkakita nakog makalilisang nga balita diha sa telebisyon, mahasol ang akong kasingkasing. Maluya gyod ang akong buot​—hangtod sa punto nga mawad-an na kog kusog ug usahay, magpuyo na lang sa balay imbes mosangyaw. Nabalaka ko bahin sa mga butang nga mahimong mahitabo o dili mahitabo sa umaabot. Apan kining artikuloha nakatabang nako sa paghinumdom sa kahinungdanon sa paghupot sa atong espirituwal nga rutina ug sa pagpahayag sa atong kasingkasing kang Jehova ug pagsalig kaniya sa bug-os. Kinasingkasing akong nagpasalamat kaninyo tungod sa inyong mga publikasyon.

E. K., Japan

Sa Enero 2003, ang akong Lolo namatay sa ospital. Kini ang unang panahon nga ako namatyag suod nga paryente. Kining artikuloha nasudlan sa mga tubag sa akong mga pangutana. Ilabinang natandog ang akong kasingkasing sa sub-ulohang “Kon Nganong Nahitabo ang Makapaguol nga mga Butang.” Kini nakatabang kanako sa pagsabot nga ang nahitabo sa akong pamilya maoy tungod sa wala-damhang panghitabo. Wala kini magpasabot nga gipasagdan kami ni Jehova. Human nako mabasa ang maong artikulo, ang kahadlok nga nagpabug-at sa akong kasingkasing nahanaw na.

M. O., Japan

Espirituwal nga Kauhaw Nakahilak ko sa artikulong “Kon sa Unsang Paagi Gitagbaw ang Akong Espirituwal nga Kauhaw.” (Hunyo 22, 2003) Ako gimatuto diha sa usa ka Katolikong panimalay ug nagtungha sa Katolikong eskuylahan sulod sa walo ka tuig. Bisan tuod wala mi magbasa ug Bibliya didto sa eskuylahan o panahon sa Misa, kanunay kong gitamod ang Bibliya ug gibasa ang akong kopya kada gabii. Sama kang Lucia Moussanett, gusto nakong buhaton ang mga butang nga akong nakat-onan sa Bibliya, apan wala ko masayod kon unsaon. Sa dihang nagsugod ko pagtuon sa Bibliya uban sa mga Saksi ni Jehova, ako natagbaw sa espirituwal. Daghan kaayong salamat sa makapatandog nga mga sugilanon nga sama niini!

K. F., Tinipong Bansa