Ang Sea Buckthorn—Kahoy nga Mapuslanon

◼ Kon mosuroy ka sa Rusya sa sayong bahin sa tinghunlak, makakita kag sea buckthorna nga punog gagmayng mga bunga nga orens ug kolor. Imbes magpungpong, ang sanag ug kolor nga mga bunga niini manubo diha sa mga sanga-sanga.

Makaon ang mga bunga niini, apan pagbantay sa hait nga mga tunok kon manguha kag bunga! Kinahanglang tagsa-tagsaon kini pagkuha ug pagbantay nga dili kini mapigsat. Ang sea buckthorn manubo diha sa bugnawng mga dapit, busa kini sagad makita diha sa kabukiran sa amihanan kasadpang Uropa hangtod sa Altai Mountains sa Sentral Asia, ug diha usab sa kasadpan ug amihanang Tsina ug sa amihanang bahin sa Himalayas. Sa daghang katuigan, ang mga bunga niini pinangita kaayo sa Tsina, Rusya, ug Tibet.

Ang sea buckthorn gihisgotan diha sa karaang mga basahon sa Tibet ug Gresya. Ang Gregong ngalan niini, Hippophaë, nagkahulogang “sinawng kabayo.” Kining ngalana gituohan nga nagtumong sa karaang batasan sa mga Grego sa paggamit sa mga bunga sa sea buckthorn sa pagpasinaw sa balhibo sa mga kabayong iglulumba.

Ang sea buckthorn nakaabot sa Amerika del Norte tungod sa mga nanglangyaw nga mga taga-Rusya nga nagdala niini gikan sa Siberia ngadto sa Canada ug Amerika aron itanom ug ibaligya. Daghang nasod ang nananom niini karon ingong pagkaon ug tambal.

Ang bunga sa sea buckthorn tugob sa bitamina C ug E, folic acid, carotenoids, fatty acids, ug flavonoids. Dili pa dugay, ang medikal nga mga panukiduki nag-ingon nga maayo ang sea buckthorn sa pagtambal sa kanser, maingon man sa pagpamenos sa mga hinungdan sa sakit sa kasingkasing ug sa pagtambal sa sakit sa tiyan, sa panit, ug sa atay. Ang bunga sa sea buckthorn mahimong ilimnon nga pangpalagsik sa lawas ug tambal sa lainlaing sakit.

Ang kinamaayohang bahin sa bunga sa sea buckthorn mao ang gamayng itom nga liso niini. Ang lana sa liso niini tugob sa sustansiya. Nakita sa pipila ka pagtuon nga ang lana sa sea buckthorn makatabang sa pagpabaskog sa sistema sa imyunidad. Dugang pa, ang lana niini ginasagol sa mga kosmetiko ug sa mga produkto para sa panit kay ang lana niini gituohang may mga sangkap nga makapabata sa panagway.

Kon moadto ka sa Rusya, mahimong makakita kag sea buckthorn ug nindotan ka gayod sa orens nga kolor sa mga bunga niini. Apan sama sa ato nang nahisgotan, duna pay labaw kay sa kanindot niini. Kini maoy usa sa daghang kalalangan nga nagpamatuod sa kaalam ug pagkamaayo sa atong Maglalalang!

[Footnote]