KALIBOTAN NGA PUNOG PROBLEMA

4 | Ampingi ang Imong Paglaom

KON NGANONG IMPORTANTE

Ang pagkabalaka tungod sa mga problema sa kalibotan makaapektar sa panglawas ug emosyon sa mga tawo. Tungod ana, daghan ang nawad-ag paglaom. Unsay ilang gihimo?

Ang uban dili na ganahang maghunahuna bahin sa umaabot.
Ang uban magpalabig inom o magdroga aron dili mahunahunaan ang ilang mga problema.
Ang pipila mibati nga mas maayong mamatay na lang. Sila miingon, “Unsa pay pulos nga mabuhi?”

Ang Angay Nimong Mahibaloan

Posibleng temporaryo ra ang pipila sa imong mga problema ug kalit lang moarang-arang ang kahimtang.
Bisag dili mausab ang imong kahimtang, naa gihapon kay mahimo aron makaya kana.
Ang Bibliya naghatag ug tinuod nga paglaom—permanenteng solusyon sa tanang problema sa tawo.

Ang Imong Mahimo Karon

Ang Bibliya nag-ingon: “Ayaw gayod kabalaka bahin sa sunod nga adlaw, kay ang matag adlaw dunay kaugalingong mga kabalaka. Ang mga problema karong adlawa mao ray hunahunaa.”—Mateo 6:34.

Ayaw palabig kabalaka bahin sa sunod nga mga adlaw, kay basig dili na nimo mahimo ang kinahanglan nimong himoon karon.

Kon magsige kag kabalaka sa dili maayong mga butang nga posibleng mahitabo, mosamot lang ang imong stress ug basin mawad-an kag paglaom nga moarang-arang ang kahimtang.

ANG IMONG MAHIMO—Praktikal nga mga Tip

MAGMAPOSITIBO

Ang Bibliya nag-ingon: “Dili maayo ang tanang adlaw sa sinakit, apan kadtong malipayon ug kasingkasing pirmeng nagkombira.” (Proverbio 15:15) Kon nakapokus kaayo ka sa imong problema, basig dili na nimo makita ang solusyon. Pero kon positibo ka, makahunahuna kag mga paagi sa pagsulbad sa imong problema.

Limitahe ang pagtan-aw o pagpaminaw sa mga balita.
Human sa matag adlaw, paglista ug duha o tulo ka butang nga mapasalamaton ka.
Ilista ang mga kinahanglan nimong buhaton, ug isulat lang ang kaya nimong himoon sa usa ka adlaw. Kon naa kay dagkong buluhaton, bahinbahina kana aron makita nimo ang imong nalampos sa matag adlaw.

PANGAYOG TABANG

Ang Bibliya nag-ingon: ‘Ang naglain sa iyang kaugalingon nagsalikway sa tanang praktikal nga kaalam.’ (Proverbio 18:1) Kon naa ka sa lawom nga buho, dili ka makagawas kon walay motabang nimo.

Pangayog tabang sa imong pamilya o mga higala.
Paghunahuna sab kon sa unsang paagi ka makatabang nila. Kon motabang ka sa uban, dili ka sobrang mapokus sa imong mga problema.
Kon nawad-an kag paglaom ug mibati nga wala nay pulos nga mabuhi, konsideraha ang pagpa-check up sa doktor. Usahay kana nga pagbati simtomas sa sakit, sama sa depresyon. Daghan ang natabangan kay nagpatambal sila sa doktor.a

a Ang Pagmata! wala mag-endorso ug partikular nga paagi sa pagtambal.

Ang Bibliya Naghatag ug Tinuod nga Paglaom

Ang alagad sa Diyos sa karaang panahon nag-ampo: “Ang imong pulong lampara sa akong tiil, ug kahayag sa akong alagianan.” (Salmo 119:105) Ingon ana gyod ang Bibliya—ang Pulong sa Diyos. Sa unsang paagi?

Kon ngitngit, ang lampara makatabang nato nga mahibalo kon asa ta motunob. Sa susama, ang Bibliya naay praktikal nga mga tambag nga makatabang nato dihang mohimo tag lisod nga desisyon.

Ang kahayag makadan-ag sa atong agianan maong makita nato kon unsay naa sa unahan. Sa susama, gipakita sa Bibliya kon unsay mahitabo sa umaabot.

Ang Bibliya maoy sagradong basahon. Gihisgotan niini dili lang ang kasaysayan sa tawo kondili ang tinuod sab nga paglaom para sa umaabot. Kini nagtubag sa pangutana nga:

Sa unsang paagi?

Sa unsang paagi nagsugod ang pag-antos? Ang Bibliya nag-ingon nga “ang sala misulod sa kalibotan pinaagi sa usa ka tawo ug ang kamatayon pinaagi sa sala, ang kamatayon mikaylap sa tanang tawo tungod kay silang tanan nakasala man.”—Roma 5:12.

Ngano?

Nganong dili masulbad sa gobyerno sa tawo ang atong mga problema? Ang Bibliya nag-ingon nga “dili iya sa tawong naglakaw bisan ang pagtultol sa iyang lakang.” (Jeremias 10:23) Ang kahimtang sa kalibotan nagpamatuod niana.

Unsa?

Unsa may himoon sa Diyos? Ang Bibliya nag-ingon nga “iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.”—Pinadayag 21:4.