Si Jesus Nagbuhi sa Patay

ANG babaye nga imong nakita dinhi maoy 12 anyos ang panuigon. Gigunitan ni Jesus ang iyang kamot, ug ang iyang inahan ug amahan nagbarog sa duol. Nahibalo ba ikaw nganong malipayon kaayo silang tan-awon? Atong susihon.

Ang amahan sa babaye maoy usa ka dakong tawo ginganlan Jairo. Usa ka adlaw ang iyang anak babaye nasakit, ug siya gipahigda sa katre. Siya nagkasakit ug nagkasakit, ug si Jairo ug ang iyang asawa nabalaka kaayo. Siya bugtong nilang anak babaye ug daw siya himalatyon.

Busa si Jairo milakaw sa pagpangita kang Jesus.

Si Jairo nakakaplag kang Jesus sa taliwala sa usa ka dakong panon. Apan si Jairo miuliot pagsulod sa panon ug miluhod siya sa tiilan ni Jesus. Siya mipakiluoy kaniya nga moadto ug ayohon ang iyang anak babaye. Si Jesus miingon nga moadto siya.

Samtang nalakaw sila latas sa panon, si Jesus kalit mihunong. ‘Kinsa ang naghikap kanako?’ Nangutana siya. Gibati ni Jesus nga migula ang gahom gikan kaniya, busa siya nahibalo nga dihay mihikap kaniya. Apan kinsa? Mao ang usa ka babaye kinsa nasakit sa 12 ka tuig na. Mihikap siya sa sapot ni Jesus, ug naayo!

Si Jairo nalipay sa pagtan-aw sa kasayon alang kang Jesus sa pag-ayo sa usa ka tawo. Apan unya ang usa ka mensahero miabot ug mipahibalo kang Jairo nga ang iyang anak babaye namatay. Si Jesus nakabati niini ug miingon: ‘Ayaw kabalaka, siya mamaayo ra.’

Sa paghiabot nila sa balay ni Jairo, ang tanan naghilak. Apan si Jesus miingon: ‘Ayaw paghilak. Ang bata natulog lamang.’ Apan sila nangatawa kang Jesus, tungod kay sila nasayod nga siya patay.

Unya gidala ni Jesus ang amahan ug inahan sa babaye ug ang tulo sa iyang mga apostol sa sulod sa lawak diin naghigda ang bata. Iyang gigunitan siya sa iyang kamot ug namulong: ‘Bangon!’ Ug siya nahibalik sa kinabuhi, sumala sa imong makita dinhi. Ug siya mibangon ug milakaw! Mao kanay hinungdan imong makita ang iyang inahan ug amahan nga labihan, labihan kamalipayon.

Si Jesus nagbuhi sa ubang mga tawo gikan sa patay. Ang una nga gisulti sa Bibliya mao ang anak sa balong babayeng nagpuyo sa siyudad sa Nain. Sa ulahi, si Jesus nagbangon usab kang Lazaro, ang igsoong lalaki ni Maria ug Marta, gikan sa patay. Kon si Jesus magmando ingon nga hari sa Diyos, iyang dad-on ang daghan, daghang patayng katawhan balik sa kinabuhi. Dili ba kita malipay bahin niini?