Si Jesus Mibalik sa Langit

Samtang nanlabay ang mga adlaw, si Jesus mipakita mismo sa iyang mga sumusunod sa daghang higayon. Kausa dul-an sa 500 ka disipulo nakakita kaniya. Sa mipakita siya kanila, misulti siya kanila bahin sa gingharian sa Diyos. Si Jehova mipadala kang Jesus sa yuta aron motudlo bahin sa Gingharian. Ug siya nagpadayon sa pagbuhat niini bisan human siya gibanhaw gikan sa mga patay.

Hinumdomi, kanang Ginghariana maoy usa ka matuod nga kagamhanan sa Diyos sa langit, ug si Jesus mao ang usa nga gipili sa Diyos nga mahimong hari. Sumala sa atong nakat-onan, si Jesus nakapakita unsa ka kahibulongang hari siya sa pagpakaon sa gigutom, pagtambal sa masakiton, ug bisan sa pagbanhaw sa patay.

Busa kon si Jesus magmando ingong hari sa langit sa usa ka libo ka tuig, sama sa unsa man unya ibabaw sa yuta? Oo, ang tibuok yuta mahimong usa ka matahom paraiso. Wala na unyay mga gubat, o krimen, sakit, o bisan kamatayon.

Ang panahon karon miabot alang kang Jesus nga mobalik ngadto sa langit. Si Jesus nakapakita mismo sa iyang mga tinun-an sa 40 ka adlaw na karon, busa sila nakapiho nga siya nabuhi na. Una pa siya motalikod kanila, iyang gisultihan sila nga mopabilin sa Jerusalem hangtod ilang madawat ang balaang espiritu. Ang balaang espiritu mao ang aktibong gahom sa Diyos nga motabang sa iyang mga sumusunod sa pagbuhat sa kabubut-on sa Diyos. Sa kataposan, si Jesus miingon: ‘Kamo magwali bahin kanako ngadto sa kinalay-ang mga bahin sa yuta.’

Karon, usa ka katingalahang butang nahitabo. Si Jesus mikayab ngadto sa langit, ingon sa imong makita dinhi. Unya usa ka panganod mitago kaniya sa panan-aw, ug ang iyang mga tinu-an wala na makakita pa kang Jesus. Si Jesus miadto sa langit, ug misugod sa pagmando sa iyang mga sumusunod sa yuta gikan didto.