Sa Dalan Paingon sa Damasco

NAHIBALO ka ba kinsa kanang naghigda sa yuta? Mao si Saulo. Hinumdomi, siya ang nagbantay sa sapot sa mga tawong nagbato kang Esteban. Tan-awa kanang masanag nga kahayag! Unsay nagakahitabo?

Human si Esteban mapatay, si Saulo nanguna sa pagpangita sa mga sumusunod ni Jesus sa pagsakit kanila. Kadaghanan sa mga tinun-an mikagiw sa ubang mga siyudad ug misangyaw sa “maayong balita” didto. Apan si Saulo miadto sa ubang mga siyudad sa pagpangita sa mga sumusunod ni Jesus. Siya karon nagpaingon na sa Damasco. Apan sa maong dalan didto, may kahibulongang nahitabo!

Sa kalit usa ka hayag gikan sa langit midan-ag palibot kang Saulo. Napukan siya sa yuta, ingon sa makita ta dinhi. Usa ka tingog nag-ingon: ‘Saulo, Saulo! Nganong gisakit mo ako?’ Ang mga tawong uban kang Saulo nakakita sa kahayag, ug nakabati sa tingog, apan wala sila makasabot sa gisulti.

‘Kinsa man ikaw, Ginoo?’ pangutana ni Saulo.

‘Ako si Jesus, nga maoy imong gisakit,’ mitubag ang tingog. Si Jesus nagsulti niini, tungod kay sa dihang si Saulo nagsakit sa mga sumusunod ni Jesus, si Jesus mibating maorag siya ang gisakit.

Si Saulo karon nangutana: ‘Unsay akong buhaton, Ginoo?’

‘Bangon ug lakaw ngadto sa Damasco,’ miingon si Jesus. ‘Didto ikaw sultihan sa pagabuhaton.’ Sa gibuka ni Saulo ang iyang mga mata, iyang nakaplagan nga siya buta na! Busa ang mga tawong kauban niya miagak kaniya paingon sa Damasco.

Si Jesus karon misulti sa usa sa iyang mga tinun-an sa Damasco ginganlan Ananias. Iyang gisultihan siya sa pag-adto sa dapit nga giestahan ni Saulo. ‘Akong gipili siya nga mahimong akong linain nga alagad,’ misulti si Jesus kang Ananias

Si Ananias misugot. Iyang nakaplagan si Saulo ug nagpandong sa iyang mga kamot nganha kaniya ug miingon: ‘Ang Ginoo nagpadala kanako aron ikaw makakita pag-usab ug mapuno sa balaang espiritu.’ Dihadiha, si Saulo nakakita pag-usab.

Si Saulo gigamit gayod sa pagwali sa katawhan sa daghang nasod. Nailhan siyang apostol Pablo, kang kinsa makakat-on tag daghan pa. Apan una, tan-awon ta kon unsay gisugo sa Diyos nga ipabuhat kang Pedro.