Pagkainanak Pag-usab

Kahubitan: Ang pagkainanak pag-usab nagalangkit sa pagkanabawtismohan diha sa tubig (“igaanak sa tubig”) ug pagkainanak pinaagig espiritu sa Diyos (“igaanak sa . . . espiritu”), nga sa ingon mahimong usa ka anak sa Diyos uban sa paglaom nga magpakig-ambit didto sa Gingharian sa Diyos. (Juan 3:3-5) Si Jesus nakaagi niini nga kasinatian, ingon man usab sa 144,000 kinsa mga manununod uban kaniya sa langitnong Gingharian.

Nganong gikinahanglan man alang kang bisan kinsang mga Kristohanon nga “igaanak pag-usab”?

Gituyo sa Diyos nga magpakig-uban ang limitadong gidaghanon sa matinumanong mga tawo uban ni Jesu-Kristo didto sa langitnong Gingharian

Luc. 12:32: “Ayaw pagkahadlok, gamayng panon, kay gikahimut-an sa inyong Amahan ang paghatag kaninyo sa gingharian.”

Pin. 14:1-3: “Akong nakita, ug, tan-awa! ang Kordero [Jesu-Kristo] nga nagtindog ibabaw sa Bukid Sion, ug uban kaniya ang usa ka gatos ug kap-atan ug upat ka libo . . . kinsa gipalit gikan sa yuta.” (Tan-awang mga panid 236, 237, ubos sa ulohang “Langit.”)

Ang mga tawo dili makaadto sa langit uban sa mga lawas nga unod ug dugo

1 Cor. 15:50: “Isulti ko kaninyo, mga igsoon, nga ang unod ug dugo dili magapanunod sa gingharian sa Diyos, ni ang mga madunot ra magapanunod sa dili madunot.”

Juan 3:6: “Ang gianak sa unod maoy unod, ug ang gianak sa espiritu maoy espiritu.”

Ang mga tawo lamang kinsa “gipanganak pag-usab,” nga sa ingon mahimong mga anak sa Diyos, ang makaambit sa langitnong Gingharian

Juan 1:12, 13: “Sa daghan nga midawat kaniya [Jesu-Kristo], kanila naghatag siyag kagahom sa pagkahimong mga anak sa Diyos, kay sila mituo man sa iyang ngalan; ug sila gipanganak, dili gumikan sa dugo o gumikan sa unodnong kabubut-on o sa kabubut-on sa tawo, kondili sa Diyos.” (“Sa daghan nga midawat kaniya” wala magkahulogan sa tanang tawo nga may pagtuo diha kang Kristo. Matikdi kon kinsa ang gitumong, ingon sa gibutyag sa Ju 1 bersikulo 11 [“iyang kaugalingong katawhan,” ang mga Hudiyo]. Ang samang pribilehiyo gipaabot ngadto sa uban sa katawhan, pero ngadto lamang sa “gamayng panon.”)

Roma 8:16, 17: “Ang espiritu mismo nagapanghimatuod uban sa atong espiritu nga kita mga anak sa Diyos. Kon kita mga anak, nan, kita usab mga manununod: mga manununod gayod sa Diyos, pero kaubanang mga manununod ni Kristo, basta kita moantos uban kaniya aron kita usab pagahimayaon uban kaniya.”

1 Ped. 1:3, 4: “Dalayegon ang Diyos ug Amahan sa atong Ginoong Jesu-Kristo, kay sumala sa iyang dakong kaluoy kita iyang gihatagan ug bag-ong pagkainanak ngadto sa buhing paglaom pinaagi sa pagkabanhaw ni Jesu-Kristo gikan sa mga patay, ngadto sa dili madunot ug dili mabuling ug dili malawos nga panulondon. Kini ginatipigan didto sa mga langit alang kaninyo.”

Unsay ilang buhaton didto sa langit?

Pin. 20:6: “Sila mahimong mga saserdote sa Diyos ug sa ang Kristo, ug magamando ingong mga hari uban kaniya sa usa ka libo ka tuig.”

1 Cor. 6:2: “Wala ba kamo masayod nga ang mga balaan magahukom sa kalibotan?”

Ang usa ka tawo ba nga dili “igaanak pag-usab” mamaluwas?

Pin. 7:9, 10, 17: “Human niining mga butanga [human ang apostol nga si Juan nakadungog sa gidaghanon niadtong mahimong “igaanak pag-usab,” sila nga molangkob sa espirituwal nga Israel ug mahauban ni Kristo didto sa langit; itandi ang Roma 2:28, 29 ug Galacia 3:26-29] akong nakita, ug, ania karon! ang usa ka dakong panon, nga walay tawo nga makaihap, gikan sa tanang kanasoran ug kabanayan ug katawhan ug pinulongan, nga nanagtindog atubangan sa trono ug atubangan sa Kordero, nanagsul-ob sa tag-as maputi nga mga besti; ug nanagdala ug mga palwa sa palmera diha sa ilang mga kamot. Ug padayon silang nanagsinggit sa makusog nga tingog, nga nag-ingon: ‘Ang kaluwasan gikan sa atong Diyos, kinsa naglingkod sa trono, ug sa Kordero.’ . . . ‘Ang Kordero [Jesu-Kristo], nga anaa sa taliwala sa trono, magabantay kanila, ug magatultol kanila ngadto sa mga tuboran sa tubig sa kinabuhi.’”

Human malista ang daghan antes-Kristohanong mga tawo sa pagtuo, ang Hebreohanon 11:39, 40 nag-ingon: “Kini silang tanan, bisan sila gipanghimatud-an pinaagi sa ilang pagtuo, wala makadawat sa katumanan sa saad, sanglit gikatagana man sa Diyos ang mas maayo pa alang kanato, aron sila dili pagahingpiton nga mahamulag kanato.” (Kinsa ang gipasabot dinhi sa “kanato”? Ang Hebreohanon 3:1 nagpakita nga sila mao ang “mga mag-aambit sa langitnon nga pagtawag.” Ang antes-Kristohanong mga tawo nga naghupot ug pagtuo, diay, kinahanglang adunay paglaom sa hingpit nga kinabuhi sa ubang dapit gawas sa langit.)

Sal. 37:29: “Ang mga matarong mismo magapanunod sa yuta, ug sila magapuyo ibabaw niana sa walay kataposan.”

Pin. 21:3, 4: “Tan-awa! Ang balongbalong sa Diyos uban sa katawhan, ug siya magapuyo ipon kanila, ug sila mahimong iyang mga katawhan. Ug ang Diyos mismo magauban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni aduna pay pagbalata ni paghilak ni kasakit pa man. Ang unang mga butang nangagi na.”

Posible ba alang sa usa ka tawo nga makahupot sa espiritu sa Diyos apan dili “igaanak pag-usab”?

Mahitungod kang Juan nga tigbawtismo, ang anghel ni Jehova miingon: “Siya mapuno sa balaang espiritu gikan pa sa tiyan sa iyang inahan.” (Luc. 1:15) Ug sa ulahi si Jesus miingon: “Taliwala kanila nga gianak ug mga babaye wala pay nahitungha nga molabaw ka dako kay kang Juan nga Bawtista; apan ang usa ka persona nga labing gamay didto sa gingharian sa mga langit mas dako pa kay kaniya [Ngano? Tungod kay si Juan dili man mahalangit ug busa walay kinahanglan alang kaniya nga “igaanak pag-usab”]. Pero sukad sa mga adlaw ni Juan nga Bawtista hangtod karon [sa dihang gisulti kini ni Jesus] ang gingharian sa mga langit mao ang tumong nga ang mga tawo nagapangagpas.”—Mat. 11:11, 12.

Ang espiritu ni Jehova “naglihok” ibabaw kang David ug “misulti” pinaagi kaniya (1 Sam. 16:13; 2 Sam. 23:2), pero walay gibutyag sa Bibliya bisan diin nga siya “gipanganak pag-usab.” Walay kinahanglan alang kaniya nga “igaanak pag-usab,” sanglit kay, ingon sa gisulti sa Buhat 2:34: “Si David wala mosaka ngadto sa mga langit.”

Unsay nagapaila sa mga tawo karon nga nakahupot sa espiritu sa Diyos?

Tan-awang mga panid 173-175, ubos sa lintunganayng ulohang “Espiritu.”

Kon Adunay Moingon—

‘Ako gianak na pag-usab’

Mahimong tubagon mo: ‘Kana nagakahulogan nga ikaw sa kapulihay mahalangit uban ni Kristo, di ba mao? . . . Imo na ba gayong napalandong kon unsay buhaton didto alang niadtong moadto sa langit?’ Dayon tingali modugang: (1) ‘Sila mahimong mga hari ug mga saserdote, nga magmando uban ni Kristo. (Pin. 20:6; 5:9, 10) Si Jesus miingon nga kini mao lamay usa ka “gamayng panon.” (Luc. 12:32)’ (2) ‘Kon sila mga hari, kinahanglan usab nga adunay mga ginsakpan nga maoy ilang pagamandoan. Kinsa man kini sila? . . . Aniay pipila ka puntos nga akong nakaplagan nga makapainteres kaayo sa dihang gidala kini sa akong pagtagad. (Sal. 37:11, 29; Prov. 2:21, 22)’

‘Ikaw ba gianak na pag-usab?’

Mahimong tubagon mo: ‘Natino ko nga ang gipasabot sa mga tawo sa “igaanak pag-usab” dili man magkapareho kanunay. Imo ba akong katug-anan kon unsay kahulogan niana alang kanimo?’

O ikaw makaingon: ‘Buot mong masayran kon gidawat ko ba si Jesus ingong akong Manluluwas ug nakadawat sa balaang espiritu, di ba mao? Ako mopasalig kanimo nga ang tubag maoy Oo; kay kon dili pa dili unta ako makigsulti kanimo bahin kang Jesus.’ Dayon tingali modugang: (1) ‘Pero sa dihang hunahunaon ko ang pagkabaton sa balaang espiritu, akong nakaplagan nga ang pamatuod nianang maong espiritu wala man diha sa daghan nga nag-angkon nga mga Kristohanon. (Gal. 5:22, 23)’ (2) ‘Ikaw ba magmalipayon sa pagpuyo ibabaw niining yutaa kon ang tagsatagsa magsumbaliksilaw nianang maong diyosnong mga hiyas? (Sal. 37:10, 11)’

Laing posibilidad: ‘Kon ang ipasabot niana, “Gidawat ko ba si Kristo ingong akong Manluluwas?” ang tubag maoy Oo. Ingon niana ang gibuhat sa tanang Saksi ni Jehova. Pero, alang kanamo, ang pagkainanak pag-usab nagalangkit ug mas dako pa kay niana.’ Dayon tingali modugang: (1) ‘Sa naghisgot si Jesus maylabot sa pagkainanak pag-usab siya miingon nga gikinahanglan kana aron makasulod sa Gingharian sa Diyos, nga mao, mahimong bahin sa Gingharian sa Diyos, ang iyang langitnong kagamhanan. (Juan 3:5)’ (2) ‘Ang Bibliya nagpakita usab nga daghang katawhan nga nagabuhat sa kabubut-on sa Diyos magapuyo dinhi sa yuta, ingong malipayong mga ginsakpan nianang Ginghariana. (Mat. 6:10; Sal. 37:29)’

Dugang sugyot: Sila nga iya sa langitnong matang makatubag: ‘Oo, ako gianak pag-usab. Apan ang Bibliya nagpabantay kanatong tanan nga dili maghinobra pagsalig sa atong baroganan. Gikinahanglan ta ang padayong pagsusi sa atong kaugalingon aron sa pagseguro nga kita gayod nagabuhat kon unsa ang ginapatuman kanato sa Diyos ug ni Kristo. (1 Cor. 10:12)’ Dayon tingali modugang: ‘Unsang kaakohan ang gipahimutang ni Jesus ibabaw sa iyang matuod nga mga tinun-an? (Mat. 28:19, 20; 1 Cor. 9:16)’