Kapitulo 26

Balik sa Pinuy-anan sa Capernaum

NIINING panahona ang kabantog ni Jesus mikaylap sa bisan diin, ug nangadto ang daghang tawo sa tuyoon nga mga dapit nga iyang giadtoan niadto. Apan, tapos sa pila ka adlaw siya mibalik sa Capernaum sa daplin sa Dagat sa Galilea. Daling mikaylap ang balita sa siyudad nga siya nahibalik, ug daghan ang nangadto sa balay diin siya didto. Ang mga Pariseo ug mga magtutudlo sa Kasugoan nangabot gikan sa halayo sama sa Jerusalem.

Daghan kaayog tawo nga sila naghuot sa pultahan, ug wala nay luna ang lawak aron makasulod ang lain. Ang entablado nahikay alang sa talagsaon gayong hitabo. Ang nahitabo niadtong higayona bililhon, kay kana motabang kanato sa pag-ila nga si Jesus may gahom sa paghanaw sa hinungdan sa pag-antos sa tawo ug pagpasig-uli sa maayong panglawas sa tanan nga buot niya.

Samtang si Jesus nagtudlo sa panon, upat ka lalaki ang nagdala sa balay sa usa ka lalaking paralitiko sa usa ka higdaan. Buot nilang ayohon ni Jesus ang ilang higala, apan tungod sa panon, sila dili makasulod. Pagkamakapahiubos! Apan sila wala mosurender. Gikatkat nila ang lapad nga atop, gilungagan kana, ug gitonton ang higdaan uban sa tawong paralitiko nga naghigda niana sa tupad ni Jesus.

Nasuko ba si Jesus tungod sa pagbalda? Wala gayod! Hinunoa, siya dulot nakadayeg sa ilang pagtuo. Siya miingon ngadto sa paralitiko: “Ang imong mga sala gipasaylo na.” Apan si Jesus tinuod bang makapasaylog mga sala? Ang mga eskriba ug mga Pariseo wala magtuo niana. Sila nangatarongan sa ilang mga kasingkasing: “Nganong magsulti man kining tawhana sa ingon? Siya nagapasipala. Kinsa bay makapasaylog mga sala kondili ang Diyos ra?”

Kay nasayod sa ilang mga hunahuna, si Jesus miingon kanila: “Nganong nangutana man kamo sulod sa inyong mga kasingkasing? Hain ba ang labi pang sayon, ang pag-ingon sa paralitiko, ‘Ang imong mga sala gipasaylo na,’ o ang pag-ingon, ‘Bangon ug dad-a ang imong higdaan ug lumakaw’?”

Unya, gipasagdan ni Jesus ang panon, apil ang iyang mga kritiko, sa pagtan-aw sa usa ka katingalahang pasundayag nga mobutyag nga siya adunay gahom sa pagpasaylo sa mga sala sa yuta ug nga siya sa pagkamatuod mao ang labing bantogang tawo nga nabuhi sukad. Siya miliso ngadto sa paralitiko ug misugo: “Bangon, dad-a ang imong higdaan, ug pumauli ka.” Ug siya dihadiha mibangon, nga mipahawa sa ilang atubangan nga nagdala sa iyang higdaan! Sa katingala ang mga tawo mihimaya sa Diyos ug mipatugbaw: “Wala pa kitay nakita nga ingon niini”!

Inyo bang namatikdang si Jesus naghisgot sa mga sala maylabot sa sakit ug ang pagpasaylo sa mga sala nalangkit sa pagkamapasig-uli sa maayong panglawas? Ang Bibliya nagapatin-aw nga ang una natong ginikanan, si Adan, nakasala ug kitang tanan nakapanunod sa sangpotanan nianang salaa, nga mao, ang sakit ug ang kamatayon. Apan ilalom sa pagmando sa Gingharian sa Diyos, pasayloon ni Jesus ang mga sala sa tanang nahigugma sa Diyos ug nagaalagad Kaniya, ug dayon ang tanang sakit mahanaw na. Pagkaanindot unya niana! Marcos 2:1-12; Lucas 5:17-26; Mateo 9:1-8; Roma 5:12, 17-19.

▪ Unsay kahimtang sa nahitabo ang talagsaon kaayong hitabo?

▪ Sa unsang paagi ang paralitiko nakaabot kang Jesus?

▪ Nganong kitang tanan makasasala, apan sa unsang paagi si Jesus mitaganag paglaom nga posible ang pagpasaylo sa atong mga sala ug ang hingpit nga panglawas?