Kapitulo 41

Sentro sa Panaglalis

TAPOS nga giabiabi siya sa balay ni Simon, misugod si Jesus sa iyang ikaduhang panaw sa pagwali sa Galilea. Sa iyang unang pagpanaw sa teritoryo, giubanan siya sa iyang unang mga tinun-an, si Pedro, Andres, Santiago, ug Juan. Apan karon ang 12 ka apostoles, ug pipila ka mga babaye, miuban kaniya. Apil na niini si Maria Magdalena, Susana, ug Joana, kansang bana maoy opisyal ni Haring Herodes.

Samtang nagkakusog ang ministeryo ni Jesus, mikusog usab ang panaglalis bahin sa iyang buluhaton. Dihay usa ka tawong giyawaan, buta ug amang usab, nga gidala ngadto kang Jesus. Sa dihang giayo siya ni Jesus, mao nga nahigawas na sa gahom sa yawa ug nakasulti ug nakakita na, yano nga nadala ang mga tawo. Sila miingon: “Mao na ba kaha kini siya ang anak ni David?”

Daghang tawo ang midugok sa balay nga giabtan ni Jesus nga tungod niana siya ug ang iyang mga tinun-an dili na gani makakaon. Gawas pa niadtong nagtuo nga siya tingali ang gisaad nga “Anak ni David,” adunay mga eskriba ug mga Pariseo nga miabot gikan pa gayod sa Jerusalem aron lang daoton siya. Sa dihang nakadungog ang mga paryente ni Jesus sa kagubot maylabot kang Jesus, ilang giadto siya aron kuhaon. Alang sa unsa nga katarongan?

Buweno, bisan ang kaugalingong mga igsoon ni Jesus wala pa magtuo niadtong higayona nga siya Anak sa Diyos. Dugang pa, ang kaguliyang ug kagubot nga iyang nahimo sa katilingban dili gayod kinaiyahan ni Jesus nga ilang nailhan samtang nagdako pa sa Nazaret. Busa, sila nagtuo nga si Jesus may dakong deperensiya sa hunahuna. “Nabuang siya,” sila miingon, ug gusto nilang sakmiton ug dalhon siya.

Apan tin-aw ang ebidensiya nga giayo ni Jesus ang tawong giyawaan. Ang mga eskriba ug mga Pariseo nahibalo nga sila dili makalimod sa pagkatinuod niini. Busa aron daoton si Jesus ilang gisultihan ang mga tawo: “Kining tawhana dili makapagulag yawa gawas kon pinaagi kang Beelzebub, ang punoan sa mga yawa.”

Sanglit nahibalo sa ilang kaisipan, gitawag ni Jesus ang mga eskriba ug mga Pariseo ug miingon: “Ang matag gingharian nga mabahin sa iyang kaugalingon malaglag, ug ang matag siyudad ug balay dili mobarog kon kini mabahin sa iyang kaugalingon. Sa samang paagi, kon si Satanas mao man ang nagapagula kang Satanas, nabahin diay siya batok sa iyang kaugalingon; nan, unsaon pa man sa pagbarog sa iyang gingharian?”

Pagkamakapapukan nga pangatarongan! Sanglit nangangkon ang mga Pariseo nga nakapagulag mga yawa ang ilang mga kauban, si Jesus usab nangutana: “Kon pinaagi man diay kang Beelzebub nakapagula akog mga yawa, pinaagi ba kang kinsa ang inyong anak nagapagula kanila?” Sa laing pagkasulti, ang ilang sumbong batok kang Jesus aplikado usab kanila sama sa ilang pag-aplikar nila niini diha kaniya. Dayon mipasidaan si Jesus: “Apan kon pinaagi man sa espiritu sa Diyos ginapagula ko ang mga yawa, ang gingharian sa Diyos nahidangat na diay diha kaninyo.”

Sa pag-ilustrar nga ang iyang pagpagula ug mga yawa maoy ebidensiya sa iyang gahom batok kang Satanas, si Jesus miingon: “Unsaon man sa usa ka tawo sa pagsulod sa balay sa usa ka kusgan ug sa pag-agaw sa mga kabtangan niini, gawas kon iya unang gaposon ang kusgan? Ug niana makahimo na siya sa pagpangawat sa iyang balay. Ang dili dapig kanako batok kanako, ug siya nga dili motipon uban kanako magkatibulaag.” Dayag nga batok ang Pariseo kang Jesus, nagpadayag sa ilang kaugalingon nga mga ahente ni Satanas. Ilang gipatibulaag ang mga Israelinhon gikan kaniya.

Busa, nagpasidaan si Jesus batok niining satanasnong mga magsusupak nga “ang magapanamastamas batok sa balaang espiritu dili gayod pasayloon.” Siya mibatbat: “Ang bisan kinsa nga magasultig batok sa Anak sa tawo, siya mapasaylo; apan ang si bisan kinsa nga magasultig batok sa balaang espiritu, dili gayod siya pasayloon, dili, dili niining sistema sa mga butang o nianang sa umaabot.” Ang maong mga eskriba ug mga Pariseo nakahimog dili-mapasaylong sala pinaagi sa makidaotong paghatag ug pasidungong kang Satanas nga maoy naghimo sa milagro nga dayag nga usa ka milagrosong paglihok sa balaang espiritu sa Diyos. Mateo 12:22-32; Marcos 3:19-30; Juan 7:5.

▪ Sa unsang paagi lahi ang ikaduhang panaw ni Jesus sa Galilea kay sa nahauna?

▪ Nganong misulay ang mga paryente ni Jesus sa pagsakmit kaniya?

▪ Sa unsang paagi misulay ang mga Pariseo sa pagdaot sa mga milagro ni Jesus, ug sa unsang paagi gitubag sila ni Jesus?

▪ Sad-an sa unsa ang mga Pariseo, ug ngano?