Bahin 9
Kon Giunsa Nato Pagkahibalo nga Kita Ania na sa “Kataposang mga Adlaw”
1, 2. Sa unsang paagi mahibalo kita nga kita ania na sa kataposang mga adlaw?
UNSAON nato pagpaneguro nga kita nagkinabuhi na sa panahon nga ang Gingharian sa Diyos molihok na batok niining presenteng sistema sa tawhanong pagmando? Sa unsang paagi kita makahibalo nga duol na kaayo kita sa panahon sa Diyos sa pagtapos sa tanang pagkadaotan ug pag-antos?
2 Buot sa mga tinun-an ni Jesu-Kristo nga mahibaloan kanang mga butanga. Nangutana sila kaniya kon unsa unya “ang ilhanan” sa iyang presensiya nga may gahom sa Gingharian ug “sa konklusyon sa sistema sa mga butang.” (Mateo 24:3) Si Jesus mitubag pinaagi sa pagpahayag nga detalyado sa makapakurat-sa-kalibotang mga panghitabo ug mga kahimtang nga magkaipon sa pagpakita nga ang katawhan misulod na sa “panahon sa kataposan,” “ang kataposang mga adlaw” niining sistema sa mga butang. (Daniel 11:40; 2 Timoteo 3:1) Kita ba niining sigloha nakakita sa maong daghag-bahin nga ilhanan? Oo, kita nakakita, nga daghan kaayo!
Mga Gubat sa Kalibotan
3, 4. Sa unsang paagi ang mga gubat niining sigloha haom sa tagna ni Jesus?
3 Si Jesus nagtagna nga ‘ang nasod motindog batok nasod ug ang gingharian batok gingharian.’ (Mateo 24:7) Niadtong 1914 ang kalibotan nalangkit sa usa ka gubat nga nakakita sa pagpaandam alang sa gubat sa mga nasod ug mga gingharian sa paaging lahi kay sa bisan unsang gubat sa nangagi. Sa pag-ila sa maong kamatuoran, ang mga historyano niadtong panahona nagtawag niana nga Dakong Gubat. Kadto unang gubat sa iyang matang sa kasaysayan, ang unang gubat sa kalibotan. Mga 20,000,000 ka sundalo ug sibilyan nawad-an sa ilang kinabuhi, labaw kaayo kay sa bisan unsang nangaging gubat.
4 Ang Gubat sa Kalibotan I nagtimaan sa sinugdanan sa kataposang mga adlaw. Si Jesus miingon nga kini ug ubang mga panghitabo mao unyay “sinugdanan sa mga kasakitan.” (Mateo 24:8) Kana natuman, kay ang Gubat sa Kalibotan II labaw pang makapatay, kay mga 50,000,000 ka sundalo ug sibilyan nawad-an sa ilang kinabuhi. Niining ika-20ng siglo, kapig 100,000,000 ka tawo ang nangamatay sa mga gubat, kapin ug upat ka pilo sa gidaghanon kay sa nangaging 400 ka tuig nga giipon! Dako kaayong paghukom sa tawhanong pagmando!
Ubang mga Ebidensiya
5-7. Unsa ang pila ka laing ebidensiya nga kita ania na sa kataposang mga adlaw?
5 Giapil ni Jesus ang ubang mga bahin nga duyog sa kataposang mga adlaw: “Aduna unyay dagkong mga linog, ug sa sunodsunod nga dapit mga kamatay [mga epidemya sa sakit] ug mga kanihit sa pagkaon.” (Lucas 21:11) Kana haom kaayo sa mga panghitabo sukad 1914, kay may dako kaayong pag-uswag sa mga kasakitan gumikan sa maong mga katalagman.
6 Ang dagkong mga linog maoy regular nga mga panghitabo, nga naghunos ug daghang kinabuhi. Ang trangkaso Espanyola lamang mipatayg mga 20,000,000 ka tawo tapos sa Gubat sa Kalibotan I—nga ubang mga banabana maoy 30,000,000 o labaw pa. Ang AIDS nakahunos ug ginatos ka libong mga kinabuhi ug makahunos ug milyonmilyon pa sa duol nga umaabot. Matag tuig milyonmilyong katawhan mamatay sa mga sakit sa kasingkasing, kanser, ug ubang mga sakit. Milyonmilyon pa nangamatay sa hinay nga kamatayon tungod sa kagutmanan. Sa walay pagduhaduha ang ‘mga mangangabayo sa Apokalipsis’ uban sa ilang mga gubat, mga kanihit sa pagkaon, ug mga epidemya sa sakit nagapatay ug daghan kaayo sa tawhanong pamilya sukad sa 1914.—Pinadayag 6:3-8.
7 Si Jesus nagtagna usab sa pag-uswag sa krimen nga nasinati sa tanang kanasoran. Matud niya: “Tungod sa pag-usbaw sa pagkamalapason ang gugma sa kadaghanan mabugnaw.”—Mateo 24:12.
8. Sa unsang paagi ang tagna sa 2 Timoteo kapitulo 3 mohaom sa atong panahon?
8 Dugang pa, gitagna sa Bibliya ang moral nga kagun-oban nga dayag kaayo sa tibuok nga kalibotan karong adlawa: “Sa kataposang mga adlaw ang mga panahon nga lisod sagubangon moabot. Kay ang mga tawo maoy mahigugmaon sa ilang kaugalingon, mga mahigugmaon ug salapi, tigpagawal, hambogiro, mga tampalasan, masukihon sa mga ginikanan, dili mapasalamaton, dili maunongon, walay pagbati nga kinaiya, dili ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga maluibon, gahig-ulo, tigpaburot, mga mahigugmaon sa kalingawan inay sa Diyos, nga nagbaton sa dagway sa pagkadiyosnon apan nagapanghimakak sa gahom niini . . . Ang mga tawong daotan ug mga tigtakoban mosamot sa pagkadaotan.” (2 Timoteo 3:1-13) Kanang tanan nangatuman sa atubangan mismo sa atong mga mata.
Laing Hinungdan
9. Unsay nahitabo sa langit nga dungan sa pagsugod sa kataposang mga adlaw sa yuta?
9 Adunay laing hinungdan sa dako kaayong pag-uswag sa pag-antos niining sigloha. Dungan sa pagsugod sa kataposang mga adlaw niadtong 1914, may butang nahitabo nga labaw pang nakapameligro sa katawhan. Niadtong panahona, sumala sa giasoy sa usa ka tagna diha sa kataposang basahon sa Bibliya: “Ang gubat misilaob sa langit: Si Miguel [Kristo diha sa langitnong gahom] ug ang iyang mga manulonda nakiggubat batok sa dragon [Satanas], ug ang dragon ug iyang mga manulonda [ang mga demonyo] nakiggubat apan wala makadaog, ni may dapit nga nahikaplagan alang kanila sa langit. Busa gitambog ang dakong dragon, ang unang bitin, ang usa nga gitawag Yawa ug Satanas, kinsa nagalimbong sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.”—Pinadayag 12:7-9.
10, 11. Sa unsang paagi ang katawhan naapektahan sa dihang si Satanas ug iyang mga demonyo gitambog sa yuta?
10 Unsa ang mga sangpotanan alang sa tawhanong pamilya? Ang tagna nagpadayon: “Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga siya may hamubo na lang nga panahon.” Oo, si Satanas nahibalo nga ang iyang sistema nagasingabot na sa iyang kataposan, mao nga ginabuhat niya ang tanan nga iyang mahimo sa pagpatalikod sa mga tawo sa Diyos sa dili pa siya ug ang iyang kalibotan laglagon. (Pinadayag 12:12; 20:1-3) Pagkadaotan ang maong espiritung mga linalang tungod kay sayop ang paggamit nila sa ilang kinaugalingong pagbuot! Pagkangil-ad ang mga kahimtang dinhi sa yuta ubos sa ilang impluwensiya, ilabina sukad sa 1914!
11 Dili katingalahan nga si Jesus mitagna mahitungod sa atong panahon: “Sa yuta kagul-anan sa mga nasod, kay wala mahibalo sa lutsanan . . . Ang mga tawo panguyapan tungod sa kahadlok ug sa pagpaabot sa mga butang mahitabo sa gipuy-an nga yuta.”—Lucas 21:25, 26.
Kataposan sa Tawhanon ug Demonyohanong Pagmando Haduol Na
12. Unsa ang usa sa kataposan nahibiling mga tagna nga pagatumanon sa dili pa ang kataposan niining sistemaha?
12 Pila pa ka tagna sa Bibliya ang pagatumanon una laglagon sa Diyos kining presenteng sistema? Pila na lang! Usa sa kataposan mao ang anaa sa 1 Tesalonica 5:3, nga nagaingon: “Samtang sila nagasultisulti mahitungod sa kalinaw ug kasegurohan, dihadiha ang katalagman mahitabo kanila.” (The New English Bible) Kini nagapakita nga ang kataposan niining sistemaha mosugod “samtang sila nagasultisulti.” Nga wala hisayri daan sa kalibotan, ang kalaglagan mahitabo sa panahong wala gayod dahoma, sa dihang ang pagtagad sa mga tawo anaa sa ilang gilaomang kalinaw ug kasegurohan.
13, 14. Unsang panahon sa kasamok ang gitagna ni Jesus, ug sa unsang paagi kana matapos?
13 Ang panahon talitapos na alang niining kalibotana ubos sa impluwensiya ni Satanas. Sa dili madugay kini modangat sa iyang kataposan sa usa ka panahon sa kasamok nga mahitungod niana si Jesus miingon: “Unya mahitabo ang dakong kasakitan nga wala pa sukad mahitabo sukad sa sinugdanan sa kalibotan hangtod karon, dili, ni mahitabo pa pag-usab.”—Mateo 24:21.
14 Ang kinatayuktokan sa “dakong kasakitan” mao unya ang gubat sa Diyos sa Armageddon. Kana ang panahon nga gihisgotan sa propetang si Daniel sa dihang ang Diyos “magadugmok ug magalaglag niining tanan nga gingharian.” Kini magkahulogan sa pagkalaglag sa tanang tawhanong mga pagmando karon nga independente sa Diyos. Ang pagmando sa iyang Gingharian gikan sa langit unya maoy hingpit mobanos sa paggahom sa tanang kahikayan sa tawo. Dili na gayod mahitabo, mitagna si Daniel, nga ang gahom sa pagmando igahatag “sa laing katawhan.”—Daniel 2:44; Pinadayag 16:14-16.
15. Unsay mahitabo sa impluwensiya ni Satanas ug iyang mga demonyo?
15 Nianang panahona ang tanang satanasnon ug demonyohanong impluwensiya mohunong na usab. Ang maalsahon espiritung mga linalang mahiklin na mao nga sila dili na “makalimbong sa kanasoran.” (Pinadayag 12:9; 20:1-3) Sila gisilotan sa kamatayon ug nagpaabot sa kalaglagan. Pagkadako unyang kahupayan alang sa katawhan nga mahigawas sa ilang makapadaot nga impluwensiya!
Kinsa ang Makalabang-Buhi? Kinsa ang Dili?
16-18. Kinsa ang makalabang-buhi sa kataposan niining sistemaha, ug kinsa ang dili?
16 Sa diha nga igapatuman ang mga paghukom sa Diyos batok niining kalibotana, kinsa ang makalabang-buhi? Kinsa ang dili? Ang Bibliya nagapakita nga kadtong gusto sa pagmando sa Diyos panalipdan ug makalabang-buhi. Kadtong dili gusto sa pagmando sa Diyos dili panalipdan kondili pagalaglagon uban sa kalibotan ni Satanas.
17 Ang Proverbio 2:21, 22 nagaingon: “Ang mga matul-id [kadtong nagapasakop sa pagmando sa Diyos] mao ang mopuyo sa yuta, ug ang mga walay-ikasaway mao ang mahibilin ibabaw niini. Mahitungod sa mga daotan [kadtong dili mopasakop sa pagmando sa Diyos], sila pagaputlon gikan sa yuta mismo; ug mahitungod sa mga maluibon, sila pagalangkaton gikan niini.”
18 Ang Salmo 37:10, 11 nagaingon usab: “Makadiyut na lamang, ug ang daotang usa mawala na . . . Apan ang mga maaghop mismo magapanunod sa yuta, ug sila makakaplag sa ilang tumang kalipay sa kadagaya sa pakigdait.” Ang bersikulo 29 nagadugang: “Ang mga matarong magapanunod sa yuta, ug sila magapuyo ibabaw niana sa walay kataposan.”
19. Unsang tambag ang angay natong ibutang sa kasingkasing?
19 Angay natong ibutang sa kasingkasing ang tambag sa Salmo 37:34, nga nagaingon: “Paglaom kang Jehova ug bantayi ang iyang dalan, ug siya magabayaw kanimo aron magapanunod sa yuta. Sa dihang ang mga daotan pagaputlon, ikaw makakita niana.” Ang Salmo 37 bersikulo 37 ug 38 nagaingon: “Bantayi ang walay ikasaway ug tan-awa ang usang matul-id, kay ang kaugmaon nianang tawhana magmalinawon. Apan ang mga malapason mismo pagalaglagon sa tingob; ang kaugmaon sa daotang katawhan pagaputlon.”
20. Nganong makaingon kita nga karon maoy kulbahinam nga panahon nga pagakinabuhian?
20 Makahupay gayod, oo, makapadasig ang pagkahibalo nga ang Diyos sa pagkatinuod may pagtagad ug sa dili madugay iyang taposon ang tanang pagkadaotan ug pag-antos! Kulbahinam gayod ang pagkaamgo nga duol na ang katumanan nianang mahimayaong mga tagna!
[Hulagway sa panid 20]
Ang Bibliya nagtagna sa mga hitabo nga maoy maglangkob sa “ilhanan” sa kataposang mga adlaw
[Hulagway sa panid 22]
Sa dili madugay, sa Armageddon, kadtong dili mopasakop sa pagmando sa Diyos pagaputlon. Kadtong mopasakop makalabang-buhi ngadto sa usa ka matarong bag-ong kalibotan