Kapitulo Trese
Kaluwasan ug Pagmaya Ubos sa Paghari sa Mesiyas
1. Batbata ang espirituwal nga kahimtang sa katawhang may pakigsaad sa Diyos sa mga adlaw ni Isaias.
SA MGA adlaw ni Isaias, daotan ang espirituwal nga kahimtang sa katawhang may pakigsaad sa Diyos. Bisan ubos sa pagmando sa matinumanong mga hari, sama ni Uzzias ug Jotam, daghan sa katawhan nagsimba diha sa hatag-as nga mga dapit. (2 Hari 15:1-4, 34, 35; 2 Cronicas 26:1, 4) Sa dihang si Ezequias nahimong hari, giwagtang niya gikan sa nasod ang mga butang ug ang mga tulumanon nga nalangkit sa pagsimba kang Baal. (2 Cronicas 31:1) Dili katingad-an nga si Jehova nag-awhag sa iyang katawhan sa pagbalik kaniya ug nagpasidaan bahin sa disiplina nga moabot!
2, 3. Unsang pagdasig ang gitagana ni Jehova alang niadtong matinguhaon sa pag-alagad kaniya bisan pa sa kaylap nga pagkadili-matinumanon?
2 Bisan pa niana, dili tanan ang bug-os nga mga rebelde. Si Jehova may matinumanong mga manalagna, ug lagmit may pipila ka Hudiyo nga namati kanila. Si Jehova adunay makapahupayng mga pulong alang niini nila. Human sa pagbatbat sa grabeng mga kasakitan nga nasinati sa Juda panahon sa pagsulong sa Asirya, si propetang Isaias gidasig sa pagsulat sa usa sa labing matahom nga mga pahayag diha sa tibuok Bibliya, nga usa ka kabatbatan sa mga panalangin nga moabot ubos sa paghari sa Mesiyas.a Ang pipila ka bahin nianang mga panalangina misangpot nga may gamay nga katumanan sa dihang ang mga Hudiyo namauli gikan sa pagkabihag sa Babilonya. Apan ang tagna sa katibuk-an may dakong katumanan karong adlawa. Matuod, si Isaias ug ang ubang matinumanong mga Hudiyo sa iyang panahon namatay na mao nga wala makakita nianang mga panalangina. Apan nagpaabot sila niana diha sa pagtuo ug makakita sa katumanan sa mga pulong ni Isaias human sa pagkabanhaw.—Hebreohanon 11:35.
3 Ang modernong-adlawng katawhan ni Jehova nagkinahanglan usab sa pagdasig. Ang tulin nagkadaot nga moral nga mga prinsipyo sa kalibotan, mapintasong pagsupak sa mensahe sa Gingharian, ug personal nga mga kahuyangan maoy masulayon alang kanilang tanan. Ang kahibulongang mga pulong ni Isaias bahin sa Mesiyas ug sa iyang paghari makapalig-on ug makatabang sa katawhan sa Diyos sa pagsagubang sa maong mga hagit.
Ang Mesiyas—Usa ka May-Katakos nga Pangulo
4, 5. Unsay gitagna ni Isaias mahitungod sa pag-abot sa Mesiyas, ug unsang pagpadapat sa mga pulong ni Isaias ang lagmit gihimo ni Mateo?
4 Kasiglohan sa wala pa ang panahon ni Isaias, ang ubang Hebreohanong mga magsusulat sa Bibliya mipunting sa pag-abot sa Mesiyas, ang matuod nga Pangulo, nga ipadala ni Jehova ngadto sa Israel. (Genesis 49:10; Deuteronomio 18:18; Salmo 118:22, 26) Karon pinaagi ni Isaias, gidugang ni Jehova ang mga detalye. Si Isaias misulat: “Aduna gayoy mogula nga usa ka gamayng sanga gikan sa tuod ni Jese; ug gikan sa iyang mga gamot ang usa ka turok magmabungahon.” (Isaias 11:1; itandi ang Salmo 132:11.) Ang “gamayng sanga” ug “turok” pulos nagpaila nga ang Mesiyas mao unya ang kaliwat ni Jese pinaagi sa iyang anak lalaki nga si David, kinsa gidihogan ug lana ingong hari sa Israel. (1 Samuel 16:13; Jeremias 23:5; Pinadayag 22:16) Inig-abot sa matuod nga Mesiyas, ang maong “turok,” gikan sa balay ni David, kinahanglang magmabungahon.
5 Ang sinaad nga Mesiyas mao si Jesus. Ang magsusulat sa ebanghelyo nga si Mateo nagtumong sa mga pulong sa Isaias 11:1 sa dihang siya miingon nga ang pagtawag kang Jesus nga “Nasaretnon” nagtuman sa mga pulong sa mga manalagna. Tungod kay siya nagdako sa lungsod sa Nasaret, si Jesus gitawag nga usa ka Nasaretnon, usa ka ngalan nga lagmit kabanay sa Hebreohanong pulong nga gigamit diha sa Isaias 11:1 alang sa “turok.”b—Mateo 2:23, potnot; Lucas 2:39, 40.
6. Unsang matanga sa magmamando ang Mesiyas sumala sa gitagna?
6 Unsa ba unyang matanga sa magmamando ang Mesiyas? Mahisama ba siya sa mapintas, gahig-ulong nga Asiryanhon nga naglaglag sa napulog-tribong amihanang gingharian sa Israel? Siyempre dili. Bahin sa Mesiyas, si Isaias nag-ingon: “Ang espiritu ni Jehova mopahiluna kaniya, ang espiritu sa kaalam ug sa pagsabot, ang espiritu sa tambag ug sa pagkagamhanan, ang espiritu sa kahibalo ug sa pagkahadlok kang Jehova; ug siya magkalipay diha sa pagkahadlok kang Jehova.” (Isaias 11:2, 3a) Ang Mesiyas gidihogan, dili sa lana, kondili sa balaang espiritu sa Diyos. Nahitabo kini panahon sa pagbawtismo kang Jesus, sa dihang si Juan nga Bawtista nakakita sa balaang espiritu sa Diyos nga mitugdong diha kang Jesus sa dagway sa usa ka salampati. (Lucas 3:22) Ang espiritu ni Jehova ‘mipahiluna diha’ kang Jesus, ug siya naghatag ug pamatuod niini sa dihang siya milihok uban ang kaalam, pagsabot, tambag, pagkagamhanan, ug kahibalo. Pagkamaayo kaayong mga hiyas sa usa ka magmamando!
7. Unsay gisaad ni Jesus ngadto sa iyang matinumanong mga sumusunod?
7 Ang mga sumusunod usab ni Jesus mahimong makadawat ug balaang espiritu. Sa usa sa iyang mga pakigpulong, si Jesus mipahayag: “Kon kamo, bisan tuod tuman-kadaotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga mohatag ang inyong Amahan ug balaang espiritu niadtong nagapangayo kaniya!” (Lucas 11:13) Busa, dili gayod kita magpanuko sa pagpangayo sa Diyos ug balaang espiritu, ni angay kitang mohunong sa pag-ugmad sa maayong mga bunga niini—“gugma, kangaya, pakigdait, taas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” (Galacia 5:22, 23) Si Jehova nagsaad nga tubagon ang hangyo sa mga sumusunod ni Jesus alang sa “kaalam gikan sa itaas” sa pagtabang kanila sa malamposong pagsagubang sa mga suliran sa kinabuhi.—Santiago 1:5; 3:17.
8. Sa unsang paagi si Jesus nagkalipay diha sa pagkahadlok kang Jehova?
8 Unsa ba ang pagkahadlok kang Jehova nga gipasundayag sa Mesiyas? Si Jesus dili gayod malisang sa Diyos, nga mahadlok sa iyang mahukmanong pagsaway. Hinunoa, ang Mesiyas adunay matinahurong kataha sa Diyos, usa ka mahigugmaong pagtahod kaniya. Ang usa ka tawong mahadlokon sa Diyos matinguhaon kanunay nga ‘mobuhat sa mga butang nga makapahimuot kaniya,’ sama sa gibuhat ni Jesus. (Juan 8:29) Pinaagi sa pulong ug sa panig-ingnan, si Jesus nagtudlo nga walay labaw nga kangaya kay sa pagkinabuhi kada adlaw diha sa maayong pagkahadlok kang Jehova.
Usa ka Matarong ug Maluluy-ong Maghuhukom
9. Unsang panig-ingnan ang gihatag ni Jesus ngadto niadtong may katungdanan sa paghukom sa mga butang diha sa Kristohanong kongregasyon?
9 Si Isaias nagtagnag dugang bahin sa mga kinaiya sa Mesiyas: “Siya dili mohukom sumala sa bisan unsang makita lamang sa iyang mga mata, ni mobadlong sumala lamang sa butang nga nadungog sa iyang mga dalunggan.” (Isaias 11:3b) Kon ikaw kinahanglang mobarog atubangan sa hukmanan, dili ka ba magmapasalamaton tungod sa usa ka maghuhukom nga sama niana? Sa iyang katungdanan ingong Maghuhukom sa tibuok katawhan, ang Mesiyas dili madani sa binakak nga mga argumento, inabtik nga mga taktika diha sa lawak-hukmanan, mga tabi, o panggawas nga mga hinungdan, sama sa bahandi. Siya makamatikod sa panglimbong ug motan-aw luyo sa dili-maayong panagway sa gawas, nga makaila sa “natago nga pagkatawo sa kasingkasing,” “ang natagong tawo.” (1 Pedro 3:4, potnot) Ang kinalabwang panig-ingnan ni Jesus nagsilbing sumbanan sa tanan nga may katungdanan sa paghukom sa mga butang diha sa Kristohanong kongregasyon.—1 Corinto 6:1-4.
10, 11. (a) Sa unsang paagi si Jesus nagtul-id sa iyang mga sumusunod? (b) Unsang paghukom ang gipahamtang ni Jesus sa mga daotan?
10 Sa unsang paagi ang labing maayong mga hiyas sa Mesiyas mag-impluwensiya sa iyang hudisyal nga mga paghukom? Si Isaias nagsaysay: “Uban sa pagkamatarong siya magahukom sa mga timawa, ug uban sa katul-id siya magahatag ug pagbadlong alang sa mga maaghop sa yuta. Ug iyang pagahampakon ang yuta pinaagi sa olisi sa iyang baba; ug pinaagi sa espiritu sa iyang mga ngabil iyang patyon ang daotan. Ug ang pagkamatarong mao ang bakos sa iyang balat-ang, ug ang pagkamatinumanon ang bakos sa ubos sa iyang hawak.”—Isaias 11:4, 5.
11 Sa dihang ang iyang mga sumusunod nagkinahanglag pagtul-id, gihatag kana ni Jesus sa paagi nga makahatag kanilag labing dakong kaayohan—usa ka ekselenteng panig-ingnan alang sa Kristohanong mga ansiyano. Sa laing bahin, kadtong nagbatasan sa pagkadaotan makadahom ug bug-at nga matang sa paghukom. Sa dihang ang Diyos makighusay na niining sistema sa mga butang, ang Mesiyas ‘maghampak sa yuta’ uban sa iyang awtoritatibong tingog, nga magpahayag ug paghukom sa kalaglagan alang sa tanang daotan. (Salmo 2:9; itandi ang Pinadayag 19:15.) Ngadtongadto, wala nay daotang mga tawo nga mabilin aron motugaw sa kalinaw sa katawhan. (Salmo 37:10, 11) Si Jesus, kay ang iyang balat-ang ug ubos nga hawak sinangkapan man sa pagkamatarong ug pagkamatinumanon, adunay gahom sa paghimo niini.—Salmo 45:3-7.
Nausob nga mga Kahimtang sa Yuta
12. Unsang mga kabalaka ang tingali nabatonan sa usa ka Hudiyo sa dihang siya nagpalandong sa pagpauli ngadto sa Yutang Saad gikan sa Babilonya?
12 Handurawa ang usa ka Israelinhong bag-o pang nasayod sa lagda ni Ciro nga ang mga Hudiyo mobalik ngadto sa Jerusalem ug tukoron pag-usab ang templo. Iya bang biyaan ang kasegurohan sa Babilonya aron himoon ang hataas nga panaw sa pagbalik? Sulod sa 70 ka tuig nga pagkawala sa Israel, ang biniyaang mga uma natuboan nag mga sagbot. Ang mga lobo, mga leopardo, mga leyon, ug mga oso karon libreng nagsuroysuroy niadtong maong mga uma. Ang mga kobra namuyo usab didto. Ang mamalik nga mga Hudiyo kinahanglang magdepende sa binuhing kahayopan aron mabuhi—mga panon sa karnero ug baka maghatag ug gatas, delana, ug karne, ug mga torong baka ang mobitad sa daro. Mabiktima kaha sila sa mga manunukob? Ang mga batang gagmay paakon ba sa mga halas? Komosta ang kapeligrohan sa pagkamabanhigan samtang nagapanaw?
13. (a) Unsang makapalipay-sa-kasingkasing nga hulagway ang gibatbat ni Isaias? (b) Sa unsang paagi atong nasayrang ang pakigdait nga gibatbat ni Isaias naglangkit ug labaw pa kay sa pagkawalay kapeligrohan gumikan sa ihalas nga mga hayop?
13 Si Isaias karon nagbatbat sa makapalipay-sa-kasingkasing nga hulagway sa mga kahimtang nga ipatungha sa Diyos sa yuta. Siya nag-ingon: “Ang lobo mopuyo gayod sa makadiyot uban sa laki nga nating karnero, ug ang leopardo mismo mohigda uban sa nating kanding, ug ang nating baka ug ang lambungayan nga nating leyon ug ang pinakaon-pag-ayo nga hayop manag-uban tanan; ug usa lamang ka gamayng bata nga lalaki ang mangulo kanila. Ug ang baka ug ang oso manibsib; manag-ipon sa paghigda ang ilang mga nati. Ug bisan ang leyon mokaon ug uhot sama sa torong baka. Ug ang bata nga masuso magadula sa lungag sa kobra; ug ang usa ka bata nga linutas mokuot nganha sa buho nga lutsanan sa kahayag sa malalang bitin. Sila dili mohimo ug bisan unsang kadaot o mopahinabog bisan unsang paggun-ob sa tibuok nakong bukid nga balaan; tungod kay ang yuta tinong mapuno sa kahibalo kang Jehova ingon sa katubigan nga nagtabon sa dagat mismo.” (Isaias 11:6-9) Dili ba makapatandog sa kasingkasing kadtong mga pulonga? Matikding ang pakigdait nga gibatbat dinhi maoy sangpotanan sa kahibalo bahin kang Jehova. Busa, labaw pa ang nalangkit kay sa pagkawalay kapeligrohan lamang gumikan sa ihalas nga mga hayop. Ang kahibalo kang Jehova dili makapausob sa mga hayop, apan kana mag-apektar sa mga tawo. Sa dalan pauli o sa napasig-uli nilang yuta ang mga Israelinhon dili na angayng mahadlok sa ihalas nga mga hayop o sa samag-hayop nga mga tawo.—Esdras 8:21, 22; Isaias 35:8-10; 65:25.
14. Unsa ang mas dakong katumanan sa Isaias 11:6-9?
14 Hinuon, kining tagnaa adunay mas dakong katumanan. Sa 1914, si Jesus, nga Mesiyas, naentrono sa langitnong Bukid sa Zion. Sa 1919 ang mga nahibilin sa “Israel sa Diyos” nakasinatig kagawasan gikan sa pagkabihag sa Babilonya ug nakigbahin sa pagpasig-uli sa matuod nga pagsimba. (Galacia 6:16) Ingong resulta, ang dalan nabuksan alang sa modernong-adlaw nga katumanan sa tagna ni Isaias sa Paraiso. Ang “tukmang kahibalo,” ang kahibalo bahin kang Jehova, nakapausob sa mga pagkatawo. (Colosas 3:9, 10) Ang kanhi mabangisong mga tawo nahimong makigdaiton. (Roma 12:2; Efeso 4:17-24) Ang maong mga panghitabo nag-apektar karon sa milyonmilyon tungod kay ang tagna ni Isaias naglakip sa kusog-nag-uswag nga gidaghanon sa mga Kristohanon nga may yutan-ong paglaom. (Salmo 37:29; Isaias 60:22) Kini sila nakakat-on sa pagpaabot sa panahon nga ang tibuok yuta mapasig-uli ingong may-kasegurohan, malinawon nga paraiso, sumala sa orihinal nga katuyoan sa Diyos.—Mateo 6:9, 10; 2 Pedro 3:13.
15. Makataronganon ba kitang makadahom nga ang mga pulong ni Isaias makabatog literal nga katumanan sa bag-ong kalibotan? Isaysay.
15 Nianang napasig-uling Paraiso, ang tagna ni Isaias aduna bay dugang, tingali mas literal, nga katumanan? Daw makataronganon ang paghunahuna niana. Ang tagna naghatag sa tanan nga magkinabuhi ubos sa pagmando sa Mesiyas sa samang pasalig nga gihatag niini ngadto sa namalik nga mga Israelinhon; sila ug ang ilang mga anak dili mobating mameligro nga madaot gikan sa bisan unsang tinubdan—tawo man o hayop. Ubos sa pagmando sa Mesiyas sa Gingharian, ang tanang molupyo sa yuta magtagamtam ug malinawong mga kahimtang nga sama niadtong natagamtam ni Adan ug Eva sa Eden. Siyempre, ang Kasulatan wala magbutyag sa tanang detalye kon sama sa unsa ang kinabuhi sa Eden—o kon sama unya sa unsa ang Paraiso. Apan, kita makasalig nga ubos sa maalamon ug mahigugmaong pagmando sa Haring Jesu-Kristo, ang tanan mamaingon gayod kon unsay angay niini.
Maputling Pagsimba nga Napasig-uli Pinaagi sa Mesiyas
16. Unsay nagbarog nga usa ka timaan alang sa katawhan sa Diyos sa 537 W.K.P.?
16 Ang maputling pagsimba unang giatake sa Eden sa dihang si Satanas malamposong nag-impluwensiya kang Adan ug Eva sa dili pagsugot kang Jehova. Hangtod karong adlawa, si Satanas wala mobiya sa iyang tumong sa pagpatalikod sa labing daghan kutob sa mahimo gikan sa Diyos. Apan si Jehova dili gayod motugot nga ang maputling pagsimba mahanaw gikan sa yuta. Ang iyang ngalan nalangkit, ug siya may pagtagad niadtong nag-alagad kaniya. Busa, pinaagi ni Isaias siya nagpahayag sa talagsaong saad: “Mahitabo nianang adlawa nga magbarog ang gamot ni Jese ingon nga usa ka timaan alang sa mga katawhan. Nganha kaniya bisan ang kanasoran moliso nga mapakisayoron, ug ang iyang dapit-pahulayanan magmahimayaon gayod.” (Isaias 11:10) Balik niadtong 537 W.K.P., ang Jerusalem, ang siyudad nga nahimo ni David nga kaulohan sa nasod, nagsilbing usa ka timaan, nga nag-awhag sa matinumanong nahibilin sa natibulaag nga Hudiyong katawhan sa pagbalik ug pagtukod pag-usab sa templo.
17. Sa unsang paagi si Jesus ‘mitungha aron sa pagmando sa mga nasod’ sa unang siglo ug sa atong adlaw?
17 Bisan pa niana, labaw pa niana ang gipunting sa tagna. Sumala sa nakita na, kini nagpunting sa pagmando sa Mesiyas, ang usa ka matuod nga Pangulo alang sa katawhan sa tanang nasod. Gikutlo ni apostol Pablo ang Isaias 11:10 sa pagpakita nga sa iyang adlaw ang mga tawo sa kanasoran makabaton ug dapit diha sa Kristohanong kongregasyon. Sa pagkutlo sa hubad sa Septuagint niining bersikuloha, siya misulat: “Nagaingon si Isaias: ‘Aduna unyay gamot ni Jese, ug aduna unyay usang motungha aron sa pagmando sa mga nasod; diha kaniya ang mga nasod magsandig sa ilang paglaom.’” (Roma 15:12) Dugang pa, ang tagna nakaabot sa unahan pa—hangtod sa atong adlaw sa dihang ang mga tawo sa kanasoran magpakita sa ilang gugma kang Jehova pinaagi sa pagpaluyo sa dinihogang mga igsoon sa Mesiyas.—Isaias 61:5-9; Mateo 25:31-40.
18. Sa atong adlaw, sa unsang paagi si Jesus nahimong usa ka tingbanan?
18 Sa modernong-adlawng katumanan, ang “nianang adlawa” nga gihisgotan ni Isaias nagsugod sa dihang ang Mesiyas naentrono ingong Hari sa langitnong Gingharian sa Diyos sa 1914. (Lucas 21:10; 2 Timoteo 3:1-5; Pinadayag 12:10) Sukad niadto, si Jesu-Kristo nahimong usa ka tin-awng timaan, usa ka tingbanan, alang sa espirituwal nga Israel ug sa mga tawo sa tanang kanasoran nga nangandoy ug matarong nga kagamhanan. Ubos sa pagtultol sa Mesiyas, ang maayong balita sa Gingharian gidala ngadto sa tanang nasod, sumala sa gitagna ni Jesus. (Mateo 24:14; Marcos 13:10) Kining maayong balita adunay gamhanang epekto. Ang “usa ka dakong panon, nga walay tawo ang makaihap, gikan sa tanang nasod” nagpasakop sa Mesiyas pinaagi sa pagduyog sa dinihogang nahibilin diha sa maputling pagsimba. (Pinadayag 7:9) Samtang daghang bag-ohan ang magpadayon sa pagpakig-uban sa nahibilin diha sa espirituwal nga “balay nga ampoanan” ni Jehova, ilang madugangan ang himaya sa “dapit-pahulayanan” sa Mesiyas, ang dakong espirituwal nga templo sa Diyos.—Isaias 56:7; Hageo 2:7.
Usa ka Nahiusang Katawhan Nag-alagad Kang Jehova
19. Sa unsang duha ka higayon nga gipasig-uli ni Jehova ang usa ka nahibilin sa iyang katawhan nga natibulaag sa tibuok yuta?
19 Si Isaias sunod nagpahinumdom sa mga Israelinhon nga si Jehova sa nangagi mitaganag kaluwasan alang kanila sa dihang ang nasod nag-atubang sa pagdaogdaog sa usa ka gamhanang kaaway. Kanang bahina sa kasaysayan sa Israel—ang pagpahigawas ni Jehova sa nasod gikan sa pagkabihag sa Ehipto—gimahal sa tanang matinumanong mga Hudiyo. Si Isaias misulat: “Mahitabo nianang adlawa nga si Jehova motunol pag-usab sa iyang kamot, sa ikaduhang higayon, aron mabatonan ang nahibilin sa iyang katawhan nga mahibilin gikan sa Asirya ug gikan sa Ehipto ug gikan sa Patros ug gikan sa Cus ug gikan sa Elam ug gikan sa Sinar ug gikan sa Hamat ug gikan sa kapuloan sa dagat. Ug siya tinong magpatindog ug usa ka timaan alang sa kanasoran ug magtigom sa mga natibuagsa sa Israel; ug ang mga natibulaag sa Juda iyang tapokon gikan sa upat ka tumoy sa yuta.” (Isaias 11:11, 12) Nga samag sila gikuptan sa kamot, si Jehova magaagak sa matinumanong nahibilin sa Israel ug sa Juda gikan sa mga nasod diin sila natibulaag ug dad-on sila sa ilang pinuy-anan nga luwas. Sa gamayng paagi, kini nahitabo sa 537 W.K.P. Apan, pagkamahimayaon pa ang dakong katumanan! Sa 1914, gipatindog ni Jehova ang naentronong si Jesu-Kristo ingong “usa ka timaan alang sa kanasoran.” Sugod sa 1919 ang mga nahibilin sa “Israel sa Diyos” misugod pagpanon ngadto sa maong timaan, nga ikag makig-ambit sa maputling pagsimba ubos sa Gingharian sa Diyos. Kining linaing espirituwal nga nasod mogula “gikan sa matag tribo ug dila ug katawhan ug nasod.”—Pinadayag 5:9.
20. Unsang panaghiusa ang tagamtamon sa katawhan sa Diyos sa ilang pagbalik gikan sa Babilonya?
20 Si Isaias niadto nagbatbat sa panaghiusa sa napasig-uling nasod. Nga nagtumong sa amihanang gingharian ingong Epraim ug sa habagatang gingharian ingong Juda, siya nag-ingon: “Ang pangabugho sa Epraim mahanaw gayod, ug bisan kadtong nagapakitag pagkamabatokon sa Juda pagalaglagon. Ang Epraim dili mangabugho sa Juda, ni ang Juda magpakitag pagkamabatokon sa Epraim. Ug sila molupad gayod diha sa abaga sa mga Filistehanon ngadto sa kasadpan; manag-uban nga ilang agawon ang mga anak sa Sidlakan. Ang Edom ug Moab mao ang ilang pagabakyawan sa ilang kamot, ug ang mga anak ni Ammon mao unya ang ilang mga sakop.” (Isaias 11:13, 14) Sa dihang ang mga Hudiyo namalik gikan sa Babilonya, sila wala na mabahin sa duha ka nasod. Ang mga membro sa tanang tribo sa Israel mobalik nga nahiusa ngadto sa ilang yuta. (Esdras 6:17) Sila dili na magpakitag kayugot ug pagkamabatokon sa usag usa. Ingong nahiusang katawhan, ilang himoon ang madaogong pagbarog batok sa ilang mga kaaway diha sa naglibot nga mga nasod.
21. Sa unsang paagi ang panaghiusa sa katawhan sa Diyos karong adlawa tinuod nga talagsaon?
21 Apan labi pang makapahingangha mao ang panaghiusa sa “Israel sa Diyos.” Ang 12 ka simbolikong mga tribo sa espirituwal nga Israel sulod sa duolag 2,000 ka tuig nagtagamtam ug panaghiusa nga gipasukad sa gugma alang sa Diyos ug alang sa ilang espirituwal nga mga igsoong lalaki ug babaye. (Colosas 3:14; Pinadayag 7:4-8) Karong adlawa, ang katawhan ni Jehova—ang espirituwal nga mga Israelinhon ug kadtong adunay yutan-ong paglaom—nagtagamtam sa pakigdait ug sa tibuok-kalibotang panaghiusa ubos sa pagmando sa Mesiyas, mga kahimtang nga wala hisayri diha sa mga iglesya sa Kakristiyanohan. Ang mga Saksi ni Jehova nagpadayag ug nagkahiusang espirituwal nga baroganan batok sa mga paningkamot ni Satanas nga babagan ang ilang pagsimba. Ingong usa ka katawhan, sila nagtuman sa sugo ni Jesus nga isangyaw ug itudlo ang maayong balita sa Gingharian sa Mesiyas sa tanang nasod.—Mateo 28:19, 20.
Mabuntog ang Kababagan
22. Sa unsang paagi si Jehova ‘magaputol sa dila sa dagat nga Ehiptohanon’ ug ‘mowarawara sa iyang kamot sa Suba’?
22 Adunay daghang babag, literal man ug masambingayon, sa pagpugong sa pagpamauli sa mga Israelinhon gikan sa pagkadestiyero. Sa unsang paagi mabuntog kana sila? Si Isaias nag-ingon: “Tinong putlon ni Jehova ang dila sa dagat nga Ehiptohanon, ug iwarawara ang iyang kamot sa Suba uban ang kainit sa iyang espiritu. Ug iyang pagahampakon kini sa pito niini ka bul-oganan, ug ang katawhan iya gayong palakton nga magsul-ob sa ilang mga sandalyas.” (Isaias 11:15) Si Jehova maoy magwagtang sa tanang babag sa pagpauli sa iyang katawhan. Bisan ang usa ka babag nga makahahadlok ingon sa usa ka dila sa Pulang Dagat (sama sa Gulpo sa Suez) o ingon ka di-malabang sama sa dakong Subang Eufrates pahubsan, ingnon ta, aron ang usa ka tawo makalabang nga dili na maghubo sa iyang sandalyas!
23. Sa unsang paagi aduna “unyay usa ka dakong dalan gikan sa Asirya”?
23 Sa adlaw ni Moises, si Jehova nag-andam ug dalan aron ang Israel makagawas sa Ehipto ug makapanaw paingon sa Yutang Saad. Buhaton niya karon ang susamang butang: “Aduna gayod unyay usa ka dakong dalan gikan sa Asirya alang sa nahibilin sa iyang katawhan nga mahibilin, ingon nga dihay usa alang sa Israel sa adlaw sa iyang paggula gikan sa yuta sa Ehipto.” (Isaias 11:16) Si Jehova ang magapanguna sa mamalik nga mga destiyero nga samag sila naglakaw subay sa usa ka dakong dalan gikan sa ilang dapit sa pagkadestiyero paingon sa ilang dapit-natawhan. Ang mga magsusupak mosulay sa pagpugong kanila, apan ang ilang Diyos, si Jehova, magauban kanila. Ang dinihogang mga Kristohanon ug ilang mga kauban karong adlawa susamang mailalom sa mapintasong pag-atake, apan sila moabante nga maisogon! Nanggula sila gikan sa modernong Asirya, ang kalibotan ni Satanas, ug tabangan nila ang uban sa paghimo niana. Nasayod sila nga ang maputling pagsimba molampos ug molambo. Kini dili buluhatong iya sa tawo, kondili iya sa Diyos.
Walay-Kataposang Pagmaya Alang sa mga Sakop sa Mesiyas!
24, 25. Pinaagi sa unsang mga pahayag sa pagdayeg ug pagpasalamat nga mosinggit ang katawhan ni Jehova?
24 Sa masadyaong mga pulong si Isaias karon nagbatbat sa kalipay sa katawhan ni Jehova tungod sa pagkatuman sa Iyang pulong: “Nianang adlawa ikaw tino nga moingon: ‘Ako magpasalamat kanimo, Oh Jehova, kay bisan tuod ikaw nasuko pag-ayo kanako, ang imong kasuko inanay nga mitalikod, ug ikaw naghupay kanako.’” (Isaias 12:1) Ang disiplina ni Jehova sa iyang masukihong katawhan maoy bug-at. Apan kini nagtuman sa katuyoan niini nga ayohon ang relasyon sa nasod uban kaniya ug ipasig-uli ang maputling pagsimba. Si Jehova nagpasalig sa iyang matinumanong mga magsisimba nga sa kataposan iyang pagaluwason sila. Dili katingad-an nga sila magpasalamat!
25 Sa bug-os napamatud-an sa napasig-uling mga Israelinhon ang ilang pagsalig kang Jehova, ug sila mosinggit: “‘Tan-awa! Ang Diyos mao ang akong kaluwasan. Ako mosalig ug dili kuyawan; kay si Jah Jehova mao ang akong kusog ug akong gahom, ug siya nahimong akong kaluwasan.’ Uban sa kasadya kamo tinong magkalos ug tubig gikan sa mga tubod sa kaluwasan.” (Isaias 12:2, 3) Ang Hebreohanong pulong nga gihubad “gahom” diha sa Isa 12 bersikulo 2 gihubad nga “pagdayeg” diha sa Septuagint nga bersiyon. Ang mga magsisimba mopatugbaw sa mga awit sa pagdayeg tungod sa kaluwasan gikan ni “Jah Jehova.” Ingong pinamubong porma sa ngalang Jehova, ang “Jah” gigamit diha sa Bibliya aron ipahayag ang mainitong mga pagbati sa pagdayeg ug pagpasalamat. Ang paggamit sa pamulong nga “Jah Jehova”—nga nagdoble sa balaang ngalan—magpauswag sa gikusgon sa pagdayeg sa Diyos ngadto sa taas pang ang-ang.
26. Kinsa karong adlawa ang nagpahibalo sa mga pakiglabot sa Diyos taliwala sa kanasoran?
26 Ang matuod nga mga magsisimba ni Jehova dili makatago sa ilang kalipay sa ilang kaugalingon. Si Isaias nagtagna: “Nianang adlawa kamo tinong moingon: ‘Pagpasalamat kamo kang Jehova! Tawga ang iyang ngalan. Ipahibalo taliwala sa mga katawhan ang iyang mga pakiglabot. Hisgoti nga ang iyang ngalan gibayaw. Mag-awit kamo kang Jehova, kay nakabuhat siya nga labaw gayod. Ginapahibalo kini sa tibuok yuta.’” (Isaias 12:4, 5) Sukad 1919, ang dinihogang mga Kristohanon—sa ulahi sa tabang sa ilang mga kauban nga “ubang mga karnero”—‘sa kaylap nagpahayag sa mga kahamili sa usa nga nagtawag kanila gikan sa kangitngit ngadto sa iyang katingalahang kahayag.’ Sila maoy “usa ka piniling rasa, . . . usa ka balaan nga nasod” nga gilain alang niining katuyoana. (Juan 10:16; 1 Pedro 2:9) Ang mga dinihogan nagpahayag nga ang balaang ngalan ni Jehova gituboy ug nagpakig-ambit sa pagpaila niana sa tibuok yuta. Sila nagapanguna sa tanang magsisimba ni Jehova sa pagmaya tungod sa iyang tagana alang sa ilang kaluwasan. Kini sama gayod sa gipatugbaw ni Isaias: “Singgit nga taliis ug singgit sa kalipay, Oh ikaw nga babayeng molupyo sa Zion, kay dako sa imong taliwala ang Balaang Usa sa Israel”! (Isaias 12:6) Ang Balaang Usa sa Israel mao si Jehova nga Diyos mismo.
Tan-aw sa Umaabot nga Masaligon!
27. Samtang nagpaabot sa pagkatuman sa ilang paglaom, diha sa unsa nga ang mga Kristohanon nagmasaligon?
27 Karong adlawa milyonmilyon ang nagpanon ngadto sa “timaan alang sa mga katawhan”—si Jesu-Kristo nga naentrono sa Gingharian sa Diyos. Sila nagmaya nga mahimong sakop nianang Ginghariana ug nalipay nga nakaila kang Jehova nga Diyos ug sa iyang Anak. (Juan 17:3) Sila nagkalipay pag-ayo sa ilang nahiusang Kristohanong panag-uban ug naningkamot gayod sa pagtipig sa pakigdait nga maoy ilhanan sa matuod nga mga alagad ni Jehova. (Isaias 54:13) Kay kombinsidong si Jah Jehova maoy Diyos nga magatuman sa iyang mga saad, sila masaligon diha sa ilang paglaom ug nagkalipay pag-ayo sa pagpakig-ambit niini sa uban. Hinaot ang matag magsisimba ni Jehova magpadayon sa paggamit sa bug-os niyang kusog sa pag-alagad sa Diyos ug sa pagtabang sa uban nga mohimo sa samang butang. Ipabutang sa kasingkasing sa tanan ang mga pulong ni Isaias ug magmaya diha sa kaluwasan pinaagi sa Mesiyas ni Jehova!
[Mga footnote]
a Ang “Mesiyas” gikuha gikan sa Hebreohanong pulong nga ma·shiʹach, nga nagkahulogang “Dinihogang Usa.” Ang Gregong katumbas maoy Khri·stosʹ, o “Kristo.”—Mateo 2:4, potnot.
b Ang Hebreohanong pulong alang sa “turok” maoy neʹtser, ug alang sa “Nasaretnon” maoy Nots·riʹ.
[Mga hulagway sa panid 158]
Ang Mesiyas maoy “usa ka gamayng sanga” gikan ni Jese, pinaagi ni Haring David
[Tibuok-panid nga hulagway sa panid 162]
[Hulagway sa panid 170]
Ang Isaias 12:4, 5, ingon nga makita kini diha sa Linukot nga mga Basahon sa Patayng Dagat (Ang ngalan sa Diyos gipatataw)