Aron Mahuptan ang Usa ka Higala, Kinahanglang Ikaw Usa ka Higala

Gipasukad sa gugma ang panaghigalaay. Sa dihang modaghan ang imong makat-onan bahin kang Jehova, mas modako ang imong gugma kaniya. Samtang motubo ang imong gugma sa Diyos, motubo usab ang imong tinguha nga moalagad kaniya. Magpalihok kini kanimo nga mahimong tinun-an ni Jesu-Kristo. (Mateo 28:19) Pinaagig pagduyog sa malipayong pamilya sa mga Saksi ni Jehova, imong masinati ang panaghigalaay uban sa Diyos sa walay kataposan. Unsay angay nimong buhaton?

Angay nimong ipakita ang imong gugma sa Diyos pinaagi sa pagsunod sa iyang mga balaod. “Ang paghigugma sa Diyos nagakahulogan niini, nga atong sundon ang iyang mga sugo; ug gani ang iyang mga sugo dili man mabug-at.”​—1 Juan 5:3.

Ipadapat ang imong makat-onan. Nag-asoy si Jesus ug usa ka estorya nga nag-ilustrar niini. Ang usa ka maalamong tawo nagtukod sa iyang balay diha sa bato. Ang usa ka buangbuang nga tawo nagtukod sa iyang balay diha sa balas. Pag-abot sa kusog nga bagyo, ang balay nga gitukod diha sa bato wala mahugmak, apan ang balay nga gitukod diha sa balas grabe ang pagkahugmak. Matod ni Jesus nga kadtong magpatalinghog sa iyang mga pagtulon-an ug magbuhat niini mahisama sa maalamong tawo nga nagtukod diha sa bato. Apan kadtong makadungog sa iyang mga pagtulon-an ug dili magbuhat niini mahisama sa buangbuang nga tawo nga nagtukod diha sa balas. Haing tawhana ikaw buot nga mahisama?​—Mateo 7:24-27.

Pagpahinungod. Nagpasabot kini nga moduol ka kang Jehova sa pag-ampo ug sultihi siya nga buot kang mobuhat sa iyang kabubut-on sa walay kataposan. Ang pagbuhat sa kabubut-on sa Diyos magpakita nga ikaw maoy tinun-an ni Jesu-Kristo.​—Mateo 11:29.

Bawtismo. “Pabawtismo na ug hugasi ang imong mga sala pinaagi sa imong pagtawag sa iyang ngalan.”​—Buhat 22:16.

Pakigbahin sa bug-os sa pag-alagad sa Diyos. “Bisan unsa man ang inyong ginabuhat, buhata kini nga tibuok-kalag ingon nga alang kang Jehova, ug dili alang sa mga tawo.”​—Colosas 3:23.