Kapitulo Bayente

Ibutang Kanunay sa Hunahuna ang Adlaw ni Jehova

 1. Sa dihang unang nahibaloan nimo nga duol na ang kagawasan gikan sa mga kagul-anan niining daang sistema, unsay imong gibati?

USA sa unang mga butang nga nahibaloan nimo gikan sa Bibliya mao nga maoy katuyoan ni Jehova nga maparaiso ang tibuok yuta. Sa maong bag-ong kalibotan, mahanaw na ang gubat, krimen, kakabos, sakit, pag-antos, ug kamatayon. Bisan ang mga patay ipasig-uli sa kinabuhi. Pagkatalagsaong mga palaaboton! Ang pagkatuman nianang tanan gipasiugda sa ebidensiya nga ang dili-makitang presensiya ni Kristo isip nagamandong Hari nagsugod sa 1914 ug sukad niadto ania na kita sa kataposang mga adlaw niining daotang kalibotan. Sa kataposan niining kataposang mga adlaw, si Jehova maglaglag niining presenteng sistema sa mga butang ug magpasulod sa gisaad nga bag-ong kalibotan!

 2. Unsa “ang adlaw ni Jehova”?

² Gitawag sa Bibliya kining umaabot nga panahon sa paglaglag nga “adlaw ni Jehova.” (2 Pedro 3:10) Kini mao “ang adlaw sa kasuko ni Jehova” batok sa tibuok kalibotan ni Satanas. (Sofonias 2:3) Kini modangat sa tayuktok niini sa “gubat sa dakong adlaw sa Diyos nga Labing Gamhanan . . . , nga gitawag sa Hebreohanon nga Har–​Magedon [Armagedon],” diin “ang mga hari sa tibuok gipuy-ang yuta” pagalaglagon. (Pinadayag 16:​14, 16) Ang imong pagkinabuhi nagpasundayag ba sa imong kombiksiyon nga kining “adlaw ni Jehova” haduol na?​—Sofonias 1:14-18; Jeremias 25:33.

 3. (a) Kanus-a moabot ang adlaw ni Jehova? (b) Sa unsang paagi napamatud-ang mapuslanon nga si Jehova wala magbutyag “nianang adlawa o taknaa”?

³ Ang Bibliya wala magsulti kanato sa eksaktong petsa sa dihang si Jesu-Kristo moabot isip Tiglaglag ni Jehova batok sa sistema sa mga butang ni Satanas. “Mahitungod nianang adlawa o taknaa walay nahibalo, ni ang mga manulonda sa langit ni ang Anak, kondili ang Amahan lamang,” matod ni Jesus. (Marcos 13:32) Kon si bisan kinsa wala gayod mahigugma kang Jehova, makiling sila nga ilangan ang iyang adlaw diha sa ilang mga hunahuna ug moliso sa sekular nga mga pangagpas. Apan silang nahigugma gayod kang Jehova moalagad kaniya sa bug-os kalag, walay sapayan kon kanus-a moabot ang kalaglagan niining daotang sistema.​—Salmo 37:4; 1 Juan 5:3.

 4. Unsay giingon ni Jesus silbing usa ka pasidaan?

⁴ Silbing pasidaan alang sa mga nahigugma kang Jehova, si Jesus nag-ingon: “Magpadayon sa pagtan-aw, magpadayon sa pagtukaw, kay wala kamo mahibalo kon kanus-a ang tinudlong panahon.” (Marcos 13:33-37) Siya nag-awhag kanato nga dili tugotan ang pagkaon ug pag-inom o “mga kabalaka sa kinabuhi” nga makakuha sa atong dakong pagtagad nga kita malimot sa kaseryoso sa kapanahonan.​—Lucas 21:34-36; Mateo 24:37-42.

 5. Sumala sa gisaysay ni Pedro, unsa ang ipahinabo sa adlaw ni Jehova?

⁵ Si Pedro susamang nagtambag kanato nga ibutang kanunay sa hunahuna “ang presensiya sa adlaw ni Jehova, nga pinaagi niini ang mga langit nga nagadilaab mangaugdaw ug ang mga elemento tungod sa hilabihang kainit mangatunaw.” Ang tanang tawhanong mga gobyerno​—“ang mga langit”—​pagalaglagon, ingon man ang katibuk-an nga daotang tawhanong katilingban​—ang “yuta”—​ug ang “mga elemento” niini, ang mga ideya ug mga kalihokan niining daotang kalibotan, sama sa tinamdan niini nga pagkaindependente gikan sa Diyos ug sa imoral ug sa materyalistikanhong pagkinabuhi. Pulihan kini sa “bag-ong mga langit [langitnong Gingharian sa Diyos] ug usa ka bag-ong yuta [usa ka bag-ong yutan-ong katilingban]” diin “magpuyo ang pagkamatarong.” (2 Pedro 3:10-13) Ang maong makapauyog-sa-kalibotan nga mga panghitabo mosugod nga kalit ug sa wala-dahoma nga adlaw ug takna.​—Mateo 24:44.

Magpabiling Igmat sa Ilhanan

 6. (a) Sa unsang sukod ang tubag ni Jesus sa pangutana sa iyang mga tinun-an mapadapat sa kataposan sa Hudiyohanong sistema? (b) Unsang mga bahin sa tubag ni Jesus ang magpaila sa mga panghitabo ug sa mga tinamdan sukad sa 1914 padayon?

⁶ Tungod sa kapanahonan nga atong ginapuy-an, kita angayng masinati pag-ayo sa mga detalye sa daghag-bahing ilhanan nga magpaila sa kataposang mga adlaw​—“ang kataposan sa sistema sa mga butang.” Ibutang sa hunahuna nga sa gitubag ni Jesus ang pangutana sa iyang mga tinun-an, nga nahitala sa Mateo 24:​3, ang pipila sa iyang gibatbat sa mga bersikulo 4 hangtod 22 may gamayng katumanan diha sa Hudiyohanong sistema tali sa 33 ug 70 K.P. Apan ang tagna may dakong katumanan sa yugtong sukad sa 1914, ang panahon sa “presensiya [ni Kristo] ug sa kataposan sa sistema sa mga butang.” Ang Mateo 24:23-28 nag-asoy kon unsay mahitabo sukad sa 70 K.P. hangtod sa panahon sa presensiya ni Kristo. Ang mga panghitabo nga gibatbat sa Mateo 24:29–​25:46 mahitabo sa panahon sa kataposan.

 7. (a) Nganong sa personal angayng magmaigmat kita kon sa unsang paagi ang mga kahimtang karon maoy katumanan sa ilhanan? (b) Tubaga ang mga pangutana sa kataposan niining parapoha, nga magpakita kon sa unsang paagi natuman ang ilhanan sukad sa 1914.

⁷ Sa personal kita angayng magmapaniiron sa mga panghitabo ug mga tinamdan nga maoy katumanan sa ilhanan. Ang paglangkit niining mga butanga uban sa tagna sa Bibliya motabang kanato sa pagbutang kanunay sa hunahuna sa adlaw ni Jehova. Kini makapaarang usab nato nga makapakombinsir sa dihang magpasidaan sa uban bahin sa pagkaduol sa maong adlaw. (Isaias 61:​1, 2) Uban sa maong mga tumong sa hunahuna, atong repasohon ang sunod nga mga pangutana nga nagpasiugda sa mga bahin sa ilhanan, ingon nga nahitala sa Mateo 24:7 ug Lucas 21:​10, 11.

Sa unsang talagsaong paagi nga ang gitagnang pagtindog sa ‘nasod batok nasod ug gingharian batok gingharian’ natuman sugod sa 1914? Mahitungod sa mga gubat, unsay nahitabo sukad niadto?

Sa 1918, unsang mananakod nga sakit ang mihunos ug mas daghang kinabuhi kay sa Gubat sa Kalibotan I? Bisan pa sa medikal nga kahibalo sa tawo, unsang mga sakita ang nagpatay pag milyonmilyon?

Sa unsang gidak-on ang mga kanihit sa pagkaon nakaapektar sa yuta bisan pa sa siyentipikanhong mga kauswagan sa miaging siglo?

Unsay makapakombinsir kanimo nga ang 2 Timoteo 3:1-5, 13 nagabatbat, dili sa naandang paagi sa kinabuhi, kondili sa paagi nga ang daotang mga kahimtang misamot samtang nagasingabot kita sa kataposan sa kataposang mga adlaw?

Pagbulagbulag sa mga Tawo

 8. (a) Unsa pa, nga gibatbat sa Mateo 13:24-30, 36-43, ang gilangkit ni Jesus sa kataposan sa sistema sa mga butang? (b) Unsay ipasabot sa ilustrasyon ni Jesus?

⁸ Adunay ubang makahuloganong mga panghitabo nga gilangkit ni Jesus sa kataposan sa sistema sa mga butang. Usa niini mao ang pagbulagbulag sa “mga anak sa gingharian” gikan sa “mga anak sa usa nga daotan.” Gihisgotan kini ni Jesus diha sa iyang sambingay bahin sa usa ka uma sa trigo nga gisapawan pagpugas ug mga bunglayon. “Ang trigo” diha sa iyang ilustrasyon naghawas sa matuod nga dinihogang mga Kristohanon. “Ang mga bunglayon” mao kadtong nag-angkong mga Kristohanon apan nagpamatuod nga “mga anak sa usa nga daotan” tungod kay nangupot sila sa kalibotan nga ang magmamando mao ang Yawa. Sila gibulag gikan sa “mga anak sa gingharian [sa Diyos]” ug gimarkahan alang sa kalaglagan. (Mateo 13:24-30, 36-43) Aktuwal bang nahitabo ang pagbulagbulag?

 9. (a) Human sa Gubat sa Kalibotan I, unsang dakong pagbulagbulag sa tanang nag-angkong Kristohanon ang nahitabo? (b) Sa unsang paagi ang dinihogang mga Kristohanon mihatag ug ebidensiya nga sila maoy tinuod nga mga alagad sa Gingharian?

⁹ Human sa Gubat sa Kalibotan I, dihay pagbulagbulag sa tanan nga nag-angkong Kristohanon ngadto sa duha ka matang: (1) Ang klero sa Kakristiyanohan ug ang ilang mga sumusunod, kinsa nagpahayag nga nagsuportar gayod sa Liga sa Kanasoran (karon ang Hiniusang Kanasoran) samtang hugot nga nangupot sa ilang pagkamaunongon sa nasod, ug (2)  matuod nga mga Kristohanon sa maong tapos-gubat nga panahon, kinsa mihatag sa ilang bug-os nga pagsuportar sa Mesiyanikong Gingharian sa Diyos, dili sa mga nasod niining kalibotana. (Juan 17:16) Sila nagpamatuod nga tinuod nga mga alagad sa Gingharian sa Diyos pinaagi sa pagtuman sa pagwali “niining maayong balita sa gingharian” sa tibuok yuta. (Mateo 24:14) Unsay mga resulta?

10. Unsa ang unang resulta sa buluhaton sa pagwali sa Gingharian?

¹⁰ Una, diha ang pagtigom sa nahibilin sa mga dinihogan sa espiritu sa Diyos, kinsa nakabaton sa paglaom nga makauban ni Kristo ingong bahin sa langitnong Gingharian. Bisan pag kana sila natibulaag sa mga nasod, sila nagkahiusa sa usa ka organisasyon. Nagsingabot na ang pagkatapos sa pagpamatik sa maong mga dinihogan.​—Pinadayag 7:​3, 4.

11. (a) Unsang buluhaton sa pagtigom ang nagpadayon, ug nahiuyon sa unsang tagna? (b) Unsay kahulogan sa pagkatuman niining tagnaa?

¹¹ Human niana, ubos sa pagtultol ni Kristo, nagsugod ang pagtigom sa “usa ka dakong panon . . . gikan sa tanang kanasoran ug mga tribo ug katawhan ug mga pinulongan.” Sila mao ang naglangkob sa “ubang mga karnero” nga molabang-buhi sa “dakong kasakitan” sa bag-ong kalibotan sa Diyos. (Pinadayag 7:​9, 14; Juan 10:16) Kining buluhaton sa pagwali sa Gingharian sa Diyos sa dili pa moabot ang kataposan nagpadayon hangtod niining panahona. Sa kamaunongon, ang dakong panon sa ubang mga karnero, nga karon mokabat ug milyonmilyon, nagtabang sa dinihogang nahibilin sa pagmantala sa bililhong mensahe sa Gingharian. Kining mensahea nadunggan sa tanang nasod.

Unsay Mahitabo sa Unahan?

12. Unsa ka dako pang pagwali ang pagabuhaton sa dili pa moabot ang adlaw ni Jehova?

¹² Ang tanang ebidensiya nagpasabot nga haduol na kita sa kataposan sa kataposang mga adlaw ug nagsingabot na ang adlaw ni Jehova. Apan aduna bay mga tagna nga pagatumanon pa sa dili pa mosugod ang maong makalilisang nga adlaw? Oo. Sa usa ka butang, ang pagbulagbulag sa mga tawo tungod sa isyu sa Gingharian wala pa matapos. Sa pipila ka dapit diin ang grabeng pagsupak nasinati sulod sa katuigan, adunay pag-uswag karon sa bag-ong mga tinun-an. Bisan sa dapit nga ang mga tawo dili modawat sa maayong balita, ang kaluoy ni Jehova gipasundayag pinaagi sa atong pagpamatuod. Busa, magpadayon sa buluhaton! Si Jesus nagpasalig kanato nga sa dihang matapos na ang buluhaton, ang kalaglagan moabot.

13. Sumala sa nahitala sa 1 Tesalonica 5:​2, 3, unsang talagsaong panghitabo ang mahitabo pa, ug unsay ipasabot unya niana alang kanato?

¹³ Ang laing makahuloganon kaayong tagna sa Bibliya nagtagna: “Sa dihang sila magaingon: ‘Kalinaw ug kasegurohan!’ unya ang kalit nga kalaglagan modangat dihadiha kanila sama sa pag-ul-ol sa kasakit sa usa ka babayeng mabdos; ug dili gayod sila makaikyas.” (1 Tesalonica 5:​2, 3) Kon sa unsang paagi himoon ang maong pagmantala sa “kalinaw ug kasegurohan” tan-awonon pa. Apan kini wala gayod magpasabot nga ang mga pangulo sa kalibotan nakasulbad sa mga suliran sa katawhan. Kadtong naghunahuna kanunay sa adlaw ni Jehova dili malimbongan sa maong pagmantala. Sila nahibalo nga human dayon niana, ang kalit nga kalaglagan moabot.

14. Unsa unya ang mga panghitabo panahon sa dakong kasakitan, ug unsa ang han-ay sa mga panghitabo?

¹⁴ Sa sinugdanan sa dakong kasakitan, ang mga magmamando mosumbalik sa Dakong Babilonya, ang tibuok-kalibotang imperyo sa bakak nga relihiyon, ug maglaglag kaniya. (Mateo 24:21; Pinadayag 17:​15, 16) Human niana, ang mga nasod mosumbalik niadtong nagpaluyo sa pagkasoberano ni Jehova, nga magpukaw sa kapungot ni Jehova batok sa politikanhong mga kagamhanan ug sa ilang mga tigpaluyo, nga mosangpot sa bug-os nga kalaglagan alang kanila. Kana unya ang tayuktok sa dakong kasakitan nga mao ang Armagedon. Unya, si Satanas ug ang iyang mga demonyo itambog sa bung-aw, nga dili na makaimpluwensiya sa katawhan. Kini maoy magtapos sa adlaw ni Jehova sa dihang ang iyang ngalan mabalaan na.​—Ezequiel 38:​18, 22, 23; Pinadayag 19:11–​20:3.

15. Nganong dili maalamon ang pagpangatarongan nga ang adlaw ni Jehova halayo pa?

¹⁵ Ang kalaglagan niining sistemaha moabot sa eksakto gayong panahon, sumala sa eskedyul sa Diyos. Dili kini maulahi. (Habacuc 2:3) Hinumdomi, ang kalaglagan sa Jerusalem sa 70 K.P. kalit nga nahitabo, sa dihang wala kana dahoma sa mga Hudiyo, sa dihang naghunahuna sila nga wala na ang kapeligrohan. Ug komosta ang karaang Babilonya? Kadto maoy gamhanan, masaligon, ug kinutaan ug dagko kaayong mga paril. Apan napukan kadto sa usa ka gabii. Busa, ang kalit nga kalaglagan modangat usab sa presenteng daotang sistema. Sa dihang modangat kini, hinaot nga kita makaplagang nahiusa sa matuod nga pagsimba, nga naghunahuna kanunay sa adlaw ni Jehova.

Repasong Panaghisgot

• Nganong hinungdanon ang pagbutang kanunay sa hunahuna sa adlaw ni Jehova? Sa unsang paagi mahimo nato kana?

• Sa unsang paagi apektado kita sa personal sa nagakahitabo nga pagbulagbulag sa mga tawo?

• Unsay anaa sa unahan sa dili pa mosugod ang adlaw ni Jehova? Busa, unsay angay natong buhaton sa personal?

[Mga hulagway sa panid 180, 181]

Sa dili madugay ang kataposang mga adlaw matiwas na uban sa pagkalaglag sa sistema ni Satanas