Higugmaa ang mga Tawo nga Gihigugma sa Diyos

1-3. (a) Unsang di-malalis nga kamatuoran ang gipahayag sa Bibliya? (b) Sa unsang paagi makapili kitag mga higala nga maayog impluwensiya kanato?

ANG mga tawo sa usa ka paagi nahisamag mga espongha; lagmit makasuhop o maapektohan sila sa anaa sa ilang palibot. Bisan pag dili tuyoon, dali kaayo kitang matakdan sa mga tinamdan, mga sukdanan, ug mga kinaiya sa mga tawo nga kanunay natong ikauban.

² Nagpahayag ang Bibliya ug di-malalis nga kamatuoran sa nag-ingon kini: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” (Proverbio 13:20) Kini nga proverbio wala maghisgot ug sulagma nga pagpakig-uban. Ang mga pulong “nagalakaw uban” nagpasabot sa makanunayong pagpakig-uban.a Kini ang komento sa usa ka reperensiya sa Bibliya bahin niini: “Ang paglakaw uban sa usa ka tawo nagpasabot nga imong gihigugma ug gimahal siya.” Dili ba gusto man natong sundogon ang mga tawo nga atong gihigugma? Sa pagkatinuod, kay may pagbati man kita kanila, sila makaimpluwensiya gayod kanato​—sa kaayohan o sa kadaotan.

³ Aron magpabilin kita sa gugma sa Diyos, hinungdanon nga mangita kitag mga higala nga makahatag ug maayong impluwensiya kanato. Sa unsang paagi mahimo nato kana? Sa yanong pagkasulti, pinaagi sa paghigugma sa mga tawo nga gihigugma sa Diyos ug sa pagpakighigala sa iyang mga higala. Hunahunaa kini. Dili ba labing maayo nga pilion natong ikauban kadtong may mga hiyas nga gipangita ni Jehova diha sa iyang mga higala? Nan, atong susihon ang matang sa mga tawo nga gihigugma sa Diyos. Kon ang panglantaw ni Jehova tin-aw sa atong kaisipan, kita makapilig mga higala nga maayog impluwensiya kanato.

 4. Nganong may katungod si Jehova sa pagpili kon kinsay himoon niyang mga higala, ug nganong gitawag ni Jehova si Abraham nga “akong higala”?

⁴ Pilion gayod ni Jehova kon kinsay himoon niyang mga higala. Dili ba siya may katungod man niana? Siyempre, kay siya ang Soberanong Ginoo sa uniberso, ug labing dakong kadungganan ang pagpakighigala kaniya. Nan, kinsay iyang ginapili ingong iyang mga higala? Si Jehova nga Diyos makigsuod niadtong may pagsalig ug bug-os nga nagtuo kaniya. Pananglitan, tagda ang patriarkang si Abraham nga ilado tungod sa iyang talagsaong pagtuo. Usa gayod ka dakong pagsulay sa pagtuo nga ang usa ka amahan sugoon nga ihalad ang iyang anak.b Bisan pa niana, si Abraham “sama ug naghalad na kang Isaac,” kay bug-os siyang nagtuo “nga ang Diyos makahimo sa pagbangon kaniya bisan gikan sa mga patay.” (Hebreohanon 11:17-19) Tungod kay si Abraham nagpakitag dakong pagtuo ug nagmasinugtanon, siya mabinationg gitawag ni Jehova nga “akong higala.”​—Isaias 41:8; Santiago 2:21-23.

 5. Unsay panglantaw ni Jehova niadtong nagmaunongon ug nagmasinugtanon kaniya?

⁵ Giisip ni Jehova nga hinungdanon kaayo ang pagkamaunongon ug pagkamasinugtanon kaniya. Iyang gihigugma ang mga tawo nga kinabubut-ong magmaunongon kaniya. (2 Samuel 22:26) Ingon sa atong nasabtan sa Kapitulo 1 niining libroha, malipay kaayo si Jehova kon ang mga tawo magmasinugtanon kaniya tungod sa gugma. Matod sa Proverbio 3:32: “Ang Iyang pagpakigsuod anaa uban sa mga matul-id.” Kadtong nakakab-ot sa mga kinahanglanon sa Diyos makadawat ug imbitasyon gikan ni Jehova: Sila mahimong mga dinapit sa iyang “tolda” nga may kagawasan sa pagsimba ug pag-ampo kaniya sa tanang panahon.​—Salmo 15:1-5.

 6. Sa unsang paagi ikapakita nato ang atong gugma alang kang Jesus, ug unsay bation ni Jehova sa mga nahigugma sa iyang Anak?

⁶ Gihigugma ni Jehova ang mga nahigugma kang Jesus, ang iyang bugtong Anak. Si Jesus miingon: “Kon ang usa nahigugma kanako, sundon niya ang akong pulong, ug higugmaon siya sa akong Amahan, ug kami moadto kaniya ug mopuyo uban niya.” (Juan 14:23) Sa unsang paagi ikapakita nato ang gugma alang kang Jesus? Pinaagi sa pagtuman sa iyang mga sugo, lakip ang sugo nga isangyaw ang maayong balita ug maghimog mga tinun-an. (Mateo 28:19, 20; Juan 14:15, 21) Ikapakita usab nato ang atong gugma alang kang Jesus sa dihang kita ‘magasunod pag-ayo sa iyang mga tunob,’ nga mosundog kaniya sa pulong ug buhat kutob sa atong mahimo ingong dili-hingpit nga mga tawo. (1 Pedro 2:21) Malipay gayod si Jehova kon ang mga tawo maningkamot sa pagsunod sa mga tunob sa iyang Anak tungod sa ilang gugma kaniya.

 7. Nganong maalamon nga makighigala sa mga higala ni Jehova?

⁷ Ang pagtuo, pagkamaunongon, pagkamasinugtanon, ug gugma alang kang Jesus ug sa iyang mga sukdanan nalakip sa mga hiyas nga gipangita ni Jehova diha sa Iyang mga higala. Maayong pangutan-on nato ang atong kaugalingon: ‘Makita ba ang maong mga hiyas ug mga sukdanan diha sa suod kong mga higala? Gihimo ko bang mga higala ang mga higala ni Jehova?’ Maalamon gayod kana. Mapuslanon kanato ang mga tawong nag-ugmad ug diyosnong mga hiyas ug masibotong nagsangyaw sa maayong balita sa Gingharian tungod kay kita maimpluwensiyahan nila nga magmatinguhaon gayod nga pahimut-an ang Diyos.​—Tan-awa ang kahon nga “Kinsa bay Matawag nga Usa ka Maayong Higala?”

 8. Nganong makadayeg ka sa panaghigala (a) ni Noemi ug Ruth? (b) sa tulo ka batan-ong Hebreohanon? (c) ni Pablo ug Timoteo?

⁸ Ang Kasulatan adunay daghang pananglitan sa mga tawong nakabenepisyo tungod sa pagpilig maayong mga higala. Imong mabasa ang bahin kang Noemi ug sa iyang umagad nga si Ruth, sa tulo ka batan-ong Hebreohanon nga suod nga managhigala didto sa Babilonya, ug kang Pablo ug Timoteo. (Ruth 1:16; Daniel 3:17, 18; 1 Corinto 4:17; Filipos 2:20-22) Apan atong hisgotan ang laing talagsaong pananglitan: ang panaghigala ni David ug Jonatan.

9, 10. Unsay gibasehan sa panaghigala ni David ug Jonatan?

⁹ Ang Bibliya nag-ingon nga human patya ni David si Goliat, “ang kalag ni Jonatan nalanggikit sa kalag ni David, ug si Jonatan nahigugma kaniya ingon sa iyang kaugalingong kalag.” (1 Samuel 18:1) Niana nagsugod ang ilang way-bugto nga panaghigala bisan pag dakog gintang ang ilang mga edad, nga mihangtod sa pagkamatay ni Jonatan diha sa panggubatan.c (2 Samuel 1:26) Unsay gibasehan sa ilang panaghigala?

¹⁰ Nagkasuod si David ug Jonatan tungod sa ilang gugma alang sa Diyos ug sa ilang dakong tinguha nga magmaunongon kaniya. Sila nahiusa sa ilang tinguha nga pahimut-an ang Diyos. Sila nagpasundayag ug mga hiyas nga maoy nakapasuod kanila sa usag usa. Walay duhaduha nga si Jonatan nakadayeg sa kaisog ug kasibot ni David nga maisogong milaban sa ngalan ni Jehova. Seguradong gitahod usab ni David si Jonatan nga maunongong nagpaluyo sa mga kahikayan ni Jehova ug di-mahakogong nag-una sa kaayohan ni David. Pananglitan, tagda ang nahitabo kang David samtang siya naguol pag-ayo ug nagtagotago sa kamingawan aron makaikyas sa dakong kasuko sa daotan nga si Haring Saul, nga amahan ni Jonatan. Ingong talagsaong pasundayag sa pagkamaunongon, si Jonatan mismo “miadto kang David . . . aron mapalig-on niya ang iyang kamot labot sa Diyos.” (1 Samuel 23:16) Hunahunaa kon unsay gibati ni David sa dihang miabot ang iyang suod nga higala nga nagpalig-on ug nagdasig kaniya!d

11. Unsay imong makat-onan gikan sa panaghigala ni Jonatan ug David?

¹¹ Unsay atong makat-onan gikan sa pananglitan ni Jonatan ug David? Labaw sa tanan, labing hinungdanon nga ang managhigala adunay samang mga prinsipyo may kalabotan sa ilang relasyon uban sa Diyos. Kon makigsuod kita niadtong sama natog mga tinuohan, mga prinsipyo sa moral, ug tinguha nga magmatinumanon sa Diyos, lagmit adunay pagbayloay ug mga panghunahuna, mga pagbati, ug mga kasinatian nga makapadasig ug makapalig-on kanato. (Roma 1:11, 12) Atong makaplagan ang maong mahunahunaon-sa-espirituwal nga mga higala taliwala sa atong mga isigkamagsisimba. Apan nagpasabot ba kini nga ang tanang nagtambong sa mga tigom sa Kingdom Hall maoy maayong mga kauban? Wala hinuon.

12, 13. (a) Nganong angay kitang magmapilion sa atong mga higala bisan taliwala sa atong mga isigka-Kristohanon? (b) Unsang suliran ang nasinati sa mga kongregasyon sa unang-siglo, ug unsang kusganong mga pasidaan ang gihatag ni Pablo?

¹² Bisan diha sa kongregasyon, angay kitang magmapilion kon gusto natong ang atong mga higala makapalig-on sa atong pagtuo. Matingala ba kita niini? Dili gayod. Ang pipila ka Kristohanon diha sa kongregasyon dugay tingaling mohamtong sa espirituwal, sama ra nga may bunga sa usa ka kahoy nga dugayng mahinog. Busa masabtan nato nga dili managsama ang espirituwal nga pag-uswag sa mga Kristohanon diha sa matag kongregasyon. (Hebreohanon 5:12–6:3) Siyempre, angay kitang magpailob ug magpakitag gugma sa mga bag-ohan o luya sa pagtuo tungod kay buot natong tabangan sila nga mohamtong sa espirituwal.​—Roma 14:1; 15:1.

¹³ May kahimtang tingali sa usa ka kongregasyon nga kinahanglan kitang magmabinantayon kon kinsay atong ikauban. Kaduhaduhaan tingali ang moral nga panggawi sa pipila. Basin nahimong mayugtanon o reklamador ang uban. Kini ug ang susamang mga suliran nasinati sa mga kongregasyon sa unang siglo K.P. Bisan pag ang kadaghanang membro nagmatinumanon, ang pipila nahimong badlonganon. Tungod kay may pipila sa kongregasyon sa Corinto nga wala na mouyon sa pipila ka Kristohanong pagtulon-an, si apostol Pablo nagpasidaan sa kongregasyon: “Ayaw pagpahisalaag. Ang daotang pakig-uban makadaot sa mapuslanong pamatasan.” (1 Corinto 15:12, 33) Si Pablo nagpasidaan kang Timoteo nga bisan taliwala sa mga isigka-Kristohanon, mahimong may pipila nga dili magtinarong. Giingnan si Timoteo nga magpalayo siya sa maong mga tawo, nga dili makigsuod kanila.​—2 Timoteo 2:20-22.

14. Sa unsang paagi ikapadapat nato ang prinsipyo luyo sa mga pasidaan ni Pablo bahin sa pagpakig-uban?

¹⁴ Sa unsang paagi ikapadapat nato ang mga prinsipyo luyo sa mga pasidaan ni Pablo? Pinaagi sa dili pagpakigsuod kang bisan kinsa​—sa sulod o gawas sa kongregasyon—​nga mahimong daotang impluwensiya. (2 Tesalonica 3:6, 7, 14) Angay natong panalipdan ang atong relasyon uban kang Jehova. Hinumdomi nga samag espongha, kita makasuhop o matakdan sa mga tinamdan ug mga panggawi sa atong suod nga mga higala. Sama ra nga dili nato matuslob ang espongha diha sa suka ug dahomon nga kana matumog ug tubig, busa kita dili mahimong makig-uban niadtong makahatag ug daotang impluwensiya ug magdahom nga matakdan kitag maayong mga kinaiya.​—1 Corinto 5:6.

15. Unsay angay nimong himoon aron makakaplag kag mga higala nga mahunahunaon sa espirituwal sulod sa kongregasyon?

¹⁵ Maayo kay posible gayod nga kita makakaplag ug maayong mga higala taliwala sa atong mga isigkamagsisimba. (Salmo 133:1) Sa unsang paagi makakaplag kag mga higala nga mahunahunaon sa espirituwal sa sulod sa kongregasyon? Samtang nag-ugmad kag diyosnong mga hiyas ug mga panggawi, seguradong maangayan ka sa uban nga nanlimbasog usab sa pagpahimuot sa Diyos. Sa samang higayon, kinahanglang molihok ka aron makakitag bag-ong mga higala. (Tan-awa ang kahon nga “Kon Unsay Among Gihimo Aron Makabaton ug Maayong mga Higala.”) Pangitaa kadtong may mga hiyas nga buot usab nimong ipakita. Sunda ang tambag sa Bibliya nga “magpasangkad,” nga mangitag mga higala taliwala sa mga isigkamagtutuo nga lahig rasa, nasyonalidad, o kultura. (2 Corinto 6:13; 1 Pedro 2:17) Dili ka lang makig-uban sa mga pareho nimog edad. Hinumdomi nga si Jonatan magulang kaayo kang David. Magmauswagon ang inyong panaghigala tungod sa daghang kasinatian ug kaalam sa edarang mga tawo.

16, 17. Kon nasilo kita sa usa ka isigkamagsisimba, nganong dili kita angayng mobiya sa kongregasyon?

¹⁶ Tungod kay ang kongregasyon gilangkoban man ug nagkalainlaing personalidad ug kahimtang sa kinabuhi, lagmit motungha ang mga suliran matag karon ug unya. Basin may masulti o mabuhat ang isigkamagtutuo nga makapasilo kanato. (Proverbio 12:18) Ang mga panagbangi tungod sa personalidad, di-pagsinabtanay, o sukwahing mga opinyon mao usahay ang hinungdan sa panagbingkil. Mapandol ba kita tungod sa maong panagbingkil ug mobiya sa kongregasyon? Dili, kon kita adunay tiunay nga gugma alang kang Jehova ug niadtong iyang gihigugma.

¹⁷ Tungod kay si Jehova atong Maglalalang ug Tigsustento-sa-Kinabuhi, siya takos gayod sa atong gugma ug bug-os nga debosyon. (Pinadayag 4:11) Dugang pa, ang kongregasyon nga iyang gigamit takos usab sa atong maunongong pagpaluyo. (Hebreohanon 13:17) Busa kon nasilo o nahiubos kita sa usa ka isigkamagsisimba, dili kita mobiya sa kongregasyon aron ipakita ang atong dakong kasuko. Nganong mobiya man kita? Dili si Jehova ang nakapasilo kanato. Tungod sa atong gugma kang Jehova, dili gayod kita motalikod kaniya ug sa iyang katawhan!​—Salmo 119:165.

18. (a) Unsay atong mahimo aron motunhay ang pakigdait sa kongregasyon? (b) Unsay moresultang mga panalangin kon pilion nato nga magpasaylo kon aduna kanay pasikaranan?

¹⁸ Ang atong gugma alang sa mga isigkamagsisimba maoy magdasig kanato sa pagpatunhay sa pakigdait diha sa kongregasyon. Dili mangita si Jehova ug kahingpitan gikan sa mga tawo nga iyang gihigugma, ug mao man usab kita. Palabyon ra nato ang ginagmayng mga kalapasan tungod sa gugma, kay nahinumdom nga kitang tanan dili hingpit ug makahimog mga sayop. (Proverbio 17:9; 1 Pedro 4:8) Ang gugma makatabang kanato nga kinabubut-ong magpasaylo kanunay sa usag usa. (Colosas 3:13) Dili kanunayng sayon nga ipadapat kining tambaga. Kon dili nato pukgoon ang daotang mga pagbati, lagmit magpabilin ang atong kayugot, nga maghunahunang ang atong kasuko maoy magsilbing silot sa nakasala. Apan sa pagkatinuod, madaot kita kon magpabilin ang atong kayugot. Dagayang panalangin hinuon ang moresulta kon pilion nato nga magpasaylo kon aduna kanay pasikaranan. (Lucas 17:3, 4) Kini mohatag kanatog kalinaw sa hunahuna ug kasingkasing, mopatunhay sa pakigdait sa kongregasyon ug, labaw sa tanan, manalipod sa atong relasyon uban kang Jehova.​—Mateo 6:14, 15; Roma 14:19.

19. Unsang mga kahimtang ang mahimong motungha nga kinahanglang dili na kita makig-uban sa usa ka tawo?

¹⁹ Usahay, tambagan kita nga dili na makig-uban sa usa ka membro sa kongregasyon. Motungha kining kahimtanga sa dihang gipalagpot ang usa ka tawo nga nakalapas sa balaod sa Diyos ug wala maghinulsol o sa dihang ang usa nahimong apostata o mibulag sa kongregasyon. Ang Pulong sa Diyos tin-awng nagsugo kanato nga “mohunong na sa pagpakig-uban” niining mga tawhana.e (1 Corinto 5:11-13; 2 Juan 9-11) Tingali lisod gayod nga likayan ang usa ka tawo nga nahimo natong higala o paryente. Magmalig-on ba gayod kita, nga sa ingon atong ipakita nga ang pagkamaunongon kang Jehova ug sa iyang matarong nga mga balaod maoy atong giuna labaw sa tanan? Ayawg kalimti nga si Jehova nagpabili gayod sa atong pagkamaunongon ug pagkamasinugtanon.

20, 21. (a) Nganong ang pagpalagpot maoy mahigugmaong kahikayan? (b) Nganong kinahanglang magmaalamon kita sa pagpili sa atong mga kauban?

²⁰ Ang kahikayan sa pagpalagpot usa gayod ka mahigugmaong tagana ni Jehova. Ngano man? Ang pagpalagpot sa usa ka dili-mahinulsolong makasasala magpasundayag ug gugma alang kang Jehova ug sa iyang mga sukdanan. (1 Pedro 1:15, 16) Mahuptang luwas ang kongregasyon tungod niini. Mapanalipdan niini ang matinumanong mga membro batok sa daotang impluwensiya sa tinuyong mga makasasala ug makapadayon sila sa ilang pagsimba tungod kay nahibalo nga ang kongregasyon maoy luwas nga dapit niining daotang kalibotan. (1 Corinto 5:7; Hebreohanon 12:15, 16) Ang pagpalagpot maoy pagpasundayag ug gugma alang sa nakasala. Basin kini makapatandog pag-ayo kaniya ug makaamgo nga kinahanglan siyang mohimog mga tikang aron mapasig-uli ang iyang relasyon uban kang Jehova.​—Hebreohanon 12:11.

²¹ Sa pagkatinuod, ang atong suod nga mga kauban dako gayod ug impluwensiya kanato. Busa, kinahanglang magmaalamon kita sa pagpili sa atong mga kauban. Pinaagi sa pagpakighigala sa mga higala ni Jehova, sa paghigugma sa mga gihigugma sa Diyos, malibotan kita ug labing maayong mga kauban. Ang atong makat-onan kanila motabang kanato nga magmatinguhaon nga pahimut-an gayod si Jehova.