“Ang Pulong ni Jehova Padayong Mikaylap”

1-4. Unsang lisod nga kahimtang ang giatubang ni Pedro, ug unsay imong bation kon ikaw pay naa sa iyang kahimtang?

KUSOG ang tagingting sa dako nga puthawng ganghaan sa dihang gisira kini sa pagsulod ni Pedro. Siya ginapos ug kinadenahan taliwala sa duha ka Romanong guwardiya dihang gidala siya ngadto sa iyang selda. Unya daghang oras o kaha mga adlaw pa siyang nagpaabot kon unsay mahitabo kaniya. Wala siyay laing nakita gawas sa bungbong ug rehas sa selda, posas ug kadena, ug iyang mga guwardiya.

² Bug-at ang silot nga ipahamtang kang Pedro. Gusto ni Haring Herodes Agripa I nga ipapatay siya.a Gani gusto niya nga ipaatubang si Pedro ngadto sa katawhan human sa Paskuwa ug sentensiyahag kamatayon aron pahimut-an ang mga tawo. Kadto dili lang panghulga. Ang usa sa mga apostoles nga kauban ni Pedro, si Santiago, di pa dugay nga gipapatay sa maong hari.

³ Kadto ang gabii una sa gitakdang panahon sa pagpatay kaniya. Unsay gihunahuna ni Pedro samtang naa siya sa ngiob nga selda? Nahinumdom ba siya sa gisulti ni Jesus sa nangaging mga tuig nga moabot ang panahon nga siya gaposon ug patyon? (Juan 21:18, 19) Tingali naghunahuna si Pedro nga miabot na ang maong panahon.

⁴ Kon ikaw pay diha sa kahimtang ni Pedro, unsay imong bation? Daghan ang mawad-ag paglaom. Apan ang tinuod ba nga mga sumusunod ni Jesu-Kristo mawad-ag paglaom? Unsay atong makat-onan sa reaksiyon ni Pedro ug sa iyang mga isigka-Kristohanon sa paglutos nga ilang naagoman? Atong tan-awon.

5, 6. (a) Ngano ug sa unsang paagi gilutos ni Haring Herodes Agripa I ang Kristohanong kongregasyon? (b) Nganong ang pagkamatay ni Santiago usa ka pagsulay sa kongregasyon?

⁵ Atong nasayran sa miaging kapitulo niini nga publikasyon nga ang Kristohanong kongregasyon nalipay gayod tungod sa pagkakombertir sa Hentil nga si Cornelio ug sa iyang pamilya. Apan puwerteng kurata sa dili magtutuo nga mga Hudiyo dihang nahibal-an nila nga daghang Kristohanong Hudiyo ang nakig-uban na sa mga dili Hudiyo diha sa pagsimba.

⁶ Tungod kay si Herodes maro kaayo nga politiko, kadto giisip niyang kahigayonan aron mauyonan siya sa mga Hudiyo, mao nga iyang gilutos ang mga Kristohanon. Lagmit iyang nadunggan nga si apostol Santiago suod kaayo ni Jesu-Kristo. Busa, si Herodes ‘nagpatay kang Santiago nga igsoon ni Juan pinaagig espada.’ (Buh. 12:2) Grabe gyod to nga pagsulay sa kongregasyon! Si Santiago usa sa tulo ka apostoles nga nakakita sa transpigurasyon ni Jesus ug sa ubang mga milagro nga wala ipadayag ngadto sa ubang apostoles. (Mat. 17:1, 2; Mar. 5:37-42) Si Santiago ug ang iyang igsoong si Juan ginganlan ni Jesus ug “Mga Anak sa Dalugdog” tungod sa ilang talagsaong kadasig. (Mar. 3:17) Busa pagkamatay ni apostol Santiago, ang kongregasyon nawad-ag maisogon, matinumanong saksi, ug minahal nga apostol.

7, 8. Unsay reaksiyon sa kongregasyon sa pagkabilanggo ni Pedro?

⁷ Sumala sa gidahom ni Agripa, ang pagpatay kang Santiago nakapalipay sa mga Hudiyo. Tungod sa maong reaksiyon, si Pedro ang sunod niyang gipuntirya. Sumala sa gihisgotan sa sinugdan, iyang gipadakop si Pedro. Apan nahinumdoman tingali ni Agripa nga sa nangagi ang mga apostoles milagrosong nakagawas sa bilanggoan, sumala sa gihisgotan sa Kapitulo 5 niining libroha. Aron maseguro nga dili makaikyas si Pedro, siya gipagapos ni Herodes ug gikadenahan taliwala sa 2 ka guwardiya, ug may 16 pa ka guwardiya nga nagrelyebo adlaw ug gabii. Enkasog makaikyas siya, ang silot ni Pedro ipahamtang kanila. Unsay mahimo sa mga isigkamagtutuo ni Pedro sa maong pait nga kahimtang?

⁸ Ang kongregasyon nahibalo gayod kon unsay angayng himoon. Ang Buhat 12:5 nag-ingon: “Busa si Pedro gitener sa bilanggoan, apan ang kongregasyon tim-os ug mapinadayonong nag-ampo sa Diyos alang kaniya.” Oo, kinasingkasing silang nag-ampo alang sa ilang minahal nga igsoon. Wala sila mawad-ig paglaom tungod sa kamatayon ni Santiago, ug wala sila maghunahuna nga ang pag-ampo walay kapuslanan. Ang mga pag-ampo bililhon kaayo kang Jehova. Kon nahiuyon sa iyang kabubut-on, kana iyang dunggon. (Heb. 13:18, 19; Sant. 5:16) Kini maoy hinungdanong leksiyon alang sa mga Kristohanon karon.

9. Unsay atong makat-onan gikan sa panig-ingnan sa mga isigkamagtutuo ni Pedro bahin sa pag-ampo?

⁹ Naa ba kay nahibaloan nga mga igsoon nga nagsagubang ug daghang pagsulay? Sila mahimong nagsagubang ug paglutos, pagdili sa gobyerno, o mga kalamidad. Dili ba mas maayong ilakip nato sila sa kinasingkasing natong mga pag-ampo? Tingali naa pod kay nailhan nga nagsagubang ug ubang problema, sama sa problema sa pamilya, kahigawad, o pagsulay sa ilang pagtuo. Kon mamalandong ka una mag-ampo, lagmit naa kay mahunahunaan nga puwede nimong iapil sa imong pag-ampo kang Jehova, ang “Tigpatalinghog sa pag-ampo.” (Sal. 65:2) Ug gusto pod nimo nga iapil ka sa mga igsoon sa ilang mga pag-ampo kon ikaw may mga problema.

10, 11. Isaysay kon giunsa pagpagawas si Pedro sa usa ka anghel ni Jehova gikan sa bilanggoan.

¹⁰ Nabalaka ba si Pedro bahin sa iyang dangatan? Wala kita makaseguro, apan sa kataposang gabii sa bilanggoan, hinanok siyang nakatulog taliwala sa duha ka guwardiya. Nahibalo gayod siya nga bisag unsay mahitabo pagkaugma, dili siya biyaan ni Jehova. (Roma 14:7, 8) Apan wala gayod damha ni Pedro ang katingalahang mga butang nga hapit nang mahitabo. Kalit nga mihayag ang selda. Unya may usa ka anghel nga nagbarog nga wala makita sa mga guwardiya, ug gidalidali niyag pukaw si Pedro. Ug naunsa ba nga nangatangtang man kadtong lig-on kaayong mga kadena sa iyang mga kamot!

¹¹ Dayon gisugo si Pedro sa anghel: “Tindog dayon! . . . Pag-ilis ug isul-ob ang imong sandalyas. . . . Isul-ob ang imong panggawas nga besti.” Dihadiha misunod si Pedro. Unya ang anghel miingon: “Padayon sa pagsunod kanako,” ug misunod si Pedro. Sila migula sa selda ug ila rang gilabyan ang mga bantay sa gawas, ug hilom silang mipaingon sa dako nga puthawng ganghaan. Unsaon kaha nila paggawas? Kon ugaling nakapangutana ana si Pedro, kana natubag dayon. Sa duol na sila sa ganghaan, “naabli ra kinig iya.” Nakaagi dayon sila ug sa didto na sila sa dalan, ang anghel nawala. Naamgohan ni Pedro nga tinuod diay kadtong tanan. Dili kadto usa ka panan-awon. Siya nakagawas na!—Buh. 12:7-11.

12. Nganong makapalig-on kanato ang pagpamalandong bahin sa pagpagawas ni Jehova kang Pedro gikan sa bilanggoan?

¹² Dili ba makapalig-on kanato kon atong pamalandongon ang way kinutobang gahom ni Jehova sa pagluwas sa iyang mga alagad? Si Pedro gidakop sa usa ka hari nga suportado sa labing gamhanang nasod sa kalibotan niadtong panahona. Apan sayon kaayo siyang nakagawas sa bilanggoan! Tinuod, ang maong mga milagro dili himoon ni Jehova alang sa tanan niyang alagad. Kana wala niya himoa kang Santiago; ug wala niya luwasa si Pedro sa dihang natuman na ang gitagna ni Jesus bahin kaniya. Ang mga Kristohanon karon dili magdahom nga luwason sila sa milagrosong paagi. Apan atong hinumdoman nga si Jehova dili mausab. (Mal. 3:6) Ug sa di madugay iyang gamiton ang iyang Anak sa pagpagawas sa minilyon gikan sa samag bilanggoan—ang kamatayon. (Juan 5:28, 29) Ang maong mga saad makapalig-on gayod kanato sa dihang makasagubang kitag mga pagsulay karon.

13-15. (a) Unsay reaksiyon sa mga membro sa kongregasyon nga nagtigom sa balay ni Maria pag-abot ni Pedro? (b) Unsay sunod nga gihisgotan sa Mga Buhat, ug unsay padayong gihimo ni Pedro alang sa iyang kaigsoonan?

¹³ Didto na si Pedro sa ngitngit nga dalan, nga naghunahuna kon asa siya moadto. Unya nakadesisyon siya. Nagpuyo sa duol ang Kristohanong babaye nga si Maria. Kay ang balong si Maria lagmit dato, ang iyang balay dako ug matigoman sa usa ka kongregasyon. Siya ang inahan ni Juan Marcos nga gihisgotan sa unang higayon diha sa Mga Buhat ug samag anak ni Pedro. (1 Ped. 5:13) Bisag gabii na kaayo, daghang membro sa kongregasyon ang nagkatigom sa balay ni Maria ug nag-ampo nga kinasingkasing. Walay duhaduha nga sila nag-ampo nga makagawas unta si Pedro, apan wala nila damha ang tubag ni Jehova sa ilang pag-ampo!

¹⁴ Nanuktok si Pedro sa ganghaan sa hawanan atubangan sa balay. Ang sulugoong babaye nga si Roda—komon nga ngalang Grego nga nagkahulogang “Rosas”—mao ang miadto sa ganghaan. Wala siya makatuo sa iyang nadungog. Kadto tingog gayod ni Pedro! Imbes ablihan ang ganghaan, ang nahinam nga babaye midagan balik sa balay ug iyang gibiyaan si Pedro nga nagtindog sa dalan. Ug iyang gikombinsir ang mga igsoon nga si Pedro ang nanuktok. Miingon sila nga siya nabuang na, apan mipadayon siya sa pagkombinsir kanila. Nagtuo ang pipila nga basin usa kadto ka anghel nga nagrepresentar kang Pedro. (Buh. 12:12-15) Apan padayong nanuktok si Pedro mao nga nangadto sila sa ganghaan ug giablihan kana.

¹⁵ Didto sa ganghaan, “ilang nakita siya ug sila natingala”! (Buh. 12:16) Gipahilom ni Pedro ang ilang kabanha aron maestorya niya ang iyang kasinatian ug gipasugilon kana ngadto sa tinun-ang si Santiago ug sa kaigsoonan, ug unya siya mibiya dayon kay basig maapsan siya sa mga sundalo ni Herodes. Si Pedro mibiya aron ipadayon ang iyang pag-alagad sa mas luwas nga dapit. Gawas sa iyang tabang sa pagsulbad sa isyu bahin sa pagtuli nga gihisgotan sa Buhat kapitulo 15, siya wala na mahisgoti. Ang kalihokan ug mga panaw ni apostol Pablo mao na ang sunod nga gihisgotan sa Mga Buhat. Bisan pa niana, makaseguro kita nga si Pedro nakapalig-on sa pagtuo sa iyang kaigsoonan bisan diin siya miadto. Pagbiya ni Pedro, malipayon na ang grupo nga didto sa balay ni Maria.

16. Nganong makasalig kita nga matagamtam nato ang malipayong mga panahon sa umaabot?

¹⁶ Usahay, labaw pa ang ihatag ni Jehova kay sa gidahom sa iyang mga alagad, nga halos dili sila makatuo niana. Kanay gibati sa mga isigkamagtutuo ni Pedro niadtong gabhiona. Mao pod tingali nay atong bation usahay dihang atong madawat ang dagayang panalangin ni Jehova. (Prov. 10:22) Sa umaabot, atong makita ang katumanan sa tanang saad ni Jehova sa tibuok yuta. Ang talagsaong mga katumanan seguradong labaw pa kay sa ato karong mahanduraw. Busa kon kita magmatinumanon, makasalig kita nga matagamtam nato ang malipayong mga panahon sa umaabot.

17, 18. Unsay hinungdan nga giulog-ulogan si Herodes?

¹⁷ Dihang nakaikyas si Pedro, nahingangha sab si Herodes apan wala siya malipay. Dihadiha gimando ni Herodes ang pagpangita kaniya, ug gisukitsukit niya ang mga guwardiya ni Pedro. Nagsugo siya nga “silotan sila,” tingali pinaagi sa pagpatay nila. (Buh. 12:19) Si Herodes Agripa dili maluluy-on. Gisilotan ba kining daotang tawo?

¹⁸ Lagmit naulaw si Agripa kay napakyas siya sa pagpapatay kang Pedro, apan wala madugay mitokar na pod ang iyang garbo. Ang pipila niya ka kaaway buot makigdait kaniya, ug lagmit interesado kaayo siyang mohatag ug pakigpulong atubangan sa daghang tawo. Si Lucas miingon nga agig pagpangandam, “si Herodes nagsul-ob ug harianong besti.” Ang Hudiyong historyanong si Josephus misulat nga ang besti ni Herodes ginama sa plata, busa ang hari naggilakgilak sa dihang siya nahayagan. Dayon ang hambogirong politiko mihatag ug pakigpulong. Ang maulog-ulogong panon naninggit: “Tingog kana sa diyos, dili sa tawo!”—Buh. 12:20-22.

19, 20. (a) Nganong si Herodes gisilotan ni Jehova ug kamatayon? (b) Sa unsang paagi makahupay kanato ang asoy bahin sa kalit nga kamatayon ni Herodes Agripa?

¹⁹ Diyos lamang ang angay sa maong himaya, ug siya nagtan-aw! May kahigayonan unta si Herodes sa paglikay sa silot. Mahimong badlongon niya ang panon o dili siya mouyon kanila. Apan ang nahitabo kaniya nahimong ebidensiya nga tinuod gayod ang giingon sa panultihon: “Ang garbo moresultag kadaot.” (Prov. 16:18) “Dihadiha gihampak siya sa anghel ni Jehova.” Ingong resulta, ang maong garbosong tawo nga kaugalingon ray gihunahuna nakaagom ug ngilngig nga kamatayon. Si Herodes ‘gikaon sa mga ulod ug namatay.’ (Buh. 12:23) Miingon usab si Josephus nga si Agripa kalit nga gihampak ug sakit ug ang hari nagtuo nga himalatyon na siya kay iyang gidawat ang pagdayeg sa mga tawo. Misulat si Josephus nga si Agripa nasakit sulod sa lima ka adlaw sa wala pa siya namatay.b

²⁰ Usahay, ang mga tawong dili diyosnon morag wala siloti bisag nagbuhat sila sa tanang klase sa pagkadaotan. Dili kita angayng matingala ana, kay “ang tibuok kalibotan nailalom sa gahom sa usa nga daotan.” (1 Juan 5:19) Bisan pa niana, ang matinumanong mga alagad sa Diyos usahay matugaw sa dihang ang mga tawong daotan morag makalingkawas sa silot. Mao ni usa sa mga hinungdan nga kini nga asoy makapahupay. Sa pagkatinuod, nakita nato nga si Jehova mangilabot, nga nagpahinumdom sa tanan niyang alagad nga siya mahigugmaon sa hustisya. (Sal. 33:5) Sa madugay o sa madali, ipatuman niya ang iyang hustisya.

21. Unsa ang pangunang leksiyon sa Buhat kapitulo 12, ug nganong makahupay kini kanato karon?

²¹ Ang konklusyon niini nga asoy adunay mas makapadasig nga leksiyon: “Ang pulong ni Jehova padayong mikaylap ug daghan pa ang nahimong magtutuo.” (Buh. 12:24) Ang maong report sa pag-uswag sa buluhatong pagsangyaw magpahinumdom kanato nga si Jehova nagpanalangin usab sa samang buluhaton karon. Tin-aw nga ang asoy sa Buhat kapitulo 12 dili lang bahin sa pagkamatay sa usa ka apostol ug ang pag-ikyas sa laing apostol gikan sa bilanggoan. Bahin kini kang Jehova ug kon giunsa niya pagpakyas ang mga paningkamot ni Satanas sa pagwagtang sa Kristohanong kongregasyon ug sa pagpugong sa madasigong pagsangyaw. Napakyas kadto nga mga pag-atake, ingon man ang tanan pang samang taktika. (Isa. 54:17) Sa laing bahin, kadtong dapig kang Jehova ug kang Jesu-Kristo nakigbahin sa usa ka buluhaton nga dili gayod mapakyas. Dili ba makapadasig kana? Dako gayong pribilehiyo nga kita makatabang sa pagpakaylap sa “pulong ni Jehova”!