Pabilhi ang Regalo nga Kinabuhi

 1. Kinsay naghatag natog kinabuhi?

SI Jehova “ang Diyos nga buhi.” (Jeremias 10:10) Siya ang atong Maglalalang ug naghatag natog kinabuhi. Ang Bibliya nag-ingon: “Gilalang nimo ang tanang butang, ug tungod sa imong kabubut-on sila milungtad ug nalalang.” (Pinadayag 4:11) Oo, gusto ni Jehova nga duna tay kinabuhi. Kini bililhong regalo gikan niya.​—Basaha ang Salmo 36:9.

 2. Unsay atong himoon aron molampos ta?

² Gihatagan ta ni Jehova sa atong mga panginahanglan aron mabuhi, sama sa pagkaon ug tubig. (Buhat 17:28) Pero dili lang kana. Gusto niya nga malipay ta. (Buhat 14:15-17) Aron molampos ta, kinahanglan natong sundon ang mga balaod sa Diyos.​—Isaias 48:17, 18.

 3. Unsay gibuhat ni Jehova dihang gipatay ni Cain si Abel?

³ Ang Bibliya nagtudlo nga ang atong kinabuhi ug ang kinabuhi sa uban bililhon kang Jehova. Pananglitan, dihang si Cain​—anak ni Adan ug Eva—​nasuko pag-ayo sa iyang manghod nga si Abel, gipasidan-an ni Jehova si Cain nga dili magpadala sa iyang kasuko. Pero wala siya mamati. Misamot siyag kasuko maong iyang ‘gipatay ang iyang igsoong si Abel.’ (Genesis 4:3-8) Gisilotan ni Jehova si Cain sa pagpatay kang Abel. (Genesis 4:9-11) Busa ang kasuko ug pagdumot peligroso kay kini makapahimo natong bayolente o pintas. Ang tawo nga ingon niana dili makadawat ug kinabuhing walay kataposan. (Basaha ang 1 Juan 3:15.) Aron mapalipay si Jehova, kinahanglan natong higugmaon ang tanang tawo.​—1 Juan 3:11, 12.

 4. Unsay gitudlo kanato sa balaod nga gihatag sa Diyos sa mga Israelinhon bahin sa kinabuhi?

⁴ Linibo ka tuig sa ulahi, gipakita ni Jehova nga bililhon kaniya ang kinabuhi dihang gihatag niya ang Napulo ka Sugo kang Moises. Kini ang usa sa mga balaod: “Ayaw pagpatay.” (Deuteronomio 5:17) Kon ang usa ka tawo tinuyong mopatay, patyon sab siya.

 5. Unsay panglantaw sa Diyos bahin sa aborsiyon?

⁵ Unsay panglantaw sa Diyos bahin sa aborsiyon? Bililhon kang Jehova bisan ang kinabuhi sa wala pa matawong bata. Sa Balaod nga gihatag ni Jehova sa mga Israelinhon, siya miingon nga kon dunay makahimog kadaot sa usa ka mabdos ug unya namatay ang bata, ang maong tawo patyon. (Basaha ang Exodo 21:22, 23; Salmo 127:3.) Kini nagtudlo nato nga daotan ang aborsiyon.​—Tan-awa ang Endnote 28.

6, 7. Unsaon nato pagpakita kang Jehova nga gipabilhan nato ang kinabuhi?

⁶ Unsaon nato pagpakita kang Jehova nga gipabilhan nato ang atong kinabuhi ug ang kinabuhi sa uban? Pinaagi sa dili pagpameligro sa atong kinabuhi o sa kinabuhi sa uban. Busa dili ta manigarilyo, magmamà, ug magdroga, kay kini makadaot ug mahimong moresultag kamatayon.

⁷ Ang Diyos naghatag natog kinabuhi ug lawas, ug kinahanglang gamiton nato kini sumala sa iyang gusto. Busa ampingan nato ang atong lawas. Kay kon dili, hugaw ta sa panan-aw sa Diyos. (Roma 6:19; 12:1; 2 Corinto 7:1) Dili ta makasimba kang Jehova, kinsa naghatag natog kinabuhi, kon dili nato ni pabilhan. Bisan pa tingalig lisod kaayo ang pag-undang sa dili maayong mga bisyo, tabangan ta ni Jehova kon maningkamot ta kay giisip natong bililhon ang kinabuhi.

 8. Unsay atong himoon aron dili mameligro ang atong kinabuhi o ang kinabuhi sa uban?

⁸ Atong nakat-onan nga bililhong regalo ang kinabuhi. Si Jehova may pagsalig nga dili gyod nato ipameligro ang atong kinabuhi o ang kinabuhi sa uban. Makita ni sa atong paagi sa pagdrayb. Dili ta moapil ug sports nga delikado o bayolente. (Salmo 11:5) Paningkamotan pod nato nga walay bisan unsang makapameligro diha sa atong balay. Gisugo ni Jehova ang mga Israelinhon: “Kon magtukod kag balay, buhatig barandilya ang imong atop, aron walay tawong mahulog ug dili mahimong sad-an sa dugo ang imong pamilya.”​—Deuteronomio 22:8.

 9. Unsaon nato pagtratar ang mga hayop?

⁹ Bisan ang pagtratar nato sa mga hayop importante kang Jehova. Gitugotan ta niyang mopatay ug hayop alang sa pagkaon ug sinina ug kon kini nagpameligro sa atong kinabuhi. (Genesis 3:21; 9:3; Exodo 21:28) Pero dili nato sila pasakitan o patyon aron lang malingaw ta.​—Proverbio 12:10.

10. Giunsa nato pagkahibalo nga ang dugo nagsimbolo sa kinabuhi?

¹⁰ Para kang Jehova, ang dugo balaan kay nagsimbolo kini sa kinabuhi. Human patya ni Cain si Abel, giingnan ni Jehova si Cain: “Ang dugo sa imong igsoon nagpakiluoy kanako gikan sa yuta.” (Genesis 4:10) Ang dugo ni Abel nagsimbolo sa iyang kinabuhi, ug gisilotan ni Jehova si Cain kay gipatay niya si Abel. Human sa Lunop sa panahon ni Noe, gipakita pag-usab ni Jehova nga ang dugo nagsimbolo sa kinabuhi. Gitugotan ni Jehova si Noe ug ang iyang pamilya nga mokaog karne. Siya miingon: “Magsilbing pagkaon ninyo ang matag buhing mananap. Ihatag nako kining tanan, sama nga akong gihatag kaninyo ang lunhawng mga tanom.” Pero dunay gidili si Jehova: “Ayawg kan-a ang unod uban ang kinabuhi niini​—ang dugo.”​—Genesis 1:29; 9:3, 4.

11. Unsay gisugo sa Diyos sa nasod sa Israel bahin sa dugo?

¹¹ Mga 800 ka tuig human did-i ni Jehova si Noe sa pagkaog dugo, gisugo niya pag-usab ang iyang katawhan: “Kon ang usa ka Israelinhon o langyaw nga nagpuyo uban ninyo mangayam ug makadakop ug ihalas nga mananap o langgam nga puwedeng kaonon, patuloon gayod niya ang dugo niini ug tabonag yuta.” Unya siya miingon: “Ayaw ninyog kaona ang dugo.” (Levitico 17:13, 14) Gusto gihapon ni Jehova nga isipon sa iyang katawhan nga ang dugo balaan. Puwede silang mokaog karne pero dili ang dugo. Kon mopatay silag hayop aron kaonon, kinahanglan nilang patuloon ang dugo niini sa yuta.

12. Unsay pag-isip sa mga Kristohanon sa dugo?

¹² Pipila ka tuig human mamatay si Jesus, ang mga apostoles ug ansiyano sa Kristohanong kongregasyon sa Jerusalem nagmiting. Desisyonan nila kon asa sa mga balaod nga gihatag ngadto sa mga Israelinhon ang sundon gihapon sa mga Kristohanon. (Basaha ang Buhat 15:28, 29; 21:25.) Gitabangan sila ni Jehova nga masabtan nga ang dugo bililhon gihapon kaniya ug angayng isipon nga balaan. Ang unang mga Kristohanon dili mokaon o moinom ug dugo. Dili sila mokaon ug karne kon ang dugo niini wala kaayo mapatulo. Kon lapason nila ni, mora ra silag nagsimbag idolo o naghimog seksuwal nga imoralidad. Sukad niadto, ang matuod nga mga Kristohanon dili gyod mokaon o moinom ug dugo. Komosta karon? Gusto ni Jehova nga isipon gihapon natong balaan ang dugo.

13. Nganong dili magpaabonog dugo ang mga Kristohanon?

¹³ Nagpasabot ba pod ni nga dili magpaabonog dugo ang mga Kristohanon? Oo. Gidid-an ta ni Jehova sa pagkaon o pag-inom ug dugo. Kon did-an ka sa doktor nga moinom ug bino, ipasulod ba nimo kini sa imong lawas pinaagig indyeksiyon? Dili gyod! Sa samang paagi, ang pagdili nga mokaon o moinom ug dugo nagpasabot nga dili ta magpaabonog dugo.​—Tan-awa ang Endnote 29.

14, 15. Unsa ka importante para sa mga Kristohanon ang pagtahod sa kinabuhi ug pagsunod kang Jehova?

¹⁴ Pero unsaon man kon moingon ang doktor nga mamatay ta kon dili magpaabonog dugo? Ang matag usa angayng modesisyon kon sundon ba niya ang balaod sa Diyos bahin sa dugo. Gitahod pag-ayo sa mga Kristohanon ang regalo sa Diyos nga kinabuhi, ug mangita tag laing paagi sa pagtambal aron mabuhi; pero dili ta magpaabonog dugo.

¹⁵ Naningkamot tang magpabiling himsog, pero kay ang dugo nagsimbolo sa kinabuhi ug bililhon sa Diyos, dili ta magpaabonog dugo. Mas importanteng sundon si Jehova imbes supakon siya sa tuyo nga motaas pa ang atong kinabuhi. Si Jesus miingon: “Kadtong buot magluwas sa iyang kinabuhi mawad-an niini, apan kadtong mawad-an sa iyang kinabuhi tungod kanako makabaton niini.” (Mateo 16:25) Sundon nato si Jehova kay gihigugma nato siya. Nahibalo siya kon unsay kinamaayohan para nato, ug giisip natong bililhon ug balaan ang kinabuhi, sama sa iyang pag-isip niini.​—Hebreohanon 11:6.

16. Nganong ang mga alagad sa Diyos angayng mosunod niya?

¹⁶ Ang matinumanong mga alagad sa Diyos determinadong mosunod sa iyang balaod bahin sa dugo. Sila dili mokaon o moinom ug dugo ug dili mogamit niini ingong paagi sa pagtambal.a Pero modawat sila ug ubang paagi sa pagtambal aron mabuhi pa. Kombinsido sila nga ang Maglalalang sa kinabuhi ug sa dugo nahibalo kon unsay kinamaayohan para nila. Motuo ba ka nga nahibalo siya kon unsay kinamaayohan para nimo?

17. Unsa lang ang paagi sa paggamit ug dugo nga gitugot ni Jehova sa Israel?

¹⁷ Sa Balaod nga gihatag sa Diyos kang Moises, giingnan ni Jehova ang mga Israelinhon: “Ang kinabuhi sa unod naa sa dugo, ug gihatag nako kini kaninyo sa paghimog pagtabon [o, pagpangayog pasaylo] sa sala diha sa halaran para sa inyong kaugalingon, kay ang dugo maoy magtabon sa sala.” (Levitico 17:11) Dihang makasala ang mga Israelinhon, sila makapangayog pasaylo kang Jehova pinaagi sa paghalad ug hayop ug paghangyo sa saserdote nga ibubo ang ubang dugo niini diha sa halaran sa templo. Kini lang ang paagi sa paggamit ug dugo nga gitugot ni Jehova sa mga Israelinhon.

18. Unsang mga benepisyo ang atong madawat tungod sa halad ni Jesus?

¹⁸ Pag-anhi ni Jesus sa yuta, iyang gipulihan ang balaod bahin sa paghalad ug hayop pinaagi sa paghatag sa iyang kinabuhi, o dugo, aron mapasaylo ang atong mga sala. (Mateo 20:28; Hebreohanon 10:1) Bililhon kaayo ang kinabuhi ni Jesus maong human siya banhawa ni Jehova ngadto sa langit, mahatag na ni Jehova sa tanang tawo ang kahigayonan nga mabuhi sa walay kataposan.​—Juan 3:16; Hebreohanon 9:11, 12; 1 Pedro 1:18, 19.

19. Unsay atong himoon aron ‘hinlo ta gikan sa dugo sa tanang tawo’?

¹⁹ Mapasalamaton ta kang Jehova tungod sa iyang nindot nga regalo, ang kinabuhi! Ug gusto natong sultihan ang mga tawo nga kon duna silay pagtuo kang Jesus, puwede silang mabuhi sa walay kataposan. Gimahal nato sila, ug buhaton nato ang tanan aron tudloan sila kon unsaon nga madawat ang maong kinabuhi. (Ezequiel 3:17-21) Unya, sama kang apostol Pablo, kita makaingon: “Hinlo ko gikan sa dugo sa tanang tawo, kay wala ko magpugong sa pagsulti kaninyo sa tanang kabubut-on sa Diyos.” (Buhat 20:26, 27) Oo, atong gipakita nga gitahod nato pag-ayo ang kinabuhi ug dugo dihang sultihan nato ang uban bahin kang Jehova ug kon unsa ka bililhon kaniya ang kinabuhi.