Hustong Paagi sa Pagsimba sa Diyos

 1. Kinsa ang angayng magtudlo nato sa hustong paagi sa pagsimba sa Diyos?

KADAGHANAN sa relihiyon nag-angkon nga sila nagtudlog kamatuoran bahin sa Diyos. Pero imposible na, kay lahi kaayo ang gitudlo sa mga relihiyon kon kinsa ang Diyos ug kon unsaon siya pagsimba. Unsaon nato pagkahibalo sa hustong paagi sa pagsimba sa Diyos? Si Jehova lang ang makatudlo nato kon unsaon siya pagsimba.

 2. Unsay himoon aron masayran ang hustong paagi sa pagsimba sa Diyos?

² Gihatag ni Jehova ang Bibliya aron atong masayran ang hustong paagi sa pagsimba kaniya. Busa tun-i ang Bibliya, ug tabangan ka ni Jehova nga makabenepisyo sa iyang mga pagtulon-an kay siya naghunahuna sa imong kaayohan.​—Isaias 48:17.

 3. Unsay gusto sa Diyos nga atong himoon?

³ Ang uban nag-ingon nga giuyonan sa Diyos ang tanang relihiyon, pero dili kana tinuod. Si Jesus miingon: “Dili ang tanang moingon kanako, ‘Ginoo, Ginoo,’ makasulod sa Gingharian sa langit, kondili kadto lamang nagabuhat sa kabubut-on sa akong Amahan.” Busa kinahanglang masayran nato ang kabubut-on sa Diyos ug buhaton kini. Importante kaayo ni kay kadtong dili motuman sa Diyos gipakasama ni Jesus sa mga kriminal, mga “mamumuhat sa kalapasan.”​—Mateo 7:21-23.

 4. Unsay gisulti ni Jesus bahin sa pagbuhat sa kabubut-on sa Diyos?

⁴ Si Jesus nagpasidaan nga kon gusto natong buhaton ang kabubut-on sa Diyos, makaatubang tag mga kalisdanan. Siya miingon: “Sulod mo agi sa sigpit nga ganghaan, kay lapad ang ganghaan ug luag ang dalan padulong sa kalaglagan, ug daghan ang nagasulod agi niini; samtang sigpit ang ganghaan ug gamay ang dalan padulong sa kinabuhi, ug diyutay ra ang nakakaplag niini.” (Mateo 7:13, 14) Ang gamay nga dalan, o hustong paagi sa pagsimba, padulong sa kinabuhing walay kataposan. Ang luag nga dalan, o sayop nga paagi sa pagsimba, padulong sa kamatayon. Pero dili gusto ni Jehova nga dunay mamatay. Ang tanan gihatagan niyag kahigayonan nga makakat-on bahin kaniya.​—2 Pedro 3:9.

 5. Sa unsang paagi nimo mailhan kadtong nagsimba sa Diyos sa hustong paagi?

⁵ Si Jesus miingon nga mailhan nato kon kinsay nagsimba sa Diyos sa hustong paagi. Mailhan sila pinaagi sa pagsusi sa ilang gituohan ug ginahimo. Siya miingon: “Pinaagi sa ilang mga bunga kamo makaila kanila.” Siya midugang: “Ang maayong kahoy mamungag maayong bunga.” (Mateo 7:16, 17) Wala magpasabot nga kadtong nagsimba sa Diyos dili na gyod masayop. Pero ang mga alagad sa Diyos kanunayng naningkamot sa pagbuhat kon unsay husto. Atong hisgotan kon unsay makatabang nga mailhan kadtong nagsimba sa Diyos sa hustong paagi.

6, 7. Nganong ang matuod nga pagsimba binase sa Bibliya? Unsay atong makat-onan sa ehemplo ni Jesus?

⁶ Ang atong pagsimba kinahanglang binase sa Bibliya. Ang Bibliya nag-ingon: “Ang tibuok Balaang Kasulatan gisulat pinaagi sa paggiya sa Diyos ug mapuslanon sa pagtudlo, sa pagbadlong, sa pagtul-id, sa pagdisiplina diha sa pagkamatarong, aron ang alagad sa Diyos dunay igong katakos, andam gayod sa matag maayong buhat.” (2 Timoteo 3:16, 17) Si apostol Pablo misulat ngadto sa mga Kristohanon: “Dihang nadawat ninyo ang pulong sa Diyos, nga inyong nadungog kanamo, gidawat ninyo kini dili ingong pulong sa tawo kondili kon unsa gyod kini, ingong pulong sa Diyos.” (1 Tesalonica 2:13) Ang matuod nga pagsimba gibase sa Pulong sa Diyos, ang Bibliya. Dili kini binase sa hunahuna sa tawo, tradisyon, o uban pa.

⁷ Ang tanang gitudlo ni Jesus binase sa Pulong sa Diyos. (Basaha ang Juan 17:17.) Kanunay siyang naghisgot sa giingon sa Kasulatan. (Mateo 4:4, 7, 10) Ang matuod nga mga alagad sa Diyos nagsundog sa ehemplo ni Jesus ug nagbase sa tanan nilang ginatudlo diha sa Bibliya.

 8. Unsay gitudlo ni Jesus kanato bahin sa pagsimba kang Jehova?

⁸ Si Jehova lang ang angay natong simbahon. Ang Salmo 83:18 nag-ingon: “Ikaw, kansang ngalan maoy Jehova, ikaw lamang ang Labing Hataas ibabaw sa tibuok yuta.” Gusto ni Jesus nga mailhan gyod sa mga tawo kon kinsa ang matuod nga Diyos, ug gitudloan niya sila sa ngalan sa Diyos. (Basaha ang Juan 17:6.) Si Jesus miingon: “Si Jehova nga imong Diyos ang angay nimong simbahon, ug siya lamang ang angay nimong hatagag sagradong pag-alagad.” (Mateo 4:10) Busa isip mga alagad sa Diyos, nagsundog ta sa ehemplo ni Jesus. Si Jehova lang ang atong gisimba, gigamit nato ang iyang ngalan, ug gitudlo nato sa uban ang iyang ngalan ug ang iyang buhaton para nato.

9, 10. Giunsa nato pagpakitag gugma sa usag usa?

⁹ Kinahanglang duna tay sinserong gugma sa mga tawo. Si Jesus nagtudlo sa iyang mga tinun-an nga higugmaon ang usag usa. (Basaha ang Juan 13:35.) Dili importante kon unsay atong kagikan, kultura, o kon dato o pobre ta. Ang atong gugma sa usag usa kinahanglang maghiusa nato ingong managsoon. (Colosas 3:14) Busa dili ta makiggubat ug mopatay. Ang Bibliya nag-ingon: “Ang mga anak sa Diyos ug ang mga anak sa Yawa mailhan pinaagi niini: Bisan kinsa nga wala magbuhat sa pagkamatarong wala maggikan sa Diyos, apil kadtong wala mahigugma sa iyang igsoon.” Ug kini midugang: “Kinahanglan natong higugmaon ang usag usa; dili sama kang Cain, nga naggikan sa usa nga daotan ug nagpatay sa iyang igsoon.”​—1 Juan 3:10-12; 4:20, 21.

¹⁰ Gigamit nato ang atong panahon, kusog, ug materyal nga mga butang aron tabangan ug dasigon ang usag usa. (Hebreohanon 10:24, 25) “Buhaton nato ang maayo ngadto sa tanan.”​—Galacia 6:10.

11. Nganong gidawat nato si Jesus ingong ang dalan padulong sa Diyos?

¹¹ Kinahanglang tumanon nato si Jesus kay siya ang dalan padulong sa Diyos. Ang Bibliya nag-ingon: “Walay laing manluluwas gawas kaniya, kay walay laing ngalan ilalom sa langit nga gihatag taliwala sa mga tawo nga pinaagi niana kita gayod maluwas.” (Buhat 4:12) Sa Kapitulo 5 niini nga libro, atong nakat-onan nga gipadala ni Jehova si Jesus aron ihatag ang iyang kinabuhi ingong lukat sa matinumanong mga tawo. (Mateo 20:28) Si Jehova nagpili kang Jesus sa pagmando ingong Hari sa tibuok yuta. Kanay rason nga ang Bibliya nag-ingon nga kinahanglang tumanon nato si Jesus kon gusto natong mabuhi sa walay kataposan.​—Basaha ang Juan 3:36.

12. Nganong dili ta mag-apil-apil sa politika?

¹² Kinahanglang dili ta mag-apil-apil sa politika. Si Jesus wala mag-apil-apil sa politika. Dihang gihusay, iyang giingnan ang Romanong magmamando nga si Pilato: “Ang akong Gingharian dili bahin niining kalibotana.” (Basaha ang Juan 18:36.) Sama ni Jesus, maunongon ta sa langitnong Gingharian sa Diyos, maong dili ta mag-apil-apil sa politika bisag asa ta nagpuyo. Pero gisugo ta sa Bibliya nga tumanon ang “labaw nga mga awtoridad,” sa ato pa, ang gobyerno. (Roma 13:1) Motuman ta sa mga balaod sa nasod. Siyempre, kon dunay balaod nga supak sa balaod sa Diyos, kita mosundog sa mga apostoles, nga miingon: “Kinahanglan namong sugton ang Diyos ingong magmamando imbes ang mga tawo.”​—Buhat 5:29; Marcos 12:17.

13. Unsay atong ginasangyaw bahin sa Gingharian sa Diyos?

¹³ Nagtuo ta nga ang Gingharian sa Diyos mao ang bugtong solusyon sa mga problema sa kalibotan. Si Jesus miingon nga ang “maayong balita sa Gingharian” isangyaw sa tibuok kalibotan. (Basaha ang Mateo 24:14.) Walay gobyerno sa tawo nga makahimo sa himoon sa Gingharian sa Diyos para nato. (Salmo 146:3) Gitudloan ta ni Jesus nga iampo ang Gingharian sa Diyos. Siya miingon: “Paanhia ang imong Gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Ang Bibliya nag-ingon nga laglagon sa Gingharian sa Diyos ang tanang gobyerno sa tawo ug “kini ray mobarog hangtod sa hangtod.”​—Daniel 2:44.

14. Para nimo, kinsay nagsimba sa Diyos sa hustong paagi?

¹⁴ Human hisgoti ang maong mga punto, hunahunaa kini: ‘Kinsay nagbase sa ilang pagtulon-an diha sa Bibliya? Kinsay nagsulti sa uban bahin sa ngalan sa Diyos? Kinsay nagpakitag sinserong gugma sa usag usa ug nagtuo nga gipadala sa Diyos si Jesus aron luwason ta? Kinsay dili mag-apil-apil sa politika? Kinsay nagsangyaw nga ang Gingharian sa Diyos mao ray makasulbad sa atong mga problema?’ Ang mga Saksi ni Jehova lang.​—Isaias 43:10-12.

15. Unsay atong himoon kon gusto ta nga dawaton sa Diyos ang atong pagsimba?

¹⁵ Dili igo ang pagtuo lang nga dunay Diyos. Bisan ang mga demonyo nagtuo nga dunay Diyos, pero wala sila motuman niya. (Santiago 2:19) Kon gusto ta nga dawaton sa Diyos ang atong pagsimba, dili igo nga motuo lang ta niya. Kinahanglang sundon sab nato ang iyang gisulti.

16. Nganong kinahanglan natong biyaan ang bakak nga relihiyon?

¹⁶ Aron dawaton sa Diyos ang atong pagsimba, kinahanglang biyaan nato ang bakak nga relihiyon. Si propetang Isaias misulat: “Gula sa iyang taliwala, pagpabilin mong hinlo.” (Isaias 52:11; 2 Corinto 6:17) Busa kinahanglang biyaan nato ang bisan unsa nga konektado sa bakak nga pagsimba.

17, 18. Unsa ang “Bantogang Babilonya,” ug nganong kinahanglang mobiya dayon niini?

¹⁷ Unsa ang bakak nga relihiyon? Kini ang bisan unsang relihiyon nga nagtudlo sa pagsimba sa Diyos sa paagi nga supak sa iyang Pulong. Sa Bibliya, ang tanang bakak nga relihiyon gitawag ug “Bantogang Babilonya.” (Pinadayag 17:5) Ngano? Human sa Lunop sa panahon ni Noe, daghang bakak nga pagtulon-an ang gitudlo didto sa siyudad sa Babilonya. Kini miabot sa lainlaing bahin sa yuta. Pananglitan, ang mga taga-Babilonya nagsimbag mga grupo sa tagtulo ka diyos. Karon usab, daghang relihiyon ang nagtudlo nga ang Diyos usa ka Trinidad, pero klaro ang gitudlo sa Bibliya nga usa lang ang matuod nga Diyos, si Jehova, ug nga si Jesus iyang Anak. (Juan 17:3) Ang mga taga-Babilonya nagtuo sab nga inigkamatay sa tawo, dunay mogula sa iyang lawas nga magpadayong buhi ug posibleng mag-antos sa impiyerno. Dili kana tinuod.​—Tan-awa ang Endnote 14, 17, ug 18.

¹⁸ Ang Diyos nagtagna nga hapit nang laglagon ang tanang bakak nga relihiyon. (Pinadayag 18:8) Nasabtan ba nimo kon nganong kinahanglang mobiya dayon sa bakak nga relihiyon? Gusto ni Jehova nga Diyos nga himoon nimo kana samtang naa pay panahon.​—Pinadayag 18:4.

19. Dihang modesisyon ka nga moalagad kang Jehova, unsaon ka niya pag-atiman?

¹⁹ Dihang modesisyon ka nga mobiya sa bakak nga relihiyon ug moalagad kang Jehova, basin ang uban nimong higala o pamilya dili makasabot ug lisodlisoron ka. Pero dili ka pasagdan ni Jehova. Mahimo na kang bahin sa tibuok kalibotang pamilya nga may minilyong membro ug nagpakitag tinuod nga gugma sa usag usa. Ug may paglaom na ka nga mabuhi hangtod sa hangtod sa bag-ong kalibotan sa Diyos. (Marcos 10:28-30) Lagmit ang uban nimong higala ug pamilya nga supak sa imong desisyon basin sa ulahi magtuon ra sa Bibliya.

20. Nganong importante nga simbahon ang Diyos sa hustong paagi?

²⁰ Hapit na kaayong laglagon sa Diyos ang tanang daotan ug magmando na unya ang iyang Gingharian sa tibuok yuta. (2 Pedro 3:9, 13) Nindot kaayo na nga panahon! Ang tanan magsimba na kang Jehova sa paagi nga gusto niya. Busa importante nga molihok na ka karon ug simbahon ang Diyos sa hustong paagi.