Gihimo sa Diyos ang Langit ug Yuta

Si Jehova nga Diyos ang naghimo nato. Siya ang nagbuhat sa tanan, makita man o dili. Sa wala pa niya himoa ang mga butang nga makita, naghimo siyag daghan kaayong anghel. Kabalo kag unsay anghel? Mga alagad sila ni Jehova. Dili pod sila makita pareho niya. Ang unang anghel nga gihimo ni Jehova mitabang sa pagbuhat sa mga bituon, planeta, ug sa tanang butang. Usa niana mao ang planetang Yuta nga atong gipuy-an.

Dayon gipanindot ni Jehova ang yuta aron mapuy-an sa mga hayop ug mga tawo. Gihimo niya nga mahayagan sa adlaw ang yuta. Naghimo sab siyag mga bukid, dagat, ug mga suba.

Unsay sunod nga nahitabo? Si Jehova miingon: ‘Maghimo kog mga tanom ug mga kahoy.’ Dayon naa nay lainlaing prutas, utanon, ug bulak. Unya gihimo ni Jehova ang tanang hayop—naay molupad, molangoy, ug mokamang. Dunay gagmayng hayop, pareho sa rabbit, ug duna poy dagko, pareho sa elepante. Unsay paborito nimong hayop?

Dayon si Jehova miingon sa unang anghel: “Magbuhat tag tawo.” Ang mga tawo dili pareho sa mga hayop. Sila makahimog mga butang, moestorya, mokatawa, ug moampo. Sila ang moatiman sa yuta ug sa mga hayop. Kabalo ba ka kinsa ang unang tawo? Mahibaloan nato na sa sunod nga leksiyon.