Gihimo sa Diyos ang Unang Lalaki ug Babaye

Naghimo si Jehova ug garden sa lugar nga gitawag ug Eden. Kadto nga garden puno sa bulak, kahoy, ug hayop. Dayon gibuhat sa Diyos ang unang tawo, si Adan, gikan sa abog ug gihuypan ang iyang ilong. Nahibalo ba ka unsay nahitabo? Ang tawo nahimong buhi! Gisugo sa Diyos si Adan sa pag-atiman sa garden ug sa paghatag ug ngalan sa tanang hayop.

Naay importante kaayong gisulti si Jehova kang Adan. Iyang giingnan si Adan: ‘Puwede kang mokaon sa tanang prutas, pero naay usa ka kahoy nga dili nimo puwedeng kaonon ang bunga. Kon imo ning kaonon, mamatay ka.’

Dayon si Jehova miingon: ‘Maghimo kog kauban ni Adan.’ Gipatulog ni Jehova si Adan ug gikuha ang iyang usa ka gusok aron himoong iyang asawa. Eva ang iyang ngalan. Si Adan ug Eva mao ang unang pamilya. Unsay gibati ni Adan? Lipay kaayo siya ug miingon: ‘Pagkanindot sa gihimo ni Jehova gikan sa akong gusok! Naa na gyod koy kauban nga pareho nako.’

Giingnan ni Jehova si Adan ug Eva nga manganak ug pun-on ang yuta. Gusto ni Jehova nga mag-enjoy sila sa paghimo sa tibuok yuta nga paraiso, pareho sa garden sa Eden. Pero wala to nila mahimo. Ngano kaha? Mahibaloan nato na sa sunod nga leksiyon.