Si Jacob ang Nakadawat sa Panulondon

Si Isaac 40 anyos dihang naminyo kang Rebeca. Pinangga kaayo niya si Rebeca. Dayon nanganak silag kaluha.

Si Esau ang magulang ug si Jacob ang manghod. Laagan si Esau ug maayo siyang manakop ug mga hayop. Pero ganahan si Jacob nga magpuyo lang sa balay.

Kaniadto, inigkamatay sa amahan, ang magulang ang hatagan sa kadaghanang yuta ug kuwarta. Panulondon ang tawag ana. Sa pamilya ni Isaac, apil sa panulondon ang pagkahimong bahin sa mga saad ni Jehova kang Abraham. Dili interesado si Esau sa maong mga saad, pero kabalo si Jacob nga importante kaayo to.

Dihay adlaw nga miuli si Esau gikan sa pagpanakop ug hayop. Gikapoy kaayo siya. Nasimhotan niya ang laming pagkaon nga giluto ni Jacob. Siya miingon: ‘Gutom kaayo! Hatagi ko anang pula nga sabaw diha!’ Si Jacob mitubag: ‘Hatagan ti ka, pero akoa na ang imong panulondon.’ Si Esau miingon: ‘Dili ko interesado ana! Imo na kana. Pakan-a lang ko.’ Husto kaha ang gihimo ni Esau? Dili! Importante kaayo to nga panulondon, pero gibaylo lang niya sa usa ka yahong nga sabaw.

Dihang tigulang na kaayo si Isaac, iya na untang panalanginan ang iyang magulang nga anak. Pero gitabangan ni Rebeca ang manghod nga si Jacob aron siya ang panalanginan. Pagkahibalo ni Esau, puwerte niyang sukoa ug gusto niyang patyon ang iyang kaluha. Giprotektahan ni Isaac ug Rebeca si Jacob. Ila siyang giingnan: ‘Adto puyo kang Laban nga igsoon sa imong Mama hangtod mokalma si Esau.’ Gituman ni Jacob ang giingon sa iyang ginikanan ug miikyas siya.