Ang Sala ni Haring David

Pagkamatay ni Saul, nahimong hari si David sa edad nga 30. Human sa pipila ka tuig nga paghari, dihay gabii nga nakakita siyag guwapang babaye samtang didto siya sa atop sa iyang palasyo. Nasayran ni David nga si Bat-seba to, ang asawa sa sundalong si Urias. Gipaadto ni David si Bat-seba sa iyang palasyo. Nagdulog sila, ug namabdos si Bat-seba. Dili gusto ni David nga mabulgar ang iyang gihimo. Busa iyang giingnan ang iyang heneral nga ibutang si Urias sa atubangan dihang makiggubat ug dili siya tabangan. Namatay si Urias sa gubat, ug giminyoan ni David si Bat-seba.

Pero nakita ni Jehova ang tanan. Unsay iyang gihimo? Gipaadto ni Jehova ang propetang si Natan kang David. Si Natan miingon: ‘Dihay dato nga daghag karnero, ug diha poy pobre nga usa ray karnero nga pinangga kaayo niya. Gikuha sa dato ang karnero sa pobre.’ Nasuko si David ug miingon: ‘Angayng patyon kanang tawhana!’ Dayon giingnan siya ni Natan: ‘Ikaw tong tawhana!’ Naguol kaayo si David ug mitug-an kang Natan: ‘Nakasala ko kang Jehova.’ Tungod ani nga sala, nagkaproblema si David ug ang iyang pamilya. Gisilotan siya ni Jehova, pero wala siya patya kay mitug-an man siya ug nagpaubos.

Gusto ni David nga maghimog templo para kang Jehova, pero gusto ni Jehova nga si Solomon nga anak ni David ang maghimo sa templo. Busa giandam ni David ang mga galamiton para kang Solomon ug miingon: ‘Kinahanglang nindot kaayo ang templo ni Jehova. Pero kay bata pa si Solomon, tabangan nako siya pinaagi sa pag-andam sa mga galamiton.’ Daghang kuwarta ang gihatag ni David para matukod ang templo. Nangita siyag mga tawo nga eksperto sa pagtukod. Nag-andam siyag mga bulawan, silver, ug mga kahoyng sedro nga gikan sa Tiro ug Sidon. Sa hapit na mamatay si David, gihatag niya kang Solomon ang plano sa templo. Siya miingon: ‘Gipahimo ko ni Jehova niini nga plano para nimo. Tabangan ka ni Jehova. Ayawg kabalaka. Magmalig-on ka ug buhata kini.’