Talagsaong Hitabo sa Bukid sa Carmelo

Daghan ug daotang hari ang 10 ka tribong gingharian sa Israel, pero si Ahab ang kinagrabehan. Iyang napangasawa si Jezebel, ang daotang babaye nga tigsimba kang Baal. Giimpluwensiyahan ni Ahab ug Jezebel ang mga tawo sa pagsimba kang Baal ug gipatay ang mga propeta ni Jehova. Unsay gihimo ni Jehova? Nagpadala siyag mensahe kang Ahab pinaagi kang propetang Elias.

Tungod sa pagkadaotan ni Haring Ahab, giingnan siya ni Elias nga dili makasinatig ulan ang Israel. Kapin sa tulo ka tuig ang kagutom kay nangamatay ang mga tanom. Gipaadto na sab ni Jehova si Elias kang Ahab. Ang hari miingon: ‘Tigdala kag kadaot! Ikaw ang hinungdan niining tanan.’ Mitubag si Elias: ‘Dili akoy hinungdan kon nganong walay ulan. Ikaw ang hinungdan tungod sa imong pagsimba kang Baal. Tan-awon nato kon kinsay tinuod nga Diyos. Paadtoa sa Bukid sa Carmelo ang katawhan ug ang mga propeta ni Baal.’

Miadto sa bukid ang mga tawo. Dayon si Elias miingon: ‘Pagdesisyon na mo. Kon si Jehova ang matuod nga Diyos, sunda siya. Kon si Baal, nan sunda siya. Hagiton ta mo. Ang 450 ka propeta ni Baal mag-andam ug halad ug mag-ampo sa ilang diyos. Mag-andam pod ko ug halad ug moampo kang Jehova. Kon kinsay motubag pinaagig kalayo, siya ang matuod nga Diyos.’ Misugot ang mga tawo.

Nag-andam ug halad ang mga propeta ni Baal. Tibuok adlaw nilang gitawag ang ilang diyos: ‘Baal, tubaga mi!’ Gibiaybiay sila ni Elias kay wala sila tubaga ni Baal. Si Elias miingon: ‘Kusga ninyo kay basig nakatulog siya ug kinahanglang pukawon.’ Nigabii na lang, nagsige gihapog panawag ang mga propeta ni Baal. Pero wala gihapon sila tubaga.

Gibutang ni Elias ang iyang halad diha sa halaran ug gibuboan kinig tubig. Dayon nag-ampo siya: ‘Oh Jehova, palihog ipakita sa mga tawo nga ikaw ang matuod nga Diyos.’ Dihadiha, si Jehova nagpadalag kalayo gikan sa langit ug nasunog ang halad. Misinggit ang mga tawo: ‘Si Jehova ang matuod nga Diyos!’ Si Elias miingon: ‘Ayaw tugoti nga dunay makaikyas nga propeta ni Baal!’ Nianang adlawa, 450 ka propeta ni Baal ang gipatay.

Dihang may nakita nga gamayng panganod ibabaw sa dagat, miingon si Elias kang Ahab: ‘Naay moabot nga bagyo. Pauli sakay sa imong karwahe.’ Midag-om ang langit, mihuyop ang hangin, ug mibundak ang kusog nga ulan. Natapos ra gyod ang hulaw. Kusog kaayo ang pagpadagan ni Ahab sa iyang karwahe. Pero sa tabang ni Jehova, mas kusog ang pagdagan ni Elias! Natapos na kaha ang mga problema ni Elias? Atong tan-awon.