24 ABIGAIL
Giatubang Niya ang Duha ka Nasuko nga Lalaki
SI Abigail naa sa lisod kaayong situwasyon tungod sa duha ka nasuko nga lalaki. Ang usa mao ang iyang bana nga si Nabal, kinsa pintas, maot ug batasan, ug buangbuang. Ang lain mao si David, nga usa ka maayong tawo, matinumanong alagad ni Jehova, ug ang umaabot nga hari sa Israel. Pero dihay gihimo si Nabal nga nakapasuko kang David, ug tungod ana nameligro ang panimalay ni Abigail. Si Abigail guwapa ug maalamon. Pero aron masulbad kini nga problema, nanginahanglan sab siyag dakong kaisog.
Nahibaloan ni Abigail ang maong problema dihang giduol siya sa usa ka sulugoon aron pasidan-an bahin sa nagsingabot nga kapeligrohan. Si David nagpaingon na, kauban ang iyang 400 ka armadong tawo. Sila determinado sa pagpahinabog katalagman kang Nabal “ug sa tibuok niyang panimalay.” Ngano? Dihang nagtagotago si David kang Haring Saul, kinsa nagdumot kaniya sa wala ray hinungdan, gipanalipdan gihapon ni David ug sa iyang mga tawo ang mga Israelinhon batok niadtong mga misulay sa pag-atake kanila. Ila pong gipanalipdan si Nabal ug ang iyang daghang karnero ug mga magbalantay niini. Busa makataronganon lang kon si David mohangyog pagkaon kang Nabal. Pero sa dihang si David nagpadalag mga tawo kang Nabal aron mohangyo niini, giinsulto sila ni Nabal, ug iya pa ganing gitawag si David ingong layas nga sulugoon!
Nahibalo ang sulugoon ni Nabal nga wala ray kapuslanan kon iyang sultihan ang iyang agalon bahin niini nga problema. Prangka niyang giingnan si Abigail bahin kang Nabal: “Wala siyay pulos nga tawo mao nga dili siya maayong ikasulti.” Pero misalig siya nga si Abigail maminaw niya ug molihok nga maalamon. Unsa kahay himoon ni Abigail?
Nagpabilin siyang kalmado. Pero kinahanglan siyang molihok dayon. Nag-andam siyag daghang pagkaon, gisakay kining tanan diha sa mga asno, ug gisultihan ang iyang mga sulugoon nga dad-on kini kang David. Nagsunod siya nila sakay sa iyang asno. Pero wala siyay gisulti kang Nabal. Posibleng nahibalo siya nga pugngan ra siya ni Nabal sa paghimo kon unsay husto.
Giatubang ni Abigail ang mga manggugubat nga nasuko sa gihimo sa iyang buangbuang nga bana
Samtang si Abigail nagsakay sa iyang asno, nasalipdan siya sa bukid maong wala dayon siya makita ni David ug sa iyang mga tawo nga nagpaingon kaniya. Dayon dihang nagkatagbo na sila, si Abigail nagdalidalig naog sa asno ug miduol sa nasuko nga si David. Miluhod siya sa atubangan ni David ug mihangyo nga pamation siya. Kay nakita ni David kon unsa ka mapainubsanon si Abigail, andam si David sa pagpamati kaniya.
Giako ni Abigail ang responsibilidad, ug iyang giila nga makataronganon lang ang kasuko ni David kang Nabal, kinsa walay pulos ug buangbuang. Dayon iyang gipahinumdoman si David sa tanang gihimo niini alang kang Jehova ug sa tanang himoon ni Jehova alang kang David. Miingon sab siya nga dili gusto ni Jehova nga si David mahimong sad-an sa dugo ug magbasol sa ulahi tungod sa pagpatay ug inosenteng mga tawo. Siya midugang nga ang kanunayng pilion ni Jehova nga mahimong hari sa Israel maggikan sa panimalay ni David, ug Iyang luwason si David gikan sa tanan niyang kaaway. Nahibalo gyod si Abigail nga gipili ni Jehova si David nga mahimong sunod nga hari.
Ang iyang maalamong mga pulong ug buotang paagi sa pagsulti nakapakalma kang David. Si David miingon: “Dalayegon si Jehova nga Diyos sa Israel nga nagpadala kanimo niining adlawa sa pagsugat kanako!” Gidayeg ni David ang pagkamaalamon ni Abigail, ug mapainubsanon niyang gidawat ang maalamong tambag niini. Siya miingon: “Ako namati kanimo, ug buhaton nako ang imong gihangyo.”
Way kalibotan niini si Nabal. Nagkombira siya adtong gabhiona ug “nahubog pag-ayo.” Naghulat si Abigail hangtod sa buntag, dihang nahuwasan na ang iyang bana. Bisan pa niana, posibleng bayolente gihapon si Nabal. Dayon gisulti ni Abigail kaniya ang tanang nahitabo. Tingali nagdahom na siya nga singhagan ug dagmalan siya ni Nabal. Pero wala na mahitabo. Ngano? “Ang iyang kasingkasing nahisama nianang sa patay nga tawo, ug siya naparalisar samag bato.” Dayon mga 10 ka adlaw sa ulahi, “gihampak ni Jehova si Nabal ug siya namatay.” Busa gisilotan sa Diyos si Nabal tungod sa iyang gihimo kang David, ang gipili sa Diyos ingong umaabot nga hari. Ang gihimo ni Jehova nakahatag sab ug kaayohan kang Abigail kay tungod niini nahigawas siya sa dili maayo nga kaminyoon.
Diha pay mga panalangin nga gihatag si Jehova kang Abigail. Dihang nasayran ni David nga namatay na si Nabal, iyang gisultihan si Abigail pinaagig mga mensahero nga gusto siyang makigminyo niya. Misugot si Abigail. Sa ulahi, nahimong hari si David, una sa Juda ug dayon sa tibuok Israel, ug sila ni Abigail nakabatog anak nga lalaki. Una pa niana, dihay higayon nga gibihag si Abigail sa mga Amalekanhon—pero wala ra na magdugay. Giluwas siya sa iyang maisogon ug mahigugmaon nga bana. Dako gyong panalangin nga si Abigail duna nay bana nga nagtahod ug nagpangga kaniya.
Basaha ang asoy sa Bibliya:
Pakighisgot:
Sa unsang mga paagi nga si Abigail nagpakitag kaisog?
Tun-ig Dugang
1. Ngano tingaling naminyo si Abigail kang Nabal? (ia 77 ¶6)
2. Dihang nangayog pagkaon si David kang Nabal, panahon kadto sa pag-alot sa mga karnero. Unsang matanga kini sa okasyon? (w97 7/1 14 ¶4) A
Hulagway A: Ang pag-alot sa mga karnero maoy sadya nga okasyon
Hulagway A: Ang pag-alot sa mga karnero maoy sadya nga okasyon
3. Nganong angay untang magmapasalamaton si Nabal sa tabang sa mga sundalo ni David? (ia 77-78 ¶9-10) B
Hanan Isachar/Alamy Stock Photo
Hulagway B: Ang Carmelo gipalibotag batoon ug uga nga kayutaan
4. Unsay ipasabot ni Abigail dihang siya miingon nga ang kinabuhi ni David “panalipdan gayod ni Jehova . . . sama nga panalipdan sa usa ka tawo ang bililhong butang diha sa usa ka sudlanan”? (1 Sam. 25:29; it “Kinabuhi” ¶45)
Hunahunaa ang mga Leksiyon
Si David namati kang Abigail. Unsay makat-onan niini sa mga bana? C
Hulagway C
Unsay makat-onan sa mga sister nga naminyog dili magtutuo bahin kang Abigail?
Unsaon nimo pagsundog ang kaisog ni Abigail?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Abigail dihang banhawon na siya?
Pagkat-og Dugang
Unsa tingali mahimo sa usa ka Kristohanon aron mapalig-on ang iyang kaminyoon kon ang iyang kapikas wala magsimba kang Jehova?
Gitabangan ni Abigail si David nga makontrolar ang iyang kasuko. Konsideraha ang mga paagi nga makontrolar nimo ang imong kasuko bisan dihang mahiubos ka o maglagot.