ABADDON
[gikan sa Heb., nga nagkahulogang “Kalaglagan”].
Sa Pinadayag 9:11 kini nga Hebreohanong pulong gitumbasan lamang ug espeling nga Cebuano. Dinha atong mabasa ang mahitungod sa simbolikong hampak sa mga dulon nga sila adunay “hari, ang manulonda sa kahiladman. Sa Hebreohanon ang iyang ngalan Abaddon, apan sa Grego siya ginganlag Apollyon.”
Sa Hebreohanon ang pulong nga ʼavad·dohnʹ nagkahulogang “kalaglagan” ug mahimong magtumong usab sa “dapit sa kalaglagan.” Sa orihinal nga Hebreohanong teksto kini makita sa lima ka higayon, ug diha sa upat niini kini gigamit nga susama sa “lubnganan,” “Sheol,” ug “kamatayon.” (Sal 88:11; Job 26:6; 28:22; Pr 15:11) Ang pulong nga ʼavad·dohnʹ niini nga mga teksto dayag nga nagtumong sa pagkadunot sa lawas human sa kamatayon sa tawo, ug kini nga mga teksto nagpakita nga ang pagkadunot o pagkalaglag mahitabo didto sa Sheol, ang komon nga lubnganan sa katawhan. Sa Job 31:12 ang ʼavad·dohnʹ nagpasabot sa makadaot nga epekto sa pagpanapaw. Si Job mipahayag: ‘Kana [nga pagpanapaw] maoy usa ka kalayo nga magaut-ot hangtod sa kalaglagan [ʽadh-ʼavad·dohnʹ], ug taliwala sa tanan kong mga abot kini mogamot.’—Itandi ang Pr 6:26-28, 32; 7:26, 27.
Si Abaddon, ang manulonda sa kahiladman—kinsa siya?
Apan, sa Pinadayag 9:11 ang pulong nga “Abaddon” gigamit ingong ngalan sa “manulonda sa kahiladman.” Ang katumbas nga Gregong ngalan nga Apollyon nagkahulogang “Tiglaglag.” Sa ika-19 nga siglo dihay mga pagpaningkamot aron ipakita nga kining tekstoha matagnaong nagtumong sa mga indibiduwal sama kang Emperador Vespasian, Muhammad, ug bisan kang Napoleon, ug kini nga manulonda giisip sa kadaghanan ingong “sataniko.” Apan, angayng matikdan nga sa Pinadayag 20:1-3 ang manulonda nga may “yawi sa kahiladman” gipakita nga maoy hawas sa Diyos gikan sa langit, ug imbes nga “sataniko,” iyang gigapos ug gitambog si Satanas ngadto sa kahiladman. Sa pagkomento sa Pinadayag 9:11, ang The Interpreter’s Bible nag-ingon: “Apan, si Abaddon maoy usa ka manulonda nga dili iya ni Satanas kondili sa Diyos, nga nagbuhat sa iyang buluhaton sa paglaglag sumala sa gisugo sa Diyos.”
Diha sa Hebreohanong mga teksto nga gihisgotan, dayag nga ang ʼavad·dohnʹ gipakasama sa Sheol ug sa kamatayon. Sa Pinadayag 1:18 makita nato nga si Kristo Jesus nag-ingon: “Buhi ako hangtod sa kahangtoran, ug ania kanako ang mga yawi sa kamatayon ug sa Hades.” Ang iyang gahom maylabot sa kahiladman gipakita sa Lucas 8:31. Siya adunay malaglagong gahom, lakip ang gahom sa paglaglag kang Satanas, ug kini dayag nga makita sa Hebreohanon 2:14, nga nag-ingong si Jesus nakig-ambit sa dugo ug unod aron nga “pinaagi sa iyang kamatayon mawagtang niya ang usa nga may gahom sa pagpahinabog kamatayon, nga mao, ang Yawa.” Sa Pinadayag 19:11-16 siya tin-awng gihulagway ingong tinudlo sa Diyos nga Tiglaglag o Tigpahamtang ug silot.—Tan-awa ang APOLLYON.