AGUR

Ang anak nga lalaki ni Jakeh ug magsusulat sa ika-30 nga kapitulo sa basahon sa Mga Proverbio. (Pr 30:1) Wala nay laing gihisgotan aron dugang siyang mailhan. Lagmit nga siya nagkinabuhi sa panahon gikan sa yugto sa paghari ni Solomon (1037-998 W.K.P.) hangtod sa paghari ni Ezequias (745-717 W.K.P.).

Giisip sa pipila ka rabbinikong mga eskolar nga ang ngalang Agur maoy mahulagwayon, nga gipadapat kang Solomon. Busa ang nota o footnote sa Proverbio 30:1 diha sa Soncino Books of the Bible nagkutlo gikan sa Midrash nga nag-ingon: “Siya gitawag nga Agur tungod kay siya nagtipig (agar) ug kahibalo sa Torah, ug ang anak nga lalaki ni Jakeh tungod kay siya nagsuka niini (hikki) sa pagkaagi nga iyang gibalewala ang pasidaan nga dili magbaton ug daghang asawa.” (Giedit ni A. Cohen, London, 1952) Apan bisan taliwala sa mga komentaristang Hudiyo, kini nga panglantaw wala kauyoni sa tanan ug daghan ang nagtuo nga ang kalainan sa estilo, pinulongan, ug kaundan nagpaila sa usa ka lahing magsusulat.