BENAIAS

[Si Jehova Nagtukod].

1. Anak nga lalaki sa Levihanon nga pangulong saserdote nga ginganlag Jehoiada, ug amahan sa labing menos duha ka anak nga lalaki nga si Amizabad ug Jehoiada. (1Cr 27:​5, 6, 34) Si Benaias maoy usa ka gamhanang manggugubat nga maisogon kaayo, “mas inila nga labaw kay sa katloan” sa gamhanang mga tawo sa kasundalohan ni David, bisag “siya wala mahiapil sa ranggo sa tulo.”​—2Sa 23:20-23.

Gipasundayag ni Benaias ang iyang kaisog sa tulo ka paagi: pinaagi sa pagpatay sa duha ka gamhanang mga bayani sa Moab, pinaagi sa walay kokahadlok nga pagkanaog ngadto sa usa ka gahong-sa-tubig ug nagpatay sa usa ka leyon, ug pinaagi sa pagpatay sa higanteng Ehiptohanon ginamit ang kaugalingong bangkaw niini bisan tuod wala gayod siyay dag-anan kon bahin sa gidak-on. (1Cr 11:22-24) Kining maisog nga tawo gibutang ni David nga tagdumala sa iyang kaugalingong mga bantay. (1Cr 11:​24, 25) Ang mga Keretnon ug mga Peletnon, nga gipangulohan ni Benaias, nagpabiling maunongon sa hari sa panahon sa pag-alsa ni Absalom ug Adonias. (2Sa 8:18; 15:18; 20:23; 1Ha 1:​8, 10, 26; 1Cr 18:17) Dugang pa, si Benaias gitudlo ingong pangulo sa ikatulong dibisyon sa nagrelibohay nga kasundalohan, nga may gidaghanon nga 24,000 ka tawo. (1Cr 27:​5, 6) Sa pagkatigulang ni David si Benaias ug ang mga Keretnon ug mga Peletnon mipaluyo sa pagpurongpurong kang Solomon. (1Ha 1:32-40) Sa ulahi, ubos sa paghari ni Solomon, si Benaias gisugo sa pagpatay kang Adonias, Joab, ug Simei, ug gitudlo usab siya ni Solomon nga mangulo sa kasundalohan.​—1Ha 2:​24, 25, 28-46; 4:4.

2. Usa sa gamhanang mga tawo ni David, pangulo sa ika-11 nga dibisyon sa nagrelibohay nga kasundalohan; usa ka Piratonhon sa tribo ni Epraim.​—2Sa 23:30; 1Cr 11:31; 27:14.

3. Usa ka Levihanong maghohoni nga nagpatokar sa iyang kinuldasang instrumento nga nagduyog sa arka sa pakigsaad sa dihang gidala kini sa Jerusalem ug gibutang kini sulod sa tolda nga giandam ni David.​—1Cr 15:​18, 20; 16:​1, 5.

4. Usa ka saserdote nga nagpatokar sa trompeta sa dihang ang Arka gidala sa Jerusalem panahon sa paghari ni David.​—1Cr 15:24; 16:6.

5. Usa ka Levihanon nga kaliwat ni Asap.​—2Cr 20:14.

6. Usa ka Simeonhon, lagmit usa ka katalirongan ni Haring Ezequias.​—1Cr 4:​24, 36-43.

7. Usa ka Levihanon nga gitudlo ni Ezequias aron motabang sa pag-atiman sa dagayang mga amot alang sa balay ni Jehova.​—2Cr 31:​12, 13.

8. Amahan ni Pelatias, usa sa daotang mga prinsipe nga nakita sa panan-awon ni Ezequiel.​—Eze 11:​1, 13.

9, 10, 11, 12. Upat ka lalaki nga naghingilin sa ilang langyawng mga asawa ug mga anak tungod sa tambag ni Esdras. Kining upat maoy mga kaliwat ni Paros, Pahat-moab, Bani, ug Nebo.​—Esd 10:​25, 30, 34, 35, 43, 44.