MAGTITIING

Usa ka opisyal sa palasyo nga maoy modulot sa hari ug bino o ubang mga ilimnon. (Gen 40:​1, 2, 11; Neh 1:11; 2:1) Ang mga buluhaton sa pangulong magtitiing usahay naglakip sa pagtilaw niini sa dili pa kini idulot ngadto sa hari. Kini tungod kay anaa kanunay ang posibilidad nga adunay magtinguha sa kinabuhi sa hari pinaagi sa pagbutang ug hilo sa iyang bino.

Ang bug-os nga pagkakasaligan maoy pangunang kuwalipikasyon alang niini nga katungdanan, sanglit nameligro ang kinabuhi sa hari. Kini nga katungdanan maoy usa sa labing dungganon diha sa palasyo. Ang pangulong magtitiing sagad nga kauban sa hari diha sa mga komperensiya. Sanglit suod ug sagad nga sinaligan sa hari, kasagarang siya may dakong impluwensiya sa monarko. Ang magtitiing ni Paraon mao ang nagrekomendar kang Jose. (Gen 41:9-13) Si Haring Artajerjes sa Persia hataas ug pagtamod sa iyang magtitiing nga si Nehemias. (Neh 2:6-8) Sa dihang si Nehemias mipanaw paingon sa Jerusalem, siya gipakuyogan ug mga sundalo ni Artajerjes.​—Neh 2:9.

Tungod kay ang mga magtitiing sagad makita diha sa karaang mga hulagway, kini nagpakita sa kahinungdanon sa ilang katungdanan. Ang rayna sa Sheba nakadayeg pag-ayo sa ‘mga tigsilbi sa ilimnon ni Solomon ug sa ilang mga besti.’​—2Cr 9:4.