PAGKANAGAMHAN SA DEMONYO

Ang pagkanabihag ug pagkanaimpluwensiyahan sa usa ka tawo sa dili-makita nga daotang espiritu. Sa kapanahonan sa Bibliya ang gidemonyohan nga mga tawo gisakit sa lainlaing mga paagi: ang pipila dili makasulti, ang pipila nangabuta, ang pipila nangabuang, ug ang pipila nakabaton ug labaw-tawhanong kusog. Ang tanan makaluluoy nga gimaltrato pag-ayo niining dili-makitang mga tigdaogdaog. (Mat 9:32; 12:22; 17:15; Mar 5:3-5; Luc 8:29; 9:42; 11:14; Buh 19:16) Ang mga lalaki, mga babaye, ug mga bata maoy ilang mga biktima. (Mat 15:22; Mar 5:2) Usahay mosamot ang kasakit kon daghang demonyo ang dungan nga mogahom sa usa ka tawo. (Luc 8:​2, 30) Sa dihang nahinginlan na ang demonyo, ang tawo mahibalik sa normal, maayong kahimtang sa hunahuna. Adunay kalainan tali sa pagkanagamhan sa demonyo ug sa ordinaryong sakit ug balatian sa lawas, kay kining mga matanga sa balatian parehong giayo ni Jesus.​—Mat 8:16; 17:18; Mar 1:​32, 34.

Ang pipila sa bantogang mga milagro ni Jesus naglakip sa pagpahigawas sa mga tawong gigamhan gikan sa pagkaulipon sa mga demonyo. Ang mga demonyo walay mahimo batok kaniya. Apan dili tanan nalipay sa iyang gibuhat nga paghingilin sa mga demonyo. Ang mga Pariseo nag-akusar kaniya ingong kakunsabo sa magmamando sa mga demonyo nga si Beelzebub, samtang sa pagkatinuod, ingon sa gipasiugda ni Jesus, sila mismo maoy mga anak sa Yawa. (Mat 9:34; 12:24; Mar 3:22; Luc 11:15; Ju 7:20; 8:​44, 48-52) Nahibalo si Jesus sa tinubdan sa gahom nga naghatag kaniyag labaw nga pagbulot-an ibabaw sa mga demonyo, ug iyang giangkon sa dayag nga kini mao ang espiritu ni Jehova. (Mat 12:28; Luc 8:39; 11:20) Ang mga demonyo nakaila mismo kang Jesus ug nagtawag kaniya ingong ang “Anak sa Diyos,” “ang Balaang Usa sa Diyos,” ug “Jesus, Anak sa Labing Hataas nga Diyos.” (Mat 8:29; Mar 1:24; 3:11; 5:7; Luc 4:​34, 41; Buh 19:15; San 2:19) Bisan pa niana, wala gayod sila tugoti ni Jesus nga magpamatuod alang kaniya. (Mar 3:12) Sa laing bahin, ang usa ka tawo nga gipahigawas gikan sa gahom sa mga demonyo gidasig sa pagpahibalo ngadto sa iyang mga paryente ‘sa tanang butang nga gihimo ni Jehova alang kaniya.’​—Mar 5:18-20.

Gihatagan usab ni Jesus ang iyang 12 ka apostoles ug awtoridad ibabaw sa mga demonyo, ug sa ulahi ang 70 nga iyang gipadala, aron nga sa ngalan ni Jesus sila usab makahimo sa pag-ayo sa mga tawong gigamhan sa demonyo. (Mat 10:8; Mar 3:15; 6:13; Luc 9:1; 10:17) Bisan ang usa ka tawo nga dili direktang nakig-uban kang Jesus o sa iyang mga apostoles nakahimo sa paghingilin sa usa ka demonyo pinasukad sa ngalan ni Jesus. (Mar 9:38-40; Luc 9:​49, 50) Human sa kamatayon ni Jesus, padayong nabatonan sa mga apostoles kini nga gahom. Gimandoan ni Pablo ang “usa ka demonyo sa pagpanag-an” nga mogula gikan sa usa ka ulipong babaye, ug kini nakapasuko pag-ayo sa iyang mga agalon nga mahigugmaon sa salapi. (Buh 16:16-19) Apan sa dihang ang pipila ka impostor, ang pito ka anak nga lalaki sa saserdoteng si Esceva, misulay sa paghingilin sa usa ka demonyo pinasukad sa ngalan ni “Jesus nga ginawali ni Pablo,” gidakop ug gibun-og pag-ayo sa tawong gigamhan sa demonyo silang pito ug gihuboan sila.​—Buh 19:13-16.

Sagad nahimong mabangis ug dili makontrolar ang panggawi sa dili-maayog pangisip nga mga tawo tungod sa paggahom kanila niining dili-makitang mga sakop ni Satanas. Usahay gitaho nga ang mga espiritista naghingilin niini nga mga demonyo; kini magpahinumdom sa giingon ni Jesus: ‘Daghan ang moingon kanako nianang adlawa, “Ginoo, Ginoo, wala ba kami . . . maghingilin sa mga demonyo sa imong ngalan . . . ?” Ug unya ako magaingon kanila: Wala gayod ako makaila kaninyo!’ (Mat 7:​22, 23) Busa, adunay kusganong katarongan sa pagpatalinghog sa tambag, “Magmabinantayon,” ug, “Isul-ob ang kompletong armadura gikan sa Diyos aron kamo makabarog nga malig-on batok sa mga malipatlipatong kaugdahan sa Yawa” ug sa iyang mga demonyo.​—1Pe 5:8; Efe 6:11.