EPAFRAS

[pinamubo sa Epafrodito].

Usa ka matinumanong ministro ni Kristo kinsa, pinaagi sa pagsangyaw sa maayong balita, nagpahibalo sa mga taga-Colosas sa dili-takos nga kalulot sa Diyos ug busa lagmit nakatabang gayod ug dako sa pagpundar sa kongregasyon sa Colosas. Sa panahon sa unang pagkabilanggo ni Pablo, si Epafras miadto sa Roma, nga nagdalag makapadasig nga taho maylabot sa gugma ug kalig-on sa kongregasyon sa Colosas. (Col 1:4-8) Dayag nga nagpabilin siya sa Roma, labing menos sulod sa usa ka yugto sa panahon, sanglit si Pablo, sa pagsulat sa iyang sulat ngadto sa mga taga-Colosas, naglakip sa mga pangomosta ni Epafras ug nagpasalig kanila nga kini nga ulipon ni Jesu-Kristo kanunayng nanlimbasog sa iyang kaugalingon “alang kaninyo sa iyang mga pag-ampo, aron kamo sa kataposan makabarog nga bug-os ug may hugot nga pagtuo sa bug-os nga kabubut-on sa Diyos.” Ingon sa gipamatud-an ni Pablo, kining hinigugmang isigkaulipon naningkamot usab pag-ayo alang sa mga igsoon sa Laodicea ug sa Hierapolis. (Col 4:​12, 13) Unya, sa pagsulat usab ngadto kang Filemon, gipaabot ni Pablo ang mga pangomosta ni Epafras ug gihisgotan siya ingong “akong isigkabinilanggo nga nahiusa kang Kristo.” (Flm 23) Si Epafras dili angayng pakasaypon nga mao si Epafrodito nga taga-Filipos.