TIGPANAG-AN SA MGA HITABO

Usa ka tawo nga nangangkong may kalaki sa pagtag-an kon unsay mahitabo sa umaabot, ug gihisgotan sa Bibliya nga lakip niini mao ang salamangkerong mga saserdote, espiritistikanhong mga mananag-an, mga astrologo, ug uban pa. (Tan-awa ang PAGPANAG-AN; ESPIRITISMO.) Ang Hebreohanong pulong nga yid·deʽo·niʹ, nga gihubad nga “tigpanag-an sa mga hitabo,” naggikan sa lintunganayng pulong nga ya·dhaʽʹ (pagkahibalo) ug nagpasabot sa kahibalo nga natago sa ordinaryong tawo. Kini sagad nga makaplagan uban sa pulong nga ʼohv, nga nagkahulogang “espiritista.” (Deu 18:11) Ang pipila ka indibiduwal nakabaton ug okultong mga gahom tungod sa pagpakiglabot sa mga demonyo, ang daotang mga manulonda nga mga kaaway sa Diyos ilalom ni Satanas nga Yawa, kinsa mao ang magmamando sa mga demonyo. (Luc 11:14-20) Sa karaang mga panahon lainlaing mga paagi ang gigamit niini nga mga tigpanag-an aron mabatonan ang ilang mga mensahe sa pagpanag-an: pagpaniid sa kabituonan (Isa 47:13), pagsusi sa atay ug sa uban pang bahin sa ginhawaan sa gihalad nga mga hayop (Eze 21:21), paghubad sa mga tilimad-on (2Ha 21:6), pagkonsulta sa gitawag kuno nga mga espiritu sa patay, ug uban pa.​—Deu 18:11.

Ang kinabuhi sa mga Ehiptohanon, sama sa kinabuhi sa mga Babilonyanhon, nagamhan pag-ayo sa ilang mga mananag-an. (Isa 19:3) Sa laing bahin, ang tinuod nga mga alagad sa Diyos dili modangop sa maong mga tawo aron magpakisayod. Sa dihang ang Balaod gihatag sa Israel wala madugay human nga sila nakagawas sa pagkaulipon sa Ehipto, sila hugot nga gidid-an sa pagkonsulta sa “mga tigpanag-an sa mga hitabo.” (Lev 19:31) Ang ‘pagpakighilawas’ kanila mosangpot sa ilang pagkaputol (pinaagi sa kamatayon) gikan sa taliwala sa katawhan sa Diyos. Ug bahin sa usa ka tawo nga nagahimo niana nga kalaki, ang balaod mipadayon sa pag-ingon: “Kon bahin sa usa ka lalaki o babaye nga adunay espiritu sa pagkaespiritista o espiritu sa pagpanagna, pagapatyon sila sa walay pakyas.” (Lev 20:​6, 27) Halos 40 ka tuig sa ulahi, sa dihang nangandam sa pagsulod sa Yutang Saad ug sa pag-abog sa mga molupyo niini, ang Israel gipahinumdoman: “Dili ka magtuon sa pagbuhat sumala sa dulumtanang mga butang sa maong mga nasod. Walay makaplagan diha kanimo nga . . . bisan kinsa nga nagakonsultag espiritista o tigpanagna sa mga hitabo o bisan kinsa nga nagapakisayod sa mga patay.”​—Deu 18:9-11.

Kapin sa 350 ka tuig sa ulahi, ang unang hari sa Israel nga si Saul nagpapha sa tanang tigpanag-an sa mga hitabo gikan sa yuta, apan sa wala pa siya mamatay siya mipahilayo pag-ayo gikan kang Jehova nga tungod niana siya mismo midangop sa usa ka “babayeng batid nga espiritista didto sa En-dor” aron sa pagtag-an sa iyang umaabot. Sa sinugdan, kini nga espiritista nahadlok sa paggamit sa iyang kalaki, apan tungod sa pagpamugos ni Saul nga iyang “ipatungha si Samuel,” siya nagyamyam aron ipatungha ang usa ka panan-awon. Ang hitsura niini iyang gihubit ingong ‘usa ka tigulang nga tawo nga nagsul-ob ug kupo nga walay bukton.’ Nakombinsir si Saul nga kadto mao ang manalagnang si Samuel. (1Sa 28:​3, 7-19) Apan dili mahimong si Samuel gayod kadto tungod kay siya patay na, ug ang mga patay “walay nahibaloan nga bisan unsa.” (Ecc 9:5) Si Samuel, kon buhi pa, dili gayod makiglabot sa usa ka espiritista, ug si Jehova nga Diyos ug ang iyang balaang mga manulonda dili gayod makigtambayayong sa usa ka espiritista. Ang Diyos miingon sa iyang katawhan: “Kon sila magaingon kaninyo: ‘Sangpit sa mga espiritista o kanilang adunay espiritu sa pagpanagna nga nagyamyam ug nagyagubyob,’ dili ba ngadto man sa ilang Diyos nga ang bisan kinsang katawhan angayng mosangpit? Angay bang mosangpit sa mga patay alang sa mga buhi? Ngadto sa balaod ug ngadto sa pamatuod!” Dayon si Jehova nagkanayon: “Magpadayon gayod sila sa pagsulti sumala niini nga pahayag nga walay mabatonang banagbanag sa kabuntagon.”​—Isa 8:​19, 20.

Duolan sa 400 ka tuig human sa paghari ni Saul, si Haring Manases sa Juda “nagbuhat sa hingapin kon unsay daotan sa mga mata ni Jehova, aron sa pagpasuko kaniya,” lakip ang pagkonsulta sa mga tigpanag-an sa mga hitabo, nga midaghan ilalom sa iyang pagmando. (2Ha 21:6; 2Cr 33:6) Kining tanan kinahanglang paphaon gikan sa yuta sa apong lalaki ni Manases, ang matarong nga si Haring Josias.​—2Ha 23:24.

Ang bugtong paghisgot diha sa Kristohanon Gregong Kasulatan bahin sa demonyohanong pagpanag-an sa umaabot mao ang panghitabo diin si apostol Pablo, nga didto sa siyudad sa Filipos, nag-ayo sa “usa ka sulugoong babaye nga may espiritu, usa ka demonyo sa pagpanag-an.” Nakahatag siya sa iyang mga agalon ug dakong kinitaan “pinaagi sa pagpanag-an.” Sanglit ang maong buhat sa pagkamatuod demonyohanon ug supak gayod sa Diyos, ang mga agalon sa babaye nga gikan kaniya gipagula ang demonyo nagsamok pag-ayo kang Pablo didto sa Filipos, nga nagtaral kang Pablo ug sa iyang kauban nga si Silas atubangan sa mga mahistrado, kinsa nagsugo nga garotehon sila ug dayon ibalhog sa bilanggoan.​—Buh 16:​12, 16-24.