JAEL

[Kanding sa Bukid].

Ang asawa ni Heber nga Kenihanon, busa dili usa ka Israelinhon, ug ang nagpatay kang Sisera nga pangulo sa kasundalohan sa Canaan.

Uban sa iyang bana, si Jael nagtolda duol sa Kedes, ug dihay pakigdait tali kang Heber ug sa manlulupig nga mga Canaanhon. (Huk 4:​10, 11, 17, 21; tan-awa ang KEDES Num. 3.) Human mapildi si Sisera sa kamot sa Israel, siya mikalagiw sa walay gidapigan nga kampo ni Heber, diin gipasulod siya ni Jael sa iyang tolda. Dayon iyang gihabolan siya. Sa dihang siya nangayog tubig iyang gidalit kaniya ang gipatibugol nga gatas diha sa pangbangketeng panaksan aron imnon. Human niya siya mahaboli pag-usab, siya mihangyo kaniya nga magbantay sa ganghaan sa tolda. Naghunahuna nga siya luwas ingong bisita ni Jael, ang naluya ug gikapoy nga Sisera daling nahinanok. Si Jael, nga usa ka tigpuyo sa tolda nga sa walay duhaduha anad sa pagbugsok sa mga ugsok sa tolda diha sa yuta, mihinok sa pagduol kaniya nga bitbit ang usa ka martilyo ug usa ka ugsok sa tolda, ug iya kining gipalagbas sa ulo ni Sisera ngadto sa yuta. Sa dihang miabot ang naggukod nga si Barak, iyang gipakita kaniya ang pangulo sa kasundalohan, nga namatay “sa kamot sa usa ka babaye,” ingon sa gitagna ni Debora. (Huk 4:​9, 17-22) Ang maisogong buhat ni Jael batok sa kaaway ni Jehova gidayeg diha sa awit sa kadaogan ni Debora ug Barak, nga nagpahayag usab kang Jael nga “labing bulahan sa mga babaye.”​—Huk 5:​6, 24-27.