JEHOSAPAT

[Si Jehova Maoy Maghuhukom].

1. Anak nga lalaki ni Ahilud nga nag-alagad ingong tigtala panahon sa paghari ni David ug Solomon.​—2Sa 8:16; 20:24; 1Ha 4:3; 1Cr 18:15.

2. Usa sa 12 ka luyoluyo ni Haring Solomon. Sulod sa usa ka bulan matag tuig kini nga “anak nga lalaki ni Parua” nagtagana ug pagkaon sa hari ug sa iyang panimalay gikan sa teritoryo sa Isacar.​—1Ha 4:​7, 17.

3. Anak nga lalaki sa Judeanhon nga si Haring Asa pinaagi kang Azuba nga anak nga babaye ni Silhi. Sa dihang nagpanuigon ug 35 si Jehosapat mipuli sa iyang amahan sa trono ug nagmando sulod sa 25 ka tuig, sukad sa 936 W.K.P. (1Ha 22:42; 2Cr 20:31) Siya naghari sa panahon ni Haring Ahab, Ahazias, ug Jehoram sa Israel. (1Ha 22:​41, 51; 2Ha 3:​1, 2; 2Cr 17:​3, 4) Sa iyang paghari dihay kalig-on, kauswagan, himaya, ug relatibong kalinaw uban sa silingang kayutaan. Si Jehosapat nakadawat ug mga regalo gikan sa iyang mga sakop ug tributo gikan sa mga Filistehanon ug mga Arabo.​—2Cr 17:​5, 10, 11.

Mga Kalamposan. Gipalig-on ni Jehosapat ang iyang posisyon pinaagi sa pagbutang ug kasundalohan sa kinutaang mga siyudad sa Juda, ug mga garison usab diha sa yuta sa Juda ug sa teritoryo sa Israel nga nailog ni Asa nga iyang amahan. Sa Jerusalem usa ka dakong pundok sa maisog nga mga manggugubat ang nag-alagad sa intereses sa hari; ug sa Juda, si Jehosapat nagtukod ug kinutaang mga dapit ug mga siyudad nga tipiganan.​—2Cr 17:​1, 2, 12-19.

Dili sama sa Israelinhong mga hari sa amihanang gingharian, si Jehosapat nagpakita ug dakong kabalaka alang sa matuod nga pagsimba. (2Cr 17:4) Siya nagsugo sa pipila ka prinsipe, mga Levihanon, ug mga saserdote aron sa pagtudlo sa balaod ni Jehova diha sa mga siyudad sa Juda. (2Cr 17:7-9) Si Jehosapat nagbalaan usab sa balaang mga halad (2Ha 12:18) ug siya mismo mipanaw sa tibuok niyang gingharian, nga nagsugo sa iyang mga sakop nga mobalik kang Jehova diha sa pagkamatinumanon. (2Cr 19:4) Maisogong gipadayon ni Jehosapat ang gisugdan ni Asa nga kampanya batok sa idolatriya. (1Ha 22:46; 2Cr 17:6) Apan migamot pag-ayo ang daotang pagsimba didto sa hatag-as nga mga dapit taliwala sa mga Israelinhon nga tungod niana ang mga paningkamot ni Jehosapat wala sa bug-os makahanaw niini.​—1Ha 22:43; 2Cr 20:33.

Sa paghari ni Jehosapat naestablisar usab ang usa ka mas maayong hudisyal nga sistema. Gisilsil mismo sa hari nganha sa mga maghuhukom ang kahinungdanon sa pagkadili-mapihigon ug sa dili pagdawat ug hiphip, sanglit sila naghukom, dili alang sa tawo, kondili alang kang Jehova.​—2Cr 19:5-11.

Si Jehosapat maoy usa ka hari nga misalig kang Jehova. Sa dihang gihulga ang Juda sa hiniusang kasundalohan sa Ammon, Moab, ug sa bukirong rehiyon sa Seir, siya mapainubsanong miila sa kahuyangan sa nasod atubangan niini nga kapeligrohan ug miampo kang Jehova alang sa tabang. Human niadto si Jehova nakig-away alang sa Juda pinaagi sa paglibog sa mga panon sa kaaway nga tungod niadto sila nagpinatyanay sa usag usa. Busa ang naglibot nga kanasoran nangahadlok, ug ang Juda padayong nakapahimulos ug kalinaw.​—2Cr 20:1-30.

Relasyon Uban sa Napulo-ka-Tribong Gingharian. Nahuptan ni Jehosapat ang pakigdait uban sa amihanang gingharian ug sa dili-maalamong paagi nakig-alyansa sa kaminyoon uban kang Ahab. (1Ha 22:44; 2Cr 18:1) Tungod niini siya nadaldal sa makadaghang higayon ngadto sa lain pang pakig-alyansa uban sa gingharian sa Israel.

Sa panahon sa usa ka pagduaw sa amihanang gingharian human makigminyo ang iyang panganay nga si Jehoram sa anak nga babaye ni Ahab nga si Atalia, si Jehosapat miuyon sa pagduyog kang Haring Ahab sa usa ka pagpakiggubat aron mabawi ang Ramot-gilead gikan sa mga Siryanhon. Apan, sa wala pa gayod sugdi kini, mihangyo si Jehosapat nga si Ahab magpakisayod kang Jehova. Upat ka gatos ka manalagna ang nagpasalig kang Ahab sa kalamposan. Apan ang tinuod nga manalagna ni Jehova nga si Micaias, nga gidumtan ni Ahab apan gipatawag tungod sa pag-insistir ni Jehosapat, nagtagna sa tinong kapildihan. Bisan pa niana, si Jehosapat, tingali dili buot mobakwi sa iyang saad sa pag-uban kang Ahab, miadto sa gubat nga nagsul-ob sa iyang harianong mga besti. Sanglit si Ahab nanagana pinaagi sa pagtakoban sa iyang kaugalingon, naalaan sa mga Siryanhon si Jehosapat nga mao ang hari sa Israel ug busa siya maoy nahimong rumbo sa kinagrabehang pag-atake. Si Jehosapat halos wala makaikyas nga buhi, ug si Ahab, bisan pa sa pagtakoban, grabeng nasamdan. (1Ha 22:2-37; 2Cr 18) Sa pagbalik sa Jerusalem, si Jehosapat gisaway tungod sa iyang dili-maalamong pagpakig-alyansa sa daotang si Ahab, ug ang bisyonaryo nga si Jehu miingon kaniya: “Ngadto ba sa daotan nga ihatag ang tabang, ug ngadto ba sa mga nagadumot kang Jehova nga ikaw magbaton ug gugma? Ug tungod niini adunay kasuko batok kanimo gikan sa atubangan ni Jehova.”​—2Cr 19:2.

Sa ulahi, si Jehosapat nahimong kakombuya ni Haring Ahazias, ang manununod ni Ahab, sa usa ka negosyo sa pagbuhat ug mga barko didto sa Ezion-geber sa Gulpo sa ʽAqaba. Apan wala uyoni ni Jehova kini nga pakig-alyansa sa panakayan uban sa daotang si Ahazias. Busa, ingong katumanan sa tagna, ang mga barko nangaguba.​—1Ha 22:​48, 49; 2Cr 20:35-37; tan-awa ang AHAZIAS Num. 1.

Milabay ang panahon human niini, si Jehosapat miduyog kang Jehoram nga manununod sa trono ni Ahazias, ug sa hari sa Edom sa usa ka pag-atake militar aron sumpoon ang pag-alsa sa Moabihanon nga si Haring Mesa batok sa napulo-ka-tribong gingharian. Apan ang kasundalohan sa magkaalyado natanggong sa walay tubig nga kamingawan. Busa si Jehosapat nagpatawag ug usa ka manalagna ni Jehova. Tungod lamang sa pagtahod kang Jehosapat nga ang manalagnang si Eliseo nangayo ug pagtultol sa Diyos, ug ang iyang tambag nga gihatag human niadto nakaluwas sa tulo ka hari ug sa ilang kasundalohan gikan sa katalagman.​—2Ha 3:4-25.

Si Jehoram Nahimong Hari. Samtang buhi pa si Jehosapat, iyang gihatag ang pagkahari ngadto sa iyang panganayng si Jehoram, apan ang iyang ubang mga anak nga lalaki gihatagan niya ug bililhong mga gasa ug kinutaang mga siyudad sa Juda. (2Ha 8:16; 2Cr 21:3) Ang pakig-alyansa sa kaminyoon uban sa balay ni Ahab nagdala ug kadaot sa gingharian sa Juda ilabina human mamatay ug ilubong si Jehosapat sa Siyudad ni David. Ubos sa impluwensiya ni Atalia, gibuhi pag-usab ni Jehoram ang idolatrosong mga buhat.​—1Ha 22:50; 2Cr 21:1-7, 11.

4. Amahan sa Israelinhon nga si Haring Jehu.​—2Ha 9:​2, 14.