LEVIHANON, SIYUDAD SA MGA

Ang mga Levihanon wala hatagi ug pahat nga teritoryo, kay si Jehova mao ang ilang panulondon. (Num 18:20; Deu 18:​1, 2) Apan ang Diyos nagsugo nga ang ubang mga tribo sa Israel maghatag kanila ug katibuk-ang 48 ka siyudad ug mga sibsibanan nga naglibot niini. (Num 35:1-8) Sa kataposan ang maong mga siyudad gipahat ngadto sa mga Levihanon (Jos 21:1-8), ug 13 niini maoy mga siyudad sa mga saserdote. (Jos 21:19; tan-awa ang SASERDOTE, SIYUDAD SA MGA.) Sa 48 ka siyudad, 6 ang gihimong mga siyudad nga dalangpanan alang sa dili-tinuyong mga nakabuno.​—Jos 20:7-9; tan-awa ang SIYUDAD NGA DALANGPANAN.

Ang pagkatibulaag sa mga Levihanon taliwala sa ubang mga tribo sa Israel maoy katumanan sa tagna sa himalatyong si Jacob.​—Gen 49:​5-7.

Ang mga Levihanon adunay katungod sa paglukat bisan kanus-a sa mga balay nga ilang gibaligya sulod sa ilang mga siyudad, o kaha kini ipasig-uli ngadto kanila panahon sa tuig sa Tinghugyaw. Apan ang mga sibsibanan nga kasikbit sa ilang mga siyudad dili gayod ibaligya.​—Lev 25:32-34; tan-awa ang LEVIHANON.