LOT

Apo nga lalaki ni Tera ug anak sa igsoong lalaki ni Abraham (Abram) nga si Haran; busa, pag-umangkon ni Abraham.​—Gen 11:27.

Ang amahan ni Lot nga si Haran namatay sa Ur sa mga Caldeanhon, ug busa si Lot mikuyog kang Tera, Abram, ug Sarai gikan sa Ur paingon sa siyudad sa Haran, diin ang iyang apohan nga si Tera namatay. (Gen 11:​28, 31, 32) Unya si Lot mipanaw ngadto sa Canaan uban ni Abram ug Sarai, ug sa ulahi siya mikuyog kanila ngadto ug gikan sa Ehipto. (Gen 12:​4, 5; 13:1) Tungod kay midaghan na ang natigom nga mga gipanag-iya ni Lot ug Abram, pagbalik nila sa Canaan ang yuta dili na makaarang sa pagtagana alang kanila. Labot pa, mitungha ang panag-away tali sa ilang mga tig-alimag kahayopan. (Gen 13:5-7) Kay dili buot nga kini magpadayon, si Abram nagsugyot nga sila magbulag, nga gipabuot ang iyang pag-umangkon sa pagpili ug yuta. Gipili ni Lot ang maayong pagkatubig nga dapit, ang tibuok distrito sa Ubos nga Jordan. Gibalhin niya ang iyang kampo ngadto sa S ug sa ulahi nagpatindog ug tolda duol sa Sodoma. (Gen 13:8-12) Apan si Lot wala mahisama sa mga Sodomanhon. Siya maoy “matarong nga tawo” nga “ang nakita ug nadungog . . . samtang nagpuyo siya uban kanila sa adlaw-adlaw nakapasakit sa iyang matarong nga kalag tungod sa ilang kalapasan.”​—2Pe 2:8.

Sa dihang ang misulong nga upat ka magkaabin nga mga hari mipildi sa lima ka hari sa maong dapit, lakip ang hari sa Sodoma, gipang-agawan sa mga mananaog ang siyudad ug gibihag si Lot. Pagkasayod sa daotang nahitabo kang Lot, gitigom ni Abram ang 318 ka ulipon, gipildi ang mga mamimihag, gibawi ang tanang kabtangan, ug giluwas si Lot.​—Gen 14:1-16.

Giduaw sa mga Manulonda. Sa ulahi, sa dihang giduaw si Lot sa duha ka manulonda sa panahon nga hapit nang laglagon ang Sodoma, giabiabi niya sila. Apan gilibotan sa mga lalaki sa siyudad ang balay ug namugos nga pagawason ang mga bisita ngadto kanila alang sa imoral nga mga katuyoan. Gipaninguha ni Lot nga panalipdan ang iyang mga dinapit bisan gani sa pagtanyag sa iyang duha ka ulay nga anak nga babaye ngadto sa magubtanong panon. Kay nangasuko, ang magubtanong panon midutdot pag-ayo kang Lot, tungod niana ang iyang mga bisita nga manulonda nagpasulod kaniya sa balay ug nagbuta sa daotang mga Sodomanhon.​—Gen 19:1-11.

Naluwas gikan sa Sodoma. Unya gipahibalo sa mga manulonda si Lot nga ang pagtuaw batok sa mga molupyo sa Sodoma milanog sa atubangan ni Jehova ug nga sila gipadala aron laglagon ang siyudad. Sumala sa giingon kaniya, si Lot nagpasidaan sa iyang mga umagaron, nga sa dayag nagtinguhang mangasawa sa iyang mga anak apan wala pa makahimo niini. (Itandi ang Gen 19:​8, 14.) Hinunoa, ang iyang mga umagad wala magpatalinghog sa iyang mga pulong. (Gen 19:12-14) Pagkakadlawon ang duha ka manulonda nag-apura kanila sa pagbiya, nga nagpadali kanila pinaagi sa paghawid sa mga kamot ni Lot, sa iyang asawa, ug sa iyang duha ka anak nga babaye. Sa pagtuman sa hangyo ni Lot, ang mga manulonda nagtugot kaniya sa pagkalagiw ngadto sa duol nga siyudad sa Zoar. Paghiabot ni Lot didto, si Jehova nagpahinabog kalayonhong kalaglagan sa Sodoma ug Gomora. Hinunoa, sa pagkadili-masinugtanon ang asawa ni Lot (nga wala nganli sa Kasulatan) “nga diha sa iyang luyo milingi,” tingali uban ang pagpangandoy sa mga butang nga gibiyaan. Tungod niana, “siya nahimong usa ka haliging asin.”​—Gen 19:15-26.

Sa ulahi si Lot mibalhin gikan sa Zoar ug mipuyo sa usa ka langob sa bukirong rehiyon. Dayag nga ang mga umagaron ni Lot namatay sa Sodoma, busa ang duha ka anak nga babaye ni Lot walay mga kapikas. Ilang gimaniobra nga sa dili-tinuyo makigsekso kanila ang ilang amahan samtang siya nahubog sa bino. Gihimo nila kini aron makabaton ug anak gikan sa ilang amahan. Ingong resulta, ang matag anak nga babaye nakabaton ug usa ka anak nga lalaki, nga kanila naggikan ang mga Moabihanon ug ang mga Ammonhanon.​—Gen 19:30-38; Deu 2:​9, 19.

Usa ka Pasidaan. Ang pagkatinuod sa asoy sa Kasulatan mahitungod kang Lot gipamatud-an ni Jesu-Kristo. Iyang gipakita nga “sa mga adlaw sa Anak sa tawo,” o sa panahon sa iyang presensiya, ang mga kahimtang mahisama sa mga adlaw ni Lot sa dihang ang mga tawo walay pagpakabana nga nanagpangaon, nanag-inom, nanagpamalit, nanagbaligya, nanagtanom, ug nanagpanukod hangtod nga ang kalayo ug asupre miulan gikan sa langit aron sa paglaglag kanilang tanan. Gipakita ni Kristo nga nianang umaabot nga panahon ang mga tawo kinahanglang dili mobalik sa mga butang sa luyo, ug siya naghatag ug usa ka tataw kaayong pananglitan aron ipakita ang makapasubong mga sangpotanan sa pagbuhat niana, sa pag-ingon: “Hinumdomi ninyo ang asawa ni Lot.”​—Luc 17:26-32.