LICAONIA

Usa ka rehiyon sa Asia Minor diin gigamit ang pinulongang Licaonianhon. (Buh 14:6-11) Ang mga utlanan sa Licaonia kanunayng nagbag-obag-o sa tibuok nga kasaysayan niini ug dili na matino. Sa panguna, sa yugto diin gihisgotan ang Licaonia diha sa rekord sa Bibliya, kini nahimutang sa habagatang bahin sa Romanhong lalawigan sa Galacia ug ang utlanan niini mao ang Pisidia ug Frigia sa K, ang Capadocia sa S, ug ang Cilicia sa H. Kining dapita maoy patag nga walay kahoy ug limitado ang tubig. Hinuon, kaniadto kini maoy tabunok ug maayong sibsibanan alang sa dakong panon sa mga karnero.

Si apostol Pablo miduaw sa Derbe ug Listra, duha ka siyudad sa Licaonia, sa panahon sa iyang una ug ikaduhang misyonaryong mga panaw. Lagmit nga siya mihapit usab didto sa iyang ikatulong misyonaryong panaw sanglit siya mipanaw gikan sa “lainlaing dapit sa tibuok kayutaan sa Galacia.”​—Buh 14:​6, 20, 21; 16:1; 18:23.