MAHER-SALAL-HAS-BAZ

[Pagdali, Oh Inagaw! Siya Nagdalidali Pag-adto sa Inagaw; o, Nagdali Pag-adto sa Inagaw, Siya Nagdalidali Pag-adto sa Inagaw].

Ang ngalan nga gingalan sa ikaduhang anak nga lalaki ni Isaias ubos sa sugo ni Jehova.

Gisugo ni Jehova si Isaias nga isulat kining matagnaong mga pulong diha sa usa ka dakong papan ug pamatud-an kini sa kasaligang mga saksi. Human niadto, iyang gisugo ang manalagna nga gamiton kining maong ekspresyon ingong ngalan sa iyang bag-ong natawo nga anak nga lalaki, nga nag-ingon nga sa dili pa makapamulong ang bata nga “Amahan ko!” ug “Inahan ko!” buntogon sa hari sa Asirya ang mga kaaway sa Juda​—ang Damasco ug Samaria. (Isa 8:1-4) Ang matagnaong kahulogan niining ngalana nga gingalan sa ikaduhang anak nga lalaki ni Isaias natuman sulod sa gitakdang panahon. Panahon sa paghari ni Haring Peka sa Israel, gisulong sa Asiryanhong monarko nga si Tiglat-pileser III ang Israel, giilog ang daghang siyudad, giagawan ang yuta, ug gibihag ang daghang molupyo. Human niadto, si Peka gibuno. (2Ha 15:​29, 30) Giilog usab sa hari sa Asirya ang Damasco nga kaulohang siyudad sa Sirya, gidestiyero ang katawhan niini, ug gipatay si Haring Rezin sa Sirya. (2Ha 16:9) Sa ingon, kining duha ka hari nga nagkunsabo batok sa Juda nakaagom sa ilang kamatayon. Sa ulahi, niadtong 740 W.K.P., gipukan sa mga Asiryanhon ang Samaria ug gihanaw ang apostatang mga Israelinhon gikan sa siyudad ug gikan sa ubang bahin sa dominyo sa amihanang gingharian sa Israel. (2Ha 17:1-6) Busa, kining bata nga lalaki nga natawo kang Isaias pinaagi sa iyang asawa (nga iyang gitawag nga “manalagnang babaye”) nahimong usa ka matuod ug kasaligang ‘ilhanan ug milagro’ sa Israel gikan kang Jehova.​—Isa 8:3, 18.