PAGPANGANDAM

Ang gingalan sa adlaw una pa ang senemana nga Igpapahulay, nga nianang adlawa ang mga Hudiyo mangandam alang sa Igpapahulay.

Sa dihang gisugdan ni Jehova ang pagtaganag mana didto sa kamingawan siya nagsugo nga sa ikaunom nga adlaw dobleng gidaghanon sa mana ang kuhaon, sanglit ang katawhan dili manguha ug mana sa adlaw nga Igpapahulay, o sa ikapitong adlaw. Busa, sa pagpangandam sa senemanang Igpapahulay, ang mga Hudiyo manguha ug magluto o maglung-ag ug ekstra nga mana. (Ex 16:​5, 22-27) Sa ulahi “ang adlaw sa dili pa ang igpapahulay” gitawag nga “Pagpangandam,” maingon sa gipatin-aw ni Marcos. (Mar 15:42) (Sa susama, sa Aleman ang Samstag [Sabado] gitawag usab nga Sonnabend [sa literal, “Sun evening”] o “gabii sa dili pa ang Dominggo [Sonntag].”) Ang adlaw sa Pagpangandam sa mga Hudiyo matapos sa pagsalop sa adlaw, sa adlaw nga gitawag karon ug Biyernes, nga nianang higayona ang Igpapahulay magsugod, sanglit ang adlaw sa mga Hudiyo magsugod man sa gabii hangtod sa sunod nga gabii.

Sa adlaw sa Pagpangandam ang katawhan mag-andam ug mga pagkaon alang sa sunod nga adlaw, ang Igpapahulay, ug taposon ang bisan unsang dinaliang buluhaton nga dili na makahulat human sa Igpapahulay. (Ex 20:10) Ang Balaod naglatid nga ang lawas sa usa ka tawo nga gipatay ug gibitay sa usa ka estaka “kinahanglang dili magpabilin sa estaka sa tibuok gabii.” (Deu 21:​22, 23; itandi ang Jos 8:29; 10:​26, 27.) Sanglit si Jesus ug kadtong gilansang uban kaniya diha pa man sa mga estaka sa hapon sa Pagpangandam, hinungdanon gayod alang sa mga Hudiyo nga mapadali ang ilang kamatayon aron sila ikalubong sa dili pa mosalop ang adlaw. Kini ilabinang gikinahanglan sanglit ang adlaw nga hapit nang magsugod inigsalop sa adlaw maoy usa ka regular nga Igpapahulay (ang ikapitong adlaw sa semana) ug usab usa ka Igpapahulay tungod kay kini Nisan 15 (Lev 23:5-7), busa usa ka “dako” nga Igpapahulay. (Ju 19:​31, 42; Mar 15:​42, 43; Luc 23:54) Si Josephus nagkutlo sa usa ka mando ni Cesar Agusto nga nag-ingon nga ang mga Hudiyo dili obligado sa pag-atubang sa korte “panahon sa Igpapahulay o sa adlaw sa pagpangandam alang sa igpapahulay (Bisperas sa Igpapahulay) human sa ikasiyam nga takna,” nga nagpakitang sila nagsugod sa pagpangandam alang sa Igpapahulay sa ikasiyam nga takna sa Biyernes.​—Jewish Antiquities, XVI, 163 (vi, 2).

Mahitungod sa buntag nga gihusay si Jesus ug gipaatubang kang Pilato, nga maoy buntag sa Nisan 14 (sanglit ang adlaw sa Paskuwa nagsugod sa miaging gabii), ang Juan 19:14 nag-ingon: “Karon kadto maoy pagpangandam sa paskuwa.” (NW, KJ, Da) Kini gisabot sa pipila ka komentarista ingong “pagpangandam alang sa paskuwa,” ug ingon niini ang paghubad sa pipila ka hubad sa Bibliya niining bersikuloha. (AT, We, CC) Hinunoa, kini nagsugyot nga ang Paskuwa wala pa sauloga, samtang ang mga asoy sa Ebanghelyo tin-awng nagpakita nga si Jesus ug ang mga apostoles nagsaulog na niini sa miaging gabii. (Luc 22:15; Mat 26:18-20; Mar 14:14-17) Hingpit nga gisunod ni Kristo ang mga regulasyon sa Balaod, lakip na ang kinahanglanon sa pagsaulog sa Paskuwa niadtong Nisan 14. (Ex 12:6; Lev 23:5; tan-awa ang PASKUWA.) Ang adlaw sa paghusay ug sa kamatayon ni Jesus mahimong isipon ingong ang “pagpangandam sa paskuwa” sa diwa nga kadto maoy pagpangandam alang sa pito ka adlaw nga Pista sa mga Tinapay nga Walay Igpapatubo nga magsugod sa pagkasunod adlaw. Tungod kay ang Paskuwa ug ang maong pista nagsunod diha sa kalendaryo, ang katibuk-ang pista sagad nga gilakip sa terminong “Paskuwa.” Ug ang adlaw human sa Nisan 14 maoy kanunayng Igpapahulay; dugang pa, niadtong 33 K.P., ang Nisan 15 natunong sa regular nga Igpapahulay, nga naghimo sa maong adlaw nga “dako” o doble nga Igpapahulay.