SADRAK

Ang Babilonyanhong ngalan sa usa ka Hudiyong destiyero nga gihatagag hataas nga posisyon diha sa kagamhanan sa Babilonya. Si Sadrak, Mesak, ug Abednego​—ang tulo ka kauban ni Daniel​—kanunayng gihisgotan nga magkauban, ug si Sadrak ang kanunayng una nga gitala, tingali tungod kay ang ilang katumbas nga mga ngalang Hebreohanon​—Hananias, Misael, ug Azarias​—kanunayng makita sumala sa han-ay sa alpabeto sa Hebreohanong mga karakter. Gihatagan silag Babilonyanhong mga ngalan human sila dad-a ngadto sa Babilonya. Didto sila gibansay, sanglit namatikdan nga sila hamis ug pamanit, ambongan ug makinaadmanon nga mga batan-on. Pagkahuman sa tulo ka tuig nga pagtuon, si Sadrak, Mesak, ug Abednego nakaplagan nga napulo ka pilo nga mas maayo kay sa maalamong mga tawo sa Babilonya. Tino nga nabatonan nila ang panalangin ni Jehova. Sa walay duhaduha, ang usa ka hinungdan niadto maoy tungod sa ilang hugot nga pagdumili nga mahugawan ang ilang kaugalingon sa mga pagkaon nga Babilonyanhon. (Dan 1:3-20) Human niini gitala ang pagkatudlo kanila ingong tagdumala sa sakop nga distrito sa Babilonya. (Dan 2:49) Sa kadiyot nga panahon nawala nila ang pabor sa hari sa dihang midumili sila sa pagyukbo sa iyang dakong larawan, apan human si Jehova magpagula kanila nga wala maunsa gikan sa nagdilaab nga hudno, sila gibalik sa ilang kanhing posisyon.​—Dan 3.